Hră lơkak čuă ngui adôh suang Đà Lạt amra lăi pơthâo giăm 60 anih ngui amăng plơi prong Đà Lạt hăng sa, dua kual jum dar amra pơthâo hăng dua tơlơi Angle hăng Yuăn. Hră lơkak hơmâo pơkah jing 8 grup, anun lĕ: anih ngui gru grua, čuă ngui amăng glai čư̆, anih pơdă prưng hăng anih ngui adôh suang…amra ngă gêh gal brơi kơ tuai čuă tañ thâo hăng nao pel ĕp lămg hơdôm anih čuă ngui gru grua, adôh suang amăng plơi prong anai.

Ơi Đặng Quang Tú, Khua Jơnum min mơnuih ƀôn sang plơi prong Đà Lạt brơi thâo, rơnuč thun 2023, Đà Lạt hơmâo pơ-ư ang sit nik jing ding kơna amăng plang pơlir hơdôm boh plơi pla pơčeh phrâo mơng UNESCO amăng tơlơi adôh suang. Bruă pơjing hră lơkak ngui adôh suang Đà Lạt lĕ sa amăng tlâo tơlơi pơčeh gưl plơi prong kiăng ngă tui hơdôm boh tơhnal hơmâo ƀuăn lơm mut hrŏm pơlir hơbit, kah hăng pơtrut lăi pơthâo anŏ yôm mơng gru grua hăng tơlơi pơčeh amăng pơđĭ kyar hơđong kjăp.

“Hră lơkak anai ƀu djơ̆ kơnong lĕ sa gơnam yua pioh črâo brơi jơlan đôč ôh mơ̆ ăt kiăng pơtruh nao rai kơplah wah ƀing kơhnâo kơhnăk, hơdôm anih ngui adôh suang hăng mơnuih mơnam; djru pok rai hơdôm tơlơi ngui gru grua hăng pơčeh phrâo, laih dong pơtrut pơđĭ kyar hơđong kjăp mơng gơnong bruă tuai čuă ngui, tơlơi ngui pĕ gông brô̆ pơlir hăng plơi prong ngui adôh suang. Pơ anăp anai, ƀing gơmơi amra tŏ tui pơgiong, pơđĭ kyar hăng pok prong hră lơkak anai kiăng lăi pơthâo djop mơta hăng tong ten kơ hơdôm anih ngui adôh suang phrâo, hơdôm hrơi ngui gru grua yôm phar amăng plơi prong”.

Đĭ pơhiăp amăng mông lăi pơthâo, ơi Jonathan Wallace Baker, Khua pơ ala grup pơtô pơjuăt, boh thâo ia rơgơi hăng gru grua mơng Sang gum hơbit djop dêh čar (UNESCO) ƀơi Việt Nam pơsit tong, mơng hrơi mut hrŏm pla pơlir plơi prong pơčeh phrâo mơng UNESCO amăng tơlơi adôh suang, Đà Lạt hơmâo gir run mut hrŏm amăng hơdôm jơnum pơƀut gưl jar kmar hăng amăng kual tui glông pơlir anai, kiăng pơjing bruă mă ngă tui hơdôm tơlơi ƀuăn amăng glông pơlir hơbit anai.

UNESCO hok mơ-ak lơm dưi gum hrŏm hăng Đà Lạt pơjing hră lơkak tuai čuă ngui - sa hră lơkak kiăng pơsit tong hăng pơkah anih pơčeh phrâo amăng mơnuih mơnam amăng plơi prong kah hăng hơdôm anih čuă ngui ƀơi anai.

“Tui kâo pơmĭn bruă pơčeh anai amra pơgôp pơjing bruă pơlir hơbit gru grua hăng pơčeh phrâo mơng plơi prong Đà Lạt, hăng amra jing bruă ba glăi tŭ yua kiăng tuai čuă ngui dưi gêh gal lơm hyu čuă ngui amăng plơi prong. Laih dong, dưi djru brơi hwodôm anom bruă wai lăng, lăi pơthâo gru grua, hơdôm anih pơčeh phrâo amăng plơi prong brơi klă ƀiă dong”.

Ăt tui ơi Jonathan Wallace Baker, Đà Lạt hơmâo tơlơi gal prong amăng mă yua hơdôm gru grua brơi hơdră pơđĭ kyar hơđong kjăp, yua ƀơi anai hơmâo lu gru grua yôm phara mơng 20 djuai ania pioh glăi. Yua anun, bruă pơlir kơplah wah pơđĭ kyar bơwih ƀong huă-mơnuih mơnam hăng djă pioh, tŏ tui gru grua, lăng yôm rơnoh bơwih ƀong mơng pơčeh phrâo tui gru grua, adôh suang hăng đing nao djop mơta amăng pơčeh phrâo mơng rĭm čô mơnuih, khul grup ƀudah mơnuih mơnam ƀu djơ̆ kơnong pơtrut bơwih ƀong amăng plơi prong đôč ôh mơ ăt kiăng djă pioh gru grua./.