Tui gơnong bruă gru grua, bơrơguăt drơi jăn hăng tuai čuă ngui tơring čar Dak Lak, amăng hơdôm hrơi pơdơi ngă lơphet thun anai, hơdôm anih čuă ngui amăng tơring čar čơkă giăm 130.000 čô tuai, amăng anun hơmâo giăm 2.500 čô tuai mơng tač rơngiao. Mrô tuai dŏ glăi lĕ 75.000 čô, sang jưh tuai dưi pơhlôm brơi giăm 70%. Abih tih prăk pơhrui glăi amăng hơdôm hrơi pơdơi ngă lơphet lĕ giăm 85 klai prăk. Mrô tuai hyu čuă ngui, dŏ đih glăi hăng tuai mơng tač rơngiao nao čuă ngui thun anai lêng kơ đĭ mơng 2-3 wŏt pơhmu tui tơđar thun 2023.

Yă Nguyễn Thụy Phương Hiếu, kơ-iăng khua gơnong bruă gru grua, bơrơguăt drơi jăn hăng tuai čuă ngui Dak Lak brơi thâo, amăng hơdôm hrơi ngă lơphet akŏ pơjing kơnuk kơna thun anai amăng tơring čar pơphun lu tơlơi ngui ngor. Mơng hơdôm tơlơi ngui anai, Dak Lak blung a dưi pơƀuh rup rap jê̆ giăm, pơhưč lu tuai čuă ngui.