Jing juăt laih, rim mơguah tơgŭ mơ̆ng pit, ơi Y Tài ƀơi să Quảng Phú, tơring glông Krông Nô, tơring čar Dak Nông juăt hơduah ĕp lăng glông pôr radio pioh hmư̆ Jơlan hơdră pơtui jua pơhiăp hăng tơlơi Bơnông mơ̆ng Gong phun jua pơhiăp dêh čar Việt Nam. Ơi Y Tài lăi pơthâo, thun anai 80 thun laih, samơ̆ đing nao biă tơlơi pơhing phrâo amăng lŏn ia hăng dêh čar tač rơngiao tui radio hăng tơlơi Bơnông. Biă ñu, Jơlan hơdră dô̆ lăi pơhing bôh thâo phrâo hăng jing jơlan hmư̆ ngui, hăng hơdôm jơlan hơdră tơlơi adôh đưm, tơlơi akhan, djru pơgang bôh thâo djop djuai ania.

“Kâo hmư̆ tơlơi Bơnông mơ̆ng Gong phun jua pơhiăp dêh čar Việt Nam mơ̆ng thun 2006 truh ră anai laih, kâo juăt hmư̆ črăn hơdră Ngă đang hmua kiăng hmư̆ tui hơdră hăng bơwih brơi kơ phun pla, dua lĕ hmư̆ tơlơi adôh đưm Bơnông pô, tơlơi Bơnông pơhiăp amăng Gong phun jua pơhiăp dêh čar Việt Nam amuñ hmư̆ biă, tơlơi Bơnông preh anun hơdôm glông hrĕ pơkon mơ̆ng Bơnông leng kơ thâo hluh, klă biă, hluai tui jơlan hơdră kâo čang rơmang ƀing hlăk ai ră anai  gir run hrăm tui klă, gir run ngă tui hăng djă pioh bôh thâo đưm mơ̆ng djuai ania pô, ƀu yua kơ tơlơi hơdip phrâo mơ̆ lui raih lơi phiăn juăt klă hiam mơ̆ng djuai ania pô”.

Tơdơi 18 thun pơtui jua pơhiăp, Jơlan hơdră pơtui jua pơhiăp hăng tơlơi Bơnông mơ̆ng Gong phun jua pơhiăp dêh čar Việt Nam amăng ƀrư̆ djơ̆ tui tơlơi kiăng hmư̆ lăng mơ̆ng ƀing gơyut hmư̆ brô̆. Ƀing dăp hơdră, pơhiăp tơlơi Bơnông kah hăng Thị Đoắt, H'Thi Rya, Điểu Thân, Y Sưng ƀu pơdơi tŭ mă bôh thâo, hơdră phrâo bruă mă kiăng kơ hmao tui jơlan gah pơtui jua pơhiăp rơnuk anai. Ƀu kơnong kơ pơblang, pơđok hơdôm tơlơi pơhing, jơlan hơdră ƀơi anih mă pơhiăp, ƀing dăp hơdră dô̆ hyu pơ̆ plơi pla amăng kual Dap Kơdư pioh tŭ mă tơlơi pơhing, čih glăi, ngă tui hơdôm jơlan hơdră lu mơta, ngă pơhưč. Lăng ƀuh tơlơi phrâo, ơi Y Cam - Kơ-iăng Khua Jơnum min mơnuih ƀôn sang să Quảng Phú, tơring glông Krông Nô, tơring čar Dak Nông pơsit:

“Tơlơi Bơnông amăng Gong phun jua pơhiăp dêh čar Việt Nam klă biă, hmư̆ amuñ thâo hluh, bôh yôm rơguăt, lu mơta pôr hyu djop hơdôm bôh yôm mơ̆ neh wa kiăng, bơhmutu ñu hơdră bruă Ping gah, Kơnuk kơna truh hăng neh wa, kah hăng lăi pơthâo truh neh wa hơdră ngă đang hmua, bơwih brơi phun kơphê, tiu... neh wa ăt đing nao mơn tơlơi pơhing phrâo, jơlan hơdră sit nik hăng neh wa. Kâo čang rơmang ƀing gơyut pơtui jua pơhiăp tơlơi Bơnông hmâo lu bôh yôm phrâo, klă hloh hăng sit nik hloh kơ neh wa”.

Kiăng hmao tui jơlan gah pơđĭ kyar hrŏm mơ̆ng bruă pôr pơhing rơnuk anai, hrŏm hăng tơlơi pơđĭ kyar kơtang mơ̆ng bruă pôr pơhing mơnuih mơnam, hrŏm hăng pơtui jua pơhiăp mơ̆ng hlâo tui radio, mơ̆ng lơ 23/3/2024, Jơlan hơdră pơtui jua pơhiăp hăng tơlơi Bơnông mơ̆ng Gong phun jua pơhiăp dêh čar Việt Nam hmâo ba đĭ hăng dlông plăng Facebook hăng Fanpage “Tiếng Mnông VOV Tây Nguyên”. Hăng hơdră ngă phrâo anai hmâo djru laih mơnuih hmư̆ đing nao Jơlan hơdră pơtui jua pơhiăp hăng Tơlơi Bơnông mơ̆ng Gong phun jua pơhiăp dêh čar Việt Nam. Sa čô gơyut hmư̆ lăng nick name facebook lĕ “Huế Xưa” brơi thâo:

“Kâo thâo tơlơi Bơnông tui “Fanpage tơlơi Bơnông Dap Kơdư”. Mơ̆ng Fanpage amra hmư̆ hơdôm bôh yôm brô̆ pơtui, amăng plăng web hăng tơlơi Bơnông, ƀing hlăk ai ră anai ngă juăt tơlơi pơhing mơ̆ng plăng facebook lu, anun plăng Fanpage anai lăp djơ̆ hăng ƀing hlăk ai lĕ djuai ania Bơnông hor hơduah ĕp kơ bôh pơhiăp bôh thâo mơ̆ng pô. Hmâo Fanpage abih bang hăng bôh pơhiăp Bơnông tui anai klă biă. Kâo hor hmư̆ tơlơi akhan đưm, hmư̆ ƀing thâo tơlơi adôh đưm adôh... hăng hơdôm tơlơi pơhing pơkon amăng Facebook tơlơi Bơnông, tơlơi pơhiăp lăp djơ̆ hăng ngă pơhưč pran jua”.

Biă ñu, mơnuih lăng hmư̆ hmâo nick “Songtheothoigian” pơdah pran jua hur har hăng yâo mơ-ak lơm hơduah lăng plăng fanpage “Tiếng M'nông VOV Tây Nguyên”, hăng tơña bla na nao ƀing adơi amai pơhiăp pơtui amăng jơlan hơdră. Pô anai lăi pơhing lĕ: “Kâo ƀuh ƀơi Fanpage Tơlơi Bơnông hmâo video clip amĭ kâo adôh tơlơi adôh đưm, adơi amai dô̆ hmâo lu tơlơi adôh mơ̆ng amĭ kâo mơn, dưm đĭ lu hloh dong hŏ adơi amai hŏ”...

“Kâo kơkuh kơ adơi amai, kâo anăn Nam, thun anai kâo 34 thun, kâo dô̆ pơ̆ să Quảng Trực, kâo hmư̆ jơlan hơdră pơtui pơhiăp hăng tơlơi Bơnông tui Fanpage “Tiếng M’nông VOV Tây Nguyên”, kâo ƀuh ƀing adơi amai dưm đĭ tơlơi čih, rup ƀuh pơhưč pran jua biă, kâo ăt lăi pơhing hyu mơn hơdôm bôh yôm adơi ayong dưm đĭ kiăng pôr hyu bôh pơhiăp djuai ania pô truh hăng ƀing gơyut hlăk ai lu hloh, ră anai ƀơi hơpă hlơi hlơi leng kơ yua facebook anun hơdră ba jơlan hơdră pơtui jua pơhiăp tui anai lăp djơ̆ biă hăng hlơi ƀu dưi hmư̆ jơlan hơdră tui radio”.

Fanpage “Tiếng Mnông VOV Tây Nguyên” ră anai hmâo giăm truh 1.500 wot čô lăng, rim hrơi Fanpage na nao dưm đĭ hơdôm tơlơi pôr pơhiăp tơlơi Bơnông hăng anô̆ pơdah klă hiam hăng rup hăng jua pơhiăp ăt gêh gal mơn kơ mơnuih lăng hăng hmư̆ lăp djơ̆ hăng lu mơnuih hơduah ĕp lăng, biă ñu ƀing hlăk ai... kah hăng: tơlơi pơhing phrâo, tơlơi čih lăi nao, tơlơi akhan, tơlơi ruai rơnuč rơwang hrơi tơjuh... Sa čô gơyut hmâo nick name lĕ “Tung Jôk” lăi pơthâo:

“Fanpage tiếng Mnông VOV Dap Kơdư pơhưč pran jua biă, kâo hor hmư̆ tơlơi phrâo, ƀing adơi ayong dưm đĭ tơlơi pơhing hmâo rup hăng đok pơhiăp, kơnong kơ kiăng pok tơbiă lăng lĕ hmư̆ mơtăm, lăp djơ̆ hăng hlăk ai ră anai biă”.

Pluh čơpăn thun rơgao, Jơlan hơdră pơtui jua pơhiăp tơlơi Bơnông mơ̆ng Gong phun jua pơhiăp dêh čar Việt Nam, yua kơ Ƀirô Gong phun jua pơhiăp pơdŏng ƀơi Dap Kơdư pơtui, ƀu pơdơi pơđĭ bruă mă bôh yôm hăng hơdră pơdah lăi pơthâo. Hrŏm hăng jơlan hơdră pơtui jua pơhiăp rim hrơi hăng plăng pơhing điện tử VOV4.M’nông lĕ Fanpage: “Tiếng Mnông VOV Tây Nguyên” lĕ “jơlan tô hyu” mơ̆ng Jơlan hơdră pơtui jua pơhiăp tơlơi Bơnông, djơ̆ hăng tơlơi kiăng jai hrơi jai lu mơnuih lăng hmư̆./.