Kiăng prăp lui kơ jơnum ngui, hlâo kơ anun hơdôm rơwang hrơi tơjuh, hơdôm grŭp mơnuih thâo tơlơi đưm ƀơi hơdôm bôh plơi pla hmâo pơhrăm klă laih, lok glăi hơdôm tơlơi atông čing juăt hmư̆ ƀudah pơhrăm pơđĭ dlông, ngă phrâo tơlơi atông. Amai H’ Nhuen Mlô, ƀơi ƀuôn Ko Siêr, phường Tân Lập, plơi prong Buôn Ma Thuột, tơring čar Dak Lak brơi thâo, ñu hăng ƀing gŏp mơ̆ng grup atông čing đah kơmơi phường Tân Lập hmâo pơhrăm sa blan hăng anai pioh dưi pơdah juăt 2 mơta tơlơi atông čing hơgor, čing kram pơkĕ hrŏm yun suang.

“Hlâo kơ nai pơtô ƀing gơmơi hrăm mă pô, dăp mă grŭp atông. Lơm nai rai kơnong kơ đing nao pơtô hơdôm jua atông akă kơjăp, akă ƀu mơ-ak đôč. Tui anun yơh, ƀing gơmơi pơhrăm nao pơhrăm rai truh kơ juăt kah mơ̆ng pơdơi. Ƀing adơi amai nao pơdah atông čing hơgor anun ăt hur har pran jua mơn, hlơi hlơi leng kơ gir run abih pran jua pô pioh dưi pơdah klă hloh”.

Thun anai lĕ thun tal 3 jơnum ngui bôh thâo čing hơgor dưi hmâo tơring čar Dak Lak pơphun. Hrŏm hăng atông čing hăng gông brô̆ djuai ania, amăng jơnum ngui dô̆ hmâo hơdôm adôh tơlơi adôh đưm, suang đưm, lăi pơthâo črăn jơnum ngui, phiăn jơnum ngui bôh thâo đưm nao hrŏm hăng bôh thâo čing hơgor Dap Kơdư. Anai lĕ tal pioh hơdôm bôh anom hrăm tui, lăi pơthâo nao rai tơlơi găn rơgao, hrŏm hăng anun pơdah bôh thâo, tơlơi pơčeh phrâo, pơđĭ kyar lar đĭ djop djuai er adôh hăng gông brô̆. Pô thâo tơlơi đưm Y Phúc Êban, ƀơi ƀuôn Ju, să Ea Tu, plơi prong Buôn Ma Thuột, tơring čar Dak Lak lăi pơthâo:

“Ƀơƀrư̆ hrăm tui măng ƀiă pioh jai hrơi jai klă hloh. Jơnum ngui jing bơkơtưn rah, pơjing pran mơ-ak bơkơtưn hur har pran jua mơ̆ng rim grŭp amra jai đĭ lu”.

Jơnum ngui thun anai ngă pơhưč rơbêh kơ 500 čô mơnuih thâo tơlơi đưm, mơnuih pơdah adôh suang mơ̆ng 13 bôh tơring glông, plơi prong, Sang hră gưl dlông Tây Nguyên hăng sa dua bôh sang hră gưl 3 kơnuk kơna rông amăng tơring čar gum hrŏm. Rim anom bruă leng kơ dưi ba truh hơdôm črăn tơlơi adôh suang phara hmâo tơlơi gum hrŏm mơ̆ng mơnuih thâo tơlơi đưm hăng lu hnưr, pơdah glăi abih bang črăn ngă lơphet, jơnum ngui đưm mơ̆ng sa djuai ania, sa plơi pla. Amai H’ Lâm Hmok, ƀơi tơring kual Buôn Trấp, tơring glông Krông Ana pơdah pran jua:

“Ƀing gơmơi mơ-ak biă lơm rai pơ̆ anai amra bơkơtuai hrăm tui hăng hơdôm grŭp gơyut kơ hơdră atông čing hăng hmâo bruă pơhrăm lu hloh tơlơi găn rơgao mơ̆ng hơdôm grŭp gơyut ƀơi hơdôm bôh plơi pla pơkon rai jơnum ngui hrŏm".

Rơgao 3 tal pơphun, jơnum ngui bôh thâo čing hơgor hmâo laih lu tơlơi pơplih phrâo. Amăng anun, bruă pơjing kơčăo bruă hăng hơdôm hrơi pơkă rơđah dưi pok pơhai tañ anun hơdôm bôh anom hmâo lu mông pơhrăm, ruah mă hơdôm črăn pơdah. Kah hăng ƀơi plơi prong Buôn Ma Thuột, Anom pôr pơhing, Bôh thâo hăng Bơkơjăp drơi jăn hmâo pơphun laih Jơnum ngui tơlơi adôh suang mơnuih ƀôn sang kiăng ruah tơbiă hơdôm grŭp mơnuih thâo tơlơi đưm hăng hơdôm tơlơi adôh suang mơ-ak hloh ba nao pơplông jơnum ngui gưl tơring čar. Yă Phạm Thị Hải Bình, Kơ-iăng Khua Anom brơi thâo:

“Hơdôm črăn hơdră hmâo mă prong amăng tal jơnum ngui Tơlơi adôh suang mơnuih ƀôn sang amra gum hrŏm Jơnum ngui bôh thâo čing hơgor yua kơ tơring čar Dak Lak pơphun. Hăng ƀing gơmơi pơkă hlâo amra pơphun mlăm bơkơtuai bôh thâo adôh suang pioh čơkă mơ-ak hơdor glăi 120 thun hrơi pơdŏng tơring čar Dak Lak, 120 thun Buôn Ma Thuột pơjing hăng pơđĭ kyar, hơdor glăi 80 thun hrơi pơdŏng Khul ling tơhan mơnuih ƀôn sang dêh čar Việt Nam, amăng hơdôm bruă mă čơkă mơ-ak hơdor glăi 120 thun hrơi pơdŏng tơring čar”.

Tui hăng ơi Lại Đức Đại, Kơ-iăng Khua Gơnong bruă bôh thâo, bơkơjăp drơi jăn hăng tuai čuă ngui tơring čar Dak Lak, anô̆ phrâo mơ̆ng Jơnum ngui thun anai lĕ bruă pok prong anih anom pơphun. Pơ ala kơ pơphun hơbit ƀơi Anom bôh thâo tơring čar lĕ hơdôm bôh anom pơpha pơdah ƀơi 2 bôh ƀuôn pơđĭ kyar kơtang gah tuai čuă ngui. Mơ̆ng anun, pơjing rah anih anom gơnam tuai čuă lăng pioh kơ tuai tal pơdơi lơphet hrơi pơjing lŏn ia, hrŏm hăng anun djru brơi kơ bruă pơdah mơ̆ng hơdôm bôh anom dưi lar hyu prong hloh.

“Thun anai pơphun ƀơi 2 anih anom tuai čuă ngui mơ̆ amăng tal pơdơi lơphet lơ 2/9 hmâo lu tuai hyu čuă ngui, anun lĕ Buôn tuai čuă ngui Akŏ Dhông hăng kual tuai čuă ngui plơi pla Kŏ Tam. Jơnum ngui pơphun ƀu kơnong kơ tal lăi pơthâo nao rai tơlơi găn rơgao, pơdah bôh thâo, pran jua pơtô glăi anô̆ yôm phiăn juăt mơ̆ng bôh thâo čing hơgor ôh mơ̆ dô̆ jing tal pioh tơring čar Dak Lak lăi pơthâo, lăi pơhưč bôh thâo čing hơgor kơ mơnuih ƀôn sang, tuai čuă ngui amăng dêh čar pô hăng dêh car tač rơngiao”.

Giăm hmâo 30 jơlan hơdră pơdah yua kơ hơdôm grŭp pơjing hăng pơdah, hăng lu bôh yôm pơdah gru grua bôh thâo đưm, phiăn juăt hăng er adôh suang đưm phara, jơnum ngui hmâo djru pơpŭ nua yôm bôh thâo đưm klă hiam mơ̆ng djop djuai ania glăk dô̆ hơdip mơda ƀơi Dak Lak. Hrŏm hăng anun, djru lăi pơhưč bôh thâo đưm, tuai čuă ngui mơ̆ng tơring čar truh hăng mơnuih ƀôn sang hăng tuai čuă ngui, pơjing dong anih anom găn rơgao amăng hơdôm hrơi pơdơi lơphet Hrơi pơdŏng pơjing lŏn ia ƀơi tơring čar amăng thun anai./.