VOV4.Jarai - Bôh get, bôh plôi pla lu amăng đang hmua mơng abih bang djop djuai ania glăk dô̆ hơdip mơda ƀơi čư̆ siăng Trường Sơn – Dăp Kơdư. Ƀu djơ̆ kơnong kơ gơnam ƀong rim hrơi đô̆č ôh mơ̆, bôh get krô dô̆ dưi yua pơkra jing gông brô̆ pioh yua amăng tơlơi hơdip rim hrơi. Yua anun, tơdah lăi djơ̆ mơn, bôh get krô jing gơnam tŭ yua biă pioh pơjing rai gru hiam pha ra mơng bôh thâo đưm djop djuai ania ƀơi Dăp Kơdư.

Amăng bôh thâo tơnă hơbai, bôh plôi, bôh hơdă dưi yua pioh pơkra gơnam ƀong jơman biă, lăng hiam dong. Hơdôm bôh plôi prong dưi hmâo arăng khuer hĭ pơjeh ñu amăng lăm laih anun dưm nao añăm mơnong, akan pioh hơtuk. Bôh plôi prong jing gơnam ƀong laih anun jing gơnam pioh dưm añăm ƀong dong lăng hiam biă pioh pơdă gơnam ƀong hmâo pơkra giong. Anô̆ jơman, ia kơñĭ, pơjing rup mơng bôh plôi ba glăi jơman hloh lom ƀong ñu, ngă pơhưč kơ gơnam ƀong đưm amăng hơdôm mông ngă yang jơnum ngui.

Bôh get dưi pơkra jing gông pĕ

Truh bơyan phun pla bluh bơnga hơdai bôh lu, sang anô̆ ƀong ƀu abih anun pơpha hyu kơ pô pơkon. Mơnuih găn nao rai ƀơi jơlan, ƀuh đang plôi hmâo lu bôh thơ rơkâo pô đang pĕ sa dua bôh plôi ba glăi. Tơdah pô đang rơkut thơ ăt pĕ mơn samơ̆ khom ngă gru lăi pơthâo kơ pô đang thâo lĕ ƀu  pĕ dop ôh, hăng hơdră amuñ amĕ lĕ pioh glăi hơdôm bôh kơtor, trong... Lom ƀuh tơlơi anai, pô đang pơmin lĕ, anai lĕ mơnuih juăt pĕ pioh ƀong, ƀu djơ̆ pĕ dop pioh sĭ ôh anun mơ-ak amăng pran jua, prăp ñai brơi.

Ngă đang hmua juăt ñu hmâo hrom sa guai. Đang hmua hrom sa guai, dua bơnah pô đang pơkă lĕ: Bôh get, bôh plôi sang anai hrung nao gah kơdih, bluh bơnga hơdai bôh thơ pô đang gah kơdih pĕ yơh pioh ƀong, ƀu kiăng rơkâo ôh. Pô đang dua bơnah ăt pơpha nao rai mơn hơdôm bơnga bôh troh dưi pla amăng sa bơyan. Gơñu amra brơi nao rai hăng lu hơdră: dưm amăng rêu ba nao brơi ƀơi sang, pĕ brơi ƀơi đang ƀudah rŏng pĕ mă pô hmâo dua tlâo bôh ƀơi đang lom pô đang ƀu hmâo pơ̆ đang anun.

Amăng 2 djuai bôh lĕ bôh get hmâo lu bôh tŭ yua hloh. Neh wa pĕ bôh get ba glăi ngă gơnam ƀong, bôh ñu klă lĕ pioh lui truh tha, krô anun kah mơng pĕ ba glăi rak lui, pơkra jing hơdôm gơnam mă yua amăng tơlơi hơdip rim hrơi mơng ană mơnuih. Arăng mă đuăi pơjeh pruăi ñu abih ba nao čơhmu krô ƀơi pra apui kiăng răk lui hăng kiăng bôh get jŭ dơnar uai apui.

Bôh get krô lĕ kông ngăn tŭ yua biă, ñu pơjing rai gru hiam mơng bôh thâo đưm kơ ană mơnuih. Rơngiao kơ bruă yua pioh dưm ia, bôh get dô̆ dưi pơkra pơjing gơnam yua pơkon dong hăng rim sang anô̆. Bôh get krô anet hiam ngă gơnam ngui kơ čơđai muai, ngă mong huă asơi, dưm bur mơxăm. Bôh get prong yua dưm asơi nao pơ̆ đang hmua, dưm braih. Bôh get hmâo kă tom sa bôh kông pơsơi ƀudah hăng ia kông ƀơi tơkuai get juăt yua dưm braih ngă yang pơdai.

Bôh get krô dưm ia amăng phiăn ngă yang jơnum ngui đưm

Hăng djuai bôh get dô, trơ̆i hĭ sa črăn ngă anô̆ prô braih. Bôh get tha, kơđuh ñu kơpal, hmâo axen nao pông dian amăng lăm pioh dưm hot djup; bôh get hmâo arăng khuer hĭ amăng mlăm hăng hơdôm bôh amăng kiăng hmâo hyuh yua pioh rông čim kah hăng pông mơnŭ, dưm gơnam pioh wah akan. Djuai ania Êđê trơ̆i jing dua bôh get, ƀing đah kơmơi djă kơđuh bôh get suang, pơjing drai ia rô rơnang mut amăng čeh tơpai pioh jak iâu tuai mơñum tơpai.

Hăng neh wa, bôh get jing gơnam yua dưm gơnam hăng dưm ia yua djơ̆ biă. Hrơi hơpă, đah kơmơi leng kơ hmâo hơdôm wot nao sŏ ia, prôk mơng mơguah hlâo kơ nao mă bruă ƀudah čơtlăm mơmot tơdơi kơ glăi mơng đang hmua. Ƀing adơi amai, ƀing amĭ djă bôh get mut ƀơi tông ia rô tơbiă mơng hơdôm đing ia pơkra hăng kram ƀơi pin ia hăng pioh amăng rêu gui glăi pơ̆ sang.

Djơ̆ mơng lăi, bôh get jing gơnam dưi hmâo neh wa pơčeh pơkra lu mơta gơnam mă yua amăng sang anô̆, jing gơnam brơi mơng ơi adai kơ ană mơnuih kual čư̆ siăng. Bôh get ñu hmâo gru hiam hơđăp mơng ñu ôh mơ̆, ñu dô̆ dưi pơkra kơjăp, kă nao hrĕ bơnal kiăng ñu hiam hloh. Anun lĕ hơdôm bôh get kă hăng hrĕ huai ƀudah dưm amăng kơdung huai, bôh get dưi trel bơnga pơhrô̆p đĭ hiam biă.

Amăng hơdôm jua er adôh, er adôh čư̆ siăng ƀu dưi lui ôh bôh get. Bôh get jing gơnam phun pioh pơkra gông brô̆ pha ra mơng lu djuai ania. Drơi bôh get kĕ nao hrom rim gơnam yua pĕ atông jing anih tô nao rai jua mơñi hăng jua adôh suang.

Bôh get dô̆ pơjing rai tơlơi pơtưh, tơlơi adôh, ngă pơhrô̆p đĭ bôh pia, tơlơi pơhiăp bôh pơhiăp mơng neh wa. Bơ̆ amăng tơlơi akhan đưm, djuai bôh anai jing gru lăi nao pran jua gum hrom hơbit kơplah wah djop djuai ania adơi ayong dong./.

Siu H’ Prăk: Pô pơblang