VOV4.Jarai-Tơdơi kơ 3 wơ̆t hrơi tơjuh mă bruă, yap truh lơ 30/7, Sang ia jrao tơhan ngă jăng jai mrô 3 ƀôn prong HCM, pơdong ƀơi plơi phrâo Bình Khánh gah phường An Khánh, plơi prong Thủ Đức hơmâo jơnum brơi 1.800 čô mơnuih duăm ƀă kman Covid 19 suaih laih glăi pơ sang anŏ.

Ơi ia jrao chuyên khoa 2, Lý Quốc Công, Khua anom pơjrao duăm blung a, Sang ia jrao tơhan jăng jai mrô 3 brơi thâo, ră anai, hơmâo 20 čô mơnuih duăm kraih, khom suă pran hăng oxy. Ƀing ơi ia jrao hlăk pơjrao tong ten biă mă, sit kraih hloh brơi ba nao pơ sang ia jrao prong hloh.

Abih bang bruă tŭ jum, pơkă lăng mơnuih ƀă klin duăm ruă, ngă djơ̆ hơdră pơtô mơ̆ng Ding jum ia jrao. Ƀơi ƀôn prong HCM, rĭm hrơi ăt hơmâo laih hơdôm rơbâo čô mơnuih pơjrao suaih. Tui hăng Anom bruă pel ĕp tơlơi duăm ruă ƀôn prong HCM, amăng lơ 29/7, hơmâo dơ̆ng 3.131 čô mơnuih suaih hăng tơbiă mơ̆ng sang ia jrao, pơđĭ tui mrô mơnuih ƀă klin dưi pơjrao suaih laih truh kơ 28 rơbâo 320 čô.

Nay Jek: Pơblang