VOV4.Jarai -  Čơtlăm lơ 1/10, amăng mông jơnum hăng mơnuih mă tơlơi pơhing phrâo mơng Grŭp črâo bruă pơgang pơgăn klin Covid-19 ƀôn prong Hồ Chí Minh, Kông ang ƀôn prong brơi thâo, hmâo pơsir laih năng ai ñu 1.300 čô mơnuih ƀôn sang dưi glăi pơ̆ plơi pla pô amăng mơguah lơ 1/10. Ƀơi anăp tơlơi mơnuih ƀôn sang rŭi nao pơ̆ hơdôm anih dô̆ gak ƀơi bah amăng mut tơbiă ƀôn prong, khul kông ang hmâo gum hrom hăng hơdôm gơnong bruă khul grŭp pôr amăng loa lăi pơhing, pơsur mơnuih ƀôn sang pơwot glăi hăng ngă tui 5 mơta bruă pơgang klin pơhlôm tơlơi rơkâo mơng bruă ia jrao. Tơdơi kơ pơsur, mơnuih ƀôn sang čang rơmang dưi glăi pơ̆ plơi pla anun Kông ang ƀôn prong hmâo gum hrom hăng Gơnong bruă jơlan nao rai dŭ pơgiăng, Gơnong bruă ia jrao, Ƀirô pơtrun bruă tơhan ƀôn prong kiăng pơpha hơdôm grŭp tui rim kual pha ra, pơpha hră lăi pơthâo kơ pô. Lom hmâo djop tơlơi pơhing lăi pô hăng bơkơtuai hăng hơdôm gơnong bruă dưm dăp rơdêh pơgiăng mơnuih hăng rơdêh, kông ang ƀôn prong ba jơlan kơ mơnuih ƀôn sang glăi pơ̆ plơi pô kơ kông ang anih anom glăi čơkă. Dưi thâo, amăng tal klin ngă phrâo rơgao, ƀôn prong Hồ Chí Minh hmâo gum hrom hăng hơdôm anih anom kiăng ba rơbêh kơ 37.000 čô mơnuih ƀôn sang glăi pơ̆ plơi./.

Siu H’ Prăk: Pô pơblang