Pơhmư̆ hơdôm tơlơi kah pơpha, tơlơi kiăng khăp mơ̆ng ayong amai adơi kông ñơn, Khua git gai Ping gah, Khua mir sir ơi Tô Lâm ol kơdol biă yua ƀuh lu mơnuih rơgơi mơbruă yom biă mă, ƀuh anŏ hiam mơ̆ng ƀing kông ñơn Việt Nam hrơi anai: triang, gir kơtir, hơdip thâo gơgrong, thâo khăp ƀu-eng kơ sang anŏ, jê̆ giăm hăng ƀing gŏp mă bruă, hăng anom bơwih ƀong, hăng Khul mơnuih mă bruă mut phung laih anun hăng lŏn ia. Khua git gai Ping gah, Khua mir sir pơsit, Ping gah hăng Kơnuk kơna leng pơsit, kông ñơn jing khul yom biă mă amăng bruă man pơdong hăng pơgang Lŏn ia.

Amăng djŏp thun blan ngă hơkrŭ, kông ñơn Việt Nam leng kơ nao pơ anih tơnap tap, ƀơi anih pơkra jơlan, sang măi, amăng anih pơkra pơjing gơnam, bơwih bơwang, pơdŭ pơgiăng, boh thâo ia rơgơi, pơčeh phrâo, pơkra măi mok. Tơngan, akŏ dlô, ia hâ̆o ia hang hăng tơlơi pơčeh phrâo mơ̆ng ayong amai adơi djru đĭ kyar lŏn ia ta tui hăng rơnuk anai. Khua git gai Ping gah, Khua mir sir ơi Tô Lâm, kiăng lăng bruă lăng ba tơlơi hơdip ƀing kông ñơn, mơnuih mă bruă jing sa bruă kơđi čar yom biă mă, hơmâo ngă re se laih anun sui thun yun blan. Ƀôn prong kiăng lăng glăi rơđah hloh kơ tơlơi rơkâo tơlơi kiăng sang dŏ djru mơnuih tơnap, sang dŏ ƀing kông ñơn, sang hră, sang wai čơđai, sang ia jrao, sang gru grua, anih jơnum mơnuih tơpuôl ƀơi hơdôm kual sang măi, sang pơkra gơnam hăng hơdôm anih hơmâo lu kông ñơn dŏ hơdip mơda. Khŏm ngă hiư̆m pă kiăng kông ñơn ƀu kơnong hơmâo bruă mă đôč ôh, ăt hơmâo anih dŏ hơđong; ƀu kơnong hơmâo prăk blan đôč ôh, ăt kiăng hơmâo pơdơi pơdă, hrăm hră, ngui ngor, hơdip jơnap hloh./.