Amăng sang pơkra gơnam mơ̆ng Kông ti pơčruh ngăn Thép Asean (pơsơi, kuăt) (kual sang măi pơkra gơnam Hòa Phú, tơring čar Dak Lăk), ayong Lê Trung Hiếu hrom hăng 3 grup dŏ khut khut pơkra pơsơi. Hlâo adih, kiăng gư̆ măi, pơkra gơnam khŏm kiăng mơ̆ng 5-7 čô kông ñơn, samơ̆ tơdơi kơ ayong Lê Trung Hiếu pơkra đing bluh oxy kơdah mă hơjăn kơ măi pơkra pơsơi, bruă pơkra gơnam kiăng 4 čô đôč:  “Bruă pơkra đing bluh angin oxy jing ngă mă hăng tơngan đôč, kông ñơn dŏ jê̆ đam apui čuh pơsơi kah mơ̆ng dưi, hlă đing bluh oxy amăng anih čuh pơsơi, hŭi biă mă, yua apui pơ-iă kơtang kơtit, eh pơsơi lik amuñ kơdah djơ̆ drơi biă mă. Mơ̆ng anun yơh kâo pơmin pơkra rai đing bluh angin mă yua măi pơkĕ apui lơtrik, gư̆ mơ̆ng ataih đôč. Pơkra giong, adơi ayong dưi dŏ ataih ƀiă mơ̆ng anih čuh pơsơi, tui anun mă bruă tŭ yua laih anun huăi hŭi rơhyưt lơi”.

Kông ti pơčruh ngăn Thép Asean ră anai hơmâo 340 čô mơnuih amăng khul, jơnum ƀơi 2 grup. Tui hăng ơi Nguyễn Hữu Thống, Khul Khul mut phung kông ti, amăng bruă pơkra pơsơi pơsă, tơlơi pơčeh măi mok phrâo djru plai ƀiă rơngiă prăk, ngă bruă hai klă, tañ hloh mơn. Anom bơwih ƀong leng kơ pơtrut mơnuih mă bruă pơčeh phrâo, dưi pơhno. Mơ̆ng anun, lu kĭ sư jing mơnuih kơhnâo, kông ñơn hơmâo lu tơlơi pơčeh phrâo tŭ yua biă; hơjăn ayong Lê Trung Hiếu hơmâo 3 tơlơi pơčeh phrâo hmư̆ hing anun lĕ pơkra glăi đing pơđoh ia amăng không pơkra pơsơi plai ƀiă huač apui lơtrik, pơkra su ƀop pơkĕ apui lơtrik laih anun pơkra klă tui anŏ dưm đing oxy, laih dong glăk kơsem min pơkra apui pơčrang. Ơi Thống brơi thâo: “Hơdôm tơlơi pơčeh mơ̆ng ayong Hiếu djru rơgêh ƀiă prăk pơkra gơnam, pơđĭ tui anŏ klă gơnam pơkra rai, pơtrut tơlơi pơmin thâo pơčeh phrâo, djru anom bơwih ƀong đĭ kyar kjăp”.

Lơ̆m ayong Lê Trung Hiếu hor kơ bruă, pơčeh phrâo amăng sang măi, jing amai H’Chuyên Niê, hăng bruă kuah kơtăk kơsu, ăt hơmâo tơlơi gum djru yom biă ƀơi đang kơsu. Jing kông ñơn Nôn trường cao su Phú Xuân, hơmâo 10 thun ngă bruă, amai H’Chuyên leng kơ ngă truh kih djŏp bruă hơmâo jao. Ñu leng kơ ngă bruă lu hloh 20% pơhmu hăng hơnong pơkă abih bang. Amai H’Chuyên lăi: “Ta khŏm gir yơh, prôk tơgŭ mơ̆ng mơguah, nao tañ ƀudah glăi kaih hloh kơ arăng. Lơ̆m kuah kơtăk khŏm djom, tong ten, anăm ngă hăt he ôh hŭi kơtăk kơsu hok hĭ gah rơngiao. Thong, mơnek kuah kơsu ta asah rim hrơi mơtăm yơh, jơlŭ pơđŭ kơtăk, gai kăl ƀudah hrĕ akă khŏm djă ba djŏp”.

Tơring čar Dak Lăk ră anai hơmâo giăm 62 rơbâo čô mơnuih mă bruă mut khul, jơnum ƀơi rơbêh 1.350 Khul. Hơdôm thun rơgao, bruă bơkơtưn pơkra gơnam hơmâo pok pơhai dlăm, pơhưč lu mơnuih amăng khul gum ngă, mơ̆ng anun hơmâo hơdôm rơbâo tơlơi pơčeh rơgơi, pơkra măi phrâo, djru bruă pơkra gơnam, sĭ mơdrô tŭ yua hloh. Kiăng pơtrut pran jua pơplih phrâo,  Khul mơnuih mă bruă tơring čar Dak Lăk juăt pơpŭ, apah bơni na nao, laih anun djru ngă hơmâo lu hloh mơnuih rơgơi mơbruă. Ơi Nguyễn Phú Lập – Kơ-iăng khua Khul mă bruă tơring čar Dak Lăk brơi thâo: “Thun anai, hăng jơlan hơdră ngă bruă pơčeh phrâo, Khul mơnuih mă bruă tơring čar pok pơhai akŏ bruă hăng hră git gai, mơ-it kơ khul mut phung mơnuih mă bruă đah mơ̆ng apah bơni, pơsur mơnuih mă bruă kiăng gir hloh, ƀơ ƀrư̆ akŏ pơdong plơi pla jai hrơi đĭ kyar. Amăng blan kông ñơn, gơmơi ngă hrŏm hăng Gơnong bruă čar tơring čar gum pơphun “Hrơi mơak Kông ñơn” ƀơi Kual sang măi Hoà Hiệp (phường Hoà Hiệp) amăng lơ 5/5 hăng rơbêh 3.000 čô mơnuih gum ngă. Čang rơmang thun anai amra hơmâo lu tơlơi gum djru lu hloh kơ mơnuih mă bruă”.

Amăng rơnuk pơplih phrâo, mă yua boh thâo mrô, ƀing kông ñơn kah hăng Lê Trung Hiếu hăng amai H’Chuyên Niê glăk pơsit anŏ yom hăng pran jua pơčeh phrâo laih anun gơgrong biă amăng bruă mă. Mơ̆ng sang măi pơkra pơsơi truh pơ anih pơkra kơsu, hơdôm tơlơi pơčeh phrâo hăng tơlơi gir run mơ̆ng ƀing gơñu djru pơđĭ tui boh tŭ yua pơkra gơnam hăng dưi kiăo tui tơlơi kiăng amăng rơnuk phrâo./.