Lơ 11/3/1945, tal tơgŭ hơkrŭ Ba Tơ truh kih. Lơ 12/3/1945, grup tơhan blah hơdeč Ba Tơ hơmâo akŏ pơjing hăng tơlơi ƀuăn: “Tuh drah pơčah asar brơi lŏn ia”. “Apui bơngač Ba Tơ” hơmâo bang hyu djop kual Tong krah. Grup tơhan blah hơdeč Vũ Hùng (Quảng Ngãi), grup tơhan mơnuih ƀôn sang Diêu Trì (Bình Định), grup tơhan wai pơgang mă Tuy Hoà (Phú Yên), grup tơhan wai pơgang kông ñơn Hòn Khói (Khánh Hòa) hăng grup tơhan blah ngă mơng ƀing kông ñơn ngă hmua Ca-da ƀơi Dak Lak ….hơmâo tŏ tui akŏ pơjing.

Mơng hơdôm grup anun, ling tơhan kual 5 hơmâo akŏ pơjing, djă ba gru grua sông kơtang, khin hơtai, kjăp pran yak đĭ. Tơhan sông kơtang, Trung tướng Nguyễn Trung Thu, Kơ-iăng khua pơphô bruă ling tơhan Việt Nam hơđăp, Khua git gai tơhan kual 5 hơđăp hơdor glăi thun blan blah ayăt Mi:

“Ƀing apăn bruă, ling tơhan kual 5 hơmâo sa tơlơi pơmĭn hăng pran jua ƀu hŭi ayăt Mi, gir kơdong glăi ayăt Mi hăng blah brơi dưi. Khul Ping gah tơhan kual 5 hăng anom bruă git gai tơhan kual 5 pơphun “Jơlan ter blah ayăt Mi”. Anai lĕ sa jơlan gah pơčeh phrâo, lăp djơ̆ hăng tơlơi sit nik. Pơ hơpă hơmâo ayăt Mi pơ anun hơmâo “Jơlan ter blah ayăt Mi”. Ƀing ta pơphun brơi tơhan guang dar, blah gơñăm tơpă nao puih kơđông tơhan ayăt”.

Tơdơi kơ lŏn ia ta pơlir jing sa, ling tơhan kual 5 hrŏm hăng Ping gah, abih bang mơnuih ƀôn sang hăng djop khul ling tơhan đing nao rŭ pơdong glăi anŏ răm rai yua blah ngă, hyu klơi toh hĭ boh ƀom boh mĭn, ƀơƀrư̆ ngă hơđong tơlơi hơdip mơnuih ƀôn sang. Tui tơlơi sit nik, ngă tui bruă jao tơhan blah ngă, tơhan ngă bruă, tơhan bơwih ƀong ngă đang hmua, ling tơhan kual 5 tŏ tui hơmâo lu tơlơi dưi amăng bruă pơjing ling tơhan ngă hơkrŭ, kjăp bruă, ƀơƀrư̆ pơplih phrâo, yak tui tlôn, tŏ tui gru grua hăng gru hơdip hiam klă mơng “Ling tơhan rơnuk wa Hô”, pơgôp hrŏm hăng ling tơhan, mơnuih ƀôn sang đơ đam dêh čar pơjing hăng wai pơgang lŏn ia Việt Nam xã hội chủ nghĩa. Trung tướng Lê Ngọc Hải, khua anom bruă git gai tơhan kual 5 pơsit tong:

“Ling tơhan kual 5 ƀu pơdơi prong kơtang djop mơta, hơmâo gơgrong hruă kjăp tơlơi pơmĭn mơng Ping gah, mơng Kơnuk kơna. Ping gah ling tơhan gơnong glông, Ding jum ling tơhan, gơgrong kiăo tui tơlơi sit nik, gum hrŏm gưl Ping gah, gong gai ƀon lan pơphun pok pơhai ngă tui bruă jao wai pơgang amăng kual ling tơhan pơdong. Bruă wai pơgang amăng abih bang hơmâo pơlir hăng wai pơgang amăng mơnuih ƀôn sang, bruă wai pơgang guai lŏn ia jai hrơi kjăp tui. Bruă pơtop hrăm, pran kjăp amăng blah ngă, pơjing tơhan kjăp ngă tui djơ̆ tơlơi pơkă”.

Pơ hơpă mơnuih ƀôn sang tơnap, pơ anun hơmâo ling tơhan. Ƀing apăn bruă, ling tơhan kual 5 lêng jing tơhan ba jơlan hlâo nao pơ kual ia ling dăo, kual hŭi rơhyưt. Mah lŏn tơhroh ƀơi hơdôm kual čư̆ siăng Đà Nẵng, Quảng Ngãi ƀudah ia dăo ƀơi hơdôm boh tơring čar Gia Lai, Dak Lak, Khánh Hòa, ling tơhan lêng kơ hmao tlôn ƀuh ƀô̆ mơta hăng mah mơmŏt mlăm ăt djru brơi. Ƀơi anih kơthel pưh nao, anih ia dăo kơtang, ƀing apăn bruă, ling tơhan găn rơgao tơnap tap djru brơi mơnuih ƀôn sang, djru mơnuih ƀôn sang pơhlôm pơgang, rŭ pơgong glăi anŏ răm rai yua ia dăo, pơgang klin kman hăng tañ ngă hơđong tơlơi hơdip mơda. Ƀing apăn bruă hăng mơnuih ƀôn sang hơdôm boh tơring čar ter hang ia rơsĭ kual Tong krah lăi nao tơlơi glăm ba hăng pran khăp pap mơng ling tơhan kual 5 tui anai:

“Ƀing apăn bruă, ling tơhan lêng kơ hur har djru brơi abih pran kơ sang anŏ gơmơi. Kâo ƀuh ol kơdol biă mă, bơni kơ ƀing ƀô̆ đô̆i biă mă”.

Rơbêh 80 thun rơgao, tơlơi ƀuăn “Pơsăn drơi yua kơ lŏn ia” mơng tơhan blah hơdeč Ba Tơ lơm anun tŏ tui ngă bang bơngač, jao glăi, dŏ na nao amăng pran jua djop rơnuk mơnuih apăn bruă hăng ling tơhan kual 5./.