VOV4.Jarai - Tui hăng Gơnong bruă ia jrao ƀôn prong Hồ Chí Minh, amăng hơdôm hrơi  laih rơgao lu tơring čar, ƀôn prong rơkâo djru brơi mơnuih ƀon sang glăk dŏ hơdip pơ ƀôn prong Hồ Chí Minh dưi pơwŏt glăi pơ plơi pla. Kiăng kơ ngă gêh gal brơi mơnuih ƀon sang glăi pơ plơi pla rơnuk rơnua, Gơnong bruă ia jrao jao Anom bruă wai pơgang klin ƀôn prong Hồ Chí Minh kah pha jrao pioh pơčrang klin kman brơi anom bruă ia jrao kuận, tơring glông hăng plơi prong Thủ Đức kiăng kơ pơčrang brơi mơnuih ƀon sang kiăng glăi pơ plơi pla.

Mơnuih ƀon sang ƀơi ƀôn prong Hồ Chí Minh amra pơčrang brơi klin hlâo kơ glăi pơ plơi pla

Gơnong bruă ia jrao ăt rơkâo Jơnum min mơnuih ƀon sang tơring čar djop tơring čar, ƀôn prong mơ-it Jơnum min mơnuih ƀon sang hơdôm kuận, tơring glông hăng plơi prong Thủ Đức anăn ƀing mơnuih rơkâo glăi pơ plơi pla kiăng kơ pơƀut mơnuih ƀơi hơdôm kuận, tơring glông dưi pơphun pơčrang lăng. Gơnong bruă ia jrao ƀôn prong Hồ Chí Minh ăt rơkâo Jơnum min mơnuih ƀon sang hơdôm kuận, tơring glông, plơi prong Thủ Đức gum hrŏm hăng anom bruă ia jrao hơdôm kuận, tơring glông pơčrang brơi tañ kơ mơnuih ƀon sang hŭi kơ ƀă virus Sars-Cov2 hăng djru brơi gah bruă ia jrao tui tơlơi pơkă. Hăng ƀing mơnuih ƀă klin kiăng ba nao pơjrao hĭ mơtăm.

Siu Đoan: Pơblang