Krăp lăng bruă ngă hmua ƀơi anih ngă lăng hlâo, lu mơnuih ngă hmua, ƀing khua pơtrut pơsur ngă hmua hơdôm boh tơring čar ƀơi Dap Kơdư lăp hơdor biă hăng bruă wai lăng đang hmua tui jơlan tum pơƀut abih bang. Mơ̆ng wai lăng mơnong hiam rông phun pla, pruih ia truh kơ bruă pơgang hlăt kman leng kơ hơmâo ngă dưm kơnar soh, hơmâo măi mok rơgơi djru brơi, hơmâo boh thâo mrô hăng măi pơkă lăng hlâo ayuh hyiăng.

Ơi Nguyễn Văn Một, sa čô mơnuih pla sâu riêng bơi să Quảng Phú, tơring čar Dak Lăk brơi thâo, tơlơi ngă kơ ñu lăng djơ̆ biă mă lĕ hơbô̆ bruă anai ƀu ba pơƀuh boh thâo ia rơgơi phara hơjăn ôh, arăng pơƀuh mơ̆ng akŏ truh pơ tlôn mơtăm. Mơnuih ngă hmua dưi lăng ƀuh ƀơi anăp anŏ tŭ yua klă hiam ƀơi đang hmua či hrăm hăng hla tui: “Hơdôm thun laih  ƀing ta pơjing rai boh hiam biă, ƀing mơdrô ƀu thâo anŏ či lăi dong tah, leng kơ tŭ ư soh, ia jrao lĕ ta wai lăng mă yua djơ̆ hrơi blan ñu. Ta nao hrăm thim mơ̆ng arăng dong đah mơ̆ng ngă klă hloh. Ƀuh tui anun jing mơak biă yơh, ta thâo tui lu ƀiă tơlơi rơgơi ngă hmua”.

Amăng hrơi mông bruă pla sâu riêng hăng kơphê Dap Kơdư glăk dong ƀơi anăp lu tơlơi lông lăng kah hăng adai pơplih phara, hlăt kman jai lu laih anun tơlơi pơkă tơnap tui mơ̆ng anih blơi gơnam, bruă hơmâo anih ngă lăng hlâo nao hrŏm jao glăi pơtô brơi boh thâo ia rơgơi jing jơlan ngă bruă kiăng yom biă.

Nai prin tha Phan Việt Hà, Kơ-iăng khua Sang bruă kơsem min ngă hmua pla kyâo kual Dap Kơdư brơi thâo, hơbô̆ bruă ngă lăng hlâo hơmâo kiăo tui jơlan ngă klă djŏp bruă pơkra pơjing gơnam mơtăm, lui hĭ pơƀut amăng rim bruă phara hơjăn. Phun ñu lĕ wai lăng anŏ kjăp, añrăng mơ̆ng phun pla, mă yua ia klă, pơgang ba mơnŏng hiam ngă hyôk lŏn, wai lăng ia jrao dŏ tlep ƀơi gơnam laih anun mă yua boh thâo mrô amăng bruă wai lăng pơkra gơnam.

Tuč rơnuč ñu lĕ ƀu kơnong pơđĭ tui anŏ klă, phun pla mơboh lu đôč ôh, ăt djru neh met wa plai ƀiă huač prăk, phun pla dưi hơdip hiam lơ̆m adai ƀu lăp laih anun djơ̆ hăng hơdôm rơnoh pơkă ba sĭ pơ čar rơngiao jai hrơi tơnap tui. Tui hăng Nai prin tha Phan Việt Hà, anai jing hơdôm tơlơi dưi pơsit bruă pơkra sâu riêng hăng kơphê đĭ kyar hơđong sui thun yun blan: “Hơdôm đang hmua mơ̆ gơmơi mă yua lu boh thâo ia rơgơi, gơmơi hơmâo laih sa jơlan gah ngă bruă pơtô brơi ngă sâu riêng kjăp. Anai jing hơbô̆ bruă mơ̆ ƀing gơmơi kiăng pơtruh ngă hrŏm 4 boh anom bruă. Amăng hơbô̆ bruă anai, gơmơi kiăng pơtruh abih bang boh thâo ia rơgơi mơ̆ng hơdôm anom bruă phara”.

Sa tơlơi lăp đing nao mơ̆ng hơbô̆ bruă anai lĕ hơmâo lu bơnah mut hrŏm, mơng anom bruă wai lăng kơnuk kơna, anom bruă kơsem min boh thâo ia rơgơi truh kơ anom bruă pơtrut pơsur ngă hmua hăng hơdôm anom bruă djru pơkra gơnam. Bruă pơtruh nao rai anai čang rơmang amra rơngiă aset ƀiă mông kơsem min hăng ngă tui sit nik.

Ơi Lê Quốc Thanh, Khua anom bruă pơtrut pơsur ngă hmua dêh čar pơsit, sa hơbô̆ bruă mah klă dơ̆ pă tŭ mơn ăt dưi pơtrut rơnoh yom lơ̆m hơmâo ba pơƀuh, jao glăi ia rơgơi anun ƀơi djŏp anih, laih anun hơmâo mơnuih ƀôn sang hmư̆, hla tui.

Tui hăng ơi Thanh, anom bruă pơtrut pơsur ngă hmua amra pơtruh anom bruă boh thâo ia rơgơi hăng mơnuih ƀôn sang, djru brơi hơdôm tơlơi rơgơi phrâo hơmâo ba hyu djŏp anih tañ hloh, kiăo tui hơdôm tal pơtŏp hrăm, ba pơdah, laih anun pơtô brơi sit nik ƀơi plơi pla. Lơ̆m hơdôm bơnah gum ngă hrŏm kjăp, hơdôm hơbô̆ bruă ngă hmua hơđong dưi pok prong, ba glăi boh tŭ yua sit nik kơ mơnuih ngă hmua pơkra gơnam: “Kiăng pơhlom abih bang tơlơi pơkă jai hrơi tơnap mơ̆ng anih blơi gơnam, jing truh mông anai, mơnuih ngă hmua leng kơ dưi ĕp ƀuh laih jơlan pơsir. Gơmơi ăt čang rơmang neh met wa hrŏm hăng ƀing apăn bruă pơsur ngă hmua, ngă hiư̆m pă đah mơ̆ng kah pơpha tơlơi thâo thăi lu hloh mơ̆ng hơdôm hơbô̆ bruă ngă lăng hlâo mơ̆ ƀing gơmơi djă pioh, kơđiăng lui”./.