Kơnang kơ hơdôm bruă mă pơphun jơnum, hơduah ĕp bruă ngă hrŏm sĭ mơdrô amăng tal jơnum prong jak iâu tuh pơ alin tơring čar Dak Lak thun 2026 phrâo anai, rơbêh 150 rơbâo čơgăn pơdă gơnam sĭ mơdrô lăi pơthâo anăm gơnam phrâo mơ̆ng 80 boh sang bruă mơdrô, anom ngă hrŏm pơkra ming gơnam amăng tơring čar hăng gah rơngiao tơring čar, lăi pơthâo lu mơta gơnam sĭ mơdrô hmư̆ hing kah hăng kơphê, kakao, makka boh khuih (khôih đưm), tiu, ia hơdŏm mriă, jrao akha kyâo, gơnam pơkra ming pioh ƀong huă, gơnam pơhrôp hiam pơkra ming kyâo, hnăl hrŏm hăng lu mơta gơnam OCOP hăng tuh tia pơkra ming ƀơi kual plơi pla ba gru hlâo. Anai lĕ anŏ gêh găl pioh kơ djop sang pơkra ming gơnam sĭ mơdrô pôr pơthâo anăn gơnam sĭ mơdrô gơñu, ĕp mơnuih kĭ hră blơi sĭ glăi, pok prong anih anom sĭ mơdrô gơnam tam. Khua pơ ala sa boh sang bruă ngă hrŏm, ơi Nguyễn Duy Hùng brơi thâo, dưi hơmâo tơring čar ngă gêh găl brơi ba pơdă gơnam sĭ mơdrô ĕp mơnuih ngă hrŏm, hơmâo djru lu pô sang bruă gơnam OCOP dưi bưp ƀing či blơi hăng pô sang blơi ba hyu sĭ glăi lu hloh.

 “Jơnum pơdă gơnam sĭ mơdrô tal anai mơak klă biă mă. Lu pô sang bruă hơmâo gơnam OCOP lăng yom kơ bruă pơphun hăng pôr pơthâo. Biă mă ñu mông gêh găl pioh kơ tơring čar Dak Lak lăi pơthâo rơnoh pơkă hnơ̆ng man pơdong hăng tuh pơ alin hrơi blan anai hơmâo pơhưč lu tuai nao pơhmư̆, kiăng sem lăng, kah pơpha tơlơi thâo thăi tom găn rơgao amăng bruă mă laih anun ƀing gơmơi ăt dưi pôr pơthâo gơnam sĭ mơdrô lu hloh mơ̆n”.

Hrŏm hăng bruă pơtruh nao rai sĭ mơdrô tui gru grua đưm, tơring čar Dak Lak dŏ djru sang bruă mơdrô, anom ngă hrŏm ba yua boh thâo ia rơgơi mrô pioh pôr pơthâo hăng lăi brơi tuai blơi gơnam sĭ mơdrô mơ̆ng tơring čar. Lu wơ̆t pơphun pơdah thâo gơnam hăng sĭ mơdrô online, juăt lăi trực tuyến, pơdah ƀơi anăp lăng nao rai amăng phôn ƀudah tivi ăt hơmâo pơtruh brơi kơ tuai djop anih mơ̆ng ataih sem lăng hăng čih anăn rơkâo blơi gơnam sĭ mơdrô online anun. Kơnang kơ bruă pơdah thâo sĭ mơdrô online, ba yua ia rơgơi mrô, yă Lê Thị Hồng Thơm, pơ ala kơ sang bruă mơdrô pơkra gơnam pơhrôp anŏ hiam ƀô̆ mơta drơi jăn hăng jrao akha kyâo să Čư̆ Prao, tơring čar Dak Lak brơi thâo:

“Tal anai jơnum pơdă gơnam sĭ mơdrô pơblih yua ia rơgơi mrô blung a tơring čar Dak Lak ngă, tơdơi kơ pơmut tơring čar phrâo. Hrŏm hăng bruă ba gơnam sĭ mơdrô pơdă amăng anih jơnum sang čơ prong anai hơmâo hơdră sĭ mơdrô tui tơđar hăng lăi pơthâo lu kông ty, gah gơmơi kông ty ăt ngă hrŏm live stream, ba yau mrô mơ̆ng anom bruă pơphun brơi hăng sang bruă hơduah ĕp bruă sĭ mơdrô phun tơring čar djru. Tơlơi čang rơmang pôr pơthâo dưi hơmâo gơnam sĭ mơdrô mơ̆ng ta ngă tui hăng lu hơdră phara soh laih anun dưi jĕ giăm ƀing blơi kơnang lu atur ngă bruă phara hăng, hơdră či pơtruh brơi ăt phara mơ̆n”.

Tui hăng ơi Nguyễn Hải Triều, Kơ-iăng khua Gơnong bruă wai lăng tuh tia hăng sĭ mơdrô tơring čar Dak Lak, tơhnal pơkă mơ̆ng tơring čar ƀu dŏ glăi hnơ̆ng bruă pơkra ming gơnam brơi hiam klă đôč ôh, dŏ gum hrŏm sang bruă mơdrô, anom bruă ngă hrŏm laih anun mơnuih ngă hmua čih pơsit anăn gơnam sĭ mơdrô tŭ yua hiam, pơtruh hăng lu anih či blơi, pơphun brơi ĕp bơnah ngă hrŏm hăng pok prong anih anom sĭ mơdrô. Anai lĕ hơdôm jơlan hơdră yom biă mă kiăng pơđĭ tui rơnoh yom gơnam đang hmua, pơđĭ tui tơlơi pơhno gơnam sĭ mơdrô hăng pơhưč tuh pơ alin nao amăng bruă pơkra ming djơ̆ hơdră, pơhưč arăng blơi lu hloh gơnam boh troh mơ̆ng đang hmua ƀơi tơring čar.

“Tơlơi kiăng mơ̆ng tơring čar ră anai hăng djop sang bruă sĭ mơdrô ƀu kơnong bruă pơkra ming gơnam sĭ mơdrô tŭ yua hiam đôč ôh, dŏ pơphun brơi klă hloh, bruă mă pơtruh brơi anih pơkra hăng pô blơi, ba hyu sĭ mơdrô glăi kiăng pok pơhư prong anih anom sĭ mơdrô. Yua kơ anun, kơnang kơ tal pơdă gơnam sĭ mơdrô anai, tơring čar Dak Lak ăt čang rơmang lăi pơthâo lu mơta gơnam sĭ mơdrô, sem lăng boh tơhnal pơđĭ kyar amăng bruă tuh tia pơkra ming gơnam sĭ mơdrô mơ̆ng plơi pla amăng tơring čar. Laih dơ̆ng ngă gêh găl brơi pôr pơthâo, pơčrâo anăn gru gơnam pơkra tŭ yua hiam hơduah ĕp mơnuih blơi hăng kĭ hră ngă hrŏm sĭ mơdrô nao rai”.

Mơ̆ng hơdră djru pơđĭ tui boh tŭ yua hiam gơnam pơkra ming hăng sĭ mơdrô truh pơ anih pô blơi, ba yua ia rơgơi mrô hăng čih anăn gru sit nik, ngă hrŏm plah wah gong gai kơnuk kơna hăng sang bruă mơdrô djru pran jua kơ mơnuih ngă hmua, sang bruă ngă hrŏm hăng sang bruă mơdrô boh troh đang hmua amra hơđong nua hloh amăng plơi pla. Anai lĕ atur yom biă mă pioh kơ bruă ngă hmua tơring čar Dak Lak pơđĭ kyar tui anăp ngă phrâo, hơđong kơjăp hăng pơđĭ tui pran kơtang pơhno gơnam sĭ mơdrô amăng dêh čar ta pô hăng truh pơ jar kmar.