Jơnum min mơnuih ƀôn sang phường gah ngŏ Gia Nghĩa brơi thâo, phường anai akŏ pơjing khul mă bruă hơdeč hmar hăng pok pơhai lu hơdră pơgăn klin tui tơlơi phiăn pơkă. Laih sem lăng, hơmâo 40 drơi un, bui sang anŏ ơi Mai Thanh Sự ƀut plơi Đồng Tiến pơai buai, lui ƀong hlơ̆k, đung drah ƀơi klĭ hăng djai amah amol.

Laih hơmâo boh tơhnal pơčrang kman, gong gai kơnuk kơna phường brơi kăng pơgăn anih hơmâo klin, brơi čuh pơrai abih pŭ un, bui djơ̆ klin djơ̆ tơlơi phiăn hăng dưm čur kô̆, rơnăk rơgoh anih jum dar, pruih ia jrao pơdjai kman. Hrŏm hăng bruă pơgăn klin kheng lĕ, phường Đông  Gia Nghĩa krăp lăng tong ten hŭi ba hyu ung, bui, añăm mơnong pơ anih pơkŏn; pơtô lăi mơnuih ƀôn sang thâo hơdră pơhlom pơgang pŭ hlô mơnong rông, ƀu dưi pơdŭ pơgiăng hyu pơ anih pơkŏn, ƀudah sĭ mơdrô, čuh tă ôh jăng jai pŭ un, bui amăng  anih hơmâo klin.