Lu tơlơi pơgôp hiăp ƀơi mông jơnum lăi, pơpih mơtah mơda hăng ngă tui rơnoh pơkă ESG ră anai jing bruă khŏm ngă ƀơ̆i yơh, kiăng sang bruă mơdrô hơmâo na nao hră rơkâo blơi gơnam, pok prong anih mơdrô hăng dưi pơhno kơtang hloh. Kiăng dưi ngă tơlơi anai, anom bơwih ƀong mơdrô kiăng pơhrŏ trun hơƀak jrak, wai lăng rơđah rơđông, mă yua rơ-ua kông ngăn lŏn mơnai glai rưng, pơplih anih mă bruă klă hăng rơđah djŏp hră pơ-ar, tơlơi pơhing...

Tui hăng ƀing kơhnâo, sang bruă mơdrô kiăng lăng pơplih pơkra gơnam mơtah jing sa prăk tuh pơ alin kiăng đĭ kyar hơđong, ƀu djơ̆ lăng anai jing prăk ngă bruă thim ôh. Ră anai, sang bruă mơdrô dưi ngă mơ̆ng hơdôm bruă apah prăk aset, tŭ yua prong kah hăng pơkrem apui yua ia jâo, wai lăng ia hơƀak, pơmut mrô abih djŏp bruă pơkra gơnam hăng pơđĭ tui bruă wai lăng.

Ơi Nguyễn Thành Long, mơnuih kơhnâo bruă wai lăng ESG lăi, hơdôm boh tơring kiăng hơmâo hơdôm sang măi pơkra gơnam hơdjă anih hơdip ayuh hyiăng, hơmâo apui lơtrik hơdjă, ia yua nao yua rai, pơkra hơƀak jrak abih bang mơtăm, ngă phun atur kiăng sang bruă mơdrô ngă tui ESG tŭ yua hăng plai ƀiă prăk pơplih ngă bruă: “Hăng bruă pơkra gơnam ba sĭ pơ kual Mi Kô̆, hơmâo 6 grup phun bơbeč djơ̆ kơtang anun lĕ pơsơi pơsă, si măng, ñôm, hơbâo pruai hidro. Ră anai hơmâo laih prăk tla cacbon rơđah rơđông, laih anun khŏm pơkă hyuh hơƀak lơ̆m pơkra gơnam, ĕp ƀuh kru cacbon ƀơi rim mơta gơnam, rim tal ba sĭ. Hơdôm sang bruă mơdrô kiăng prăp lui tañ đah mơ̆ng huăi pioh glăi gah tlôn”.

Ơi Phạm Anh Tuấn, Khua jơnum min mơnuih ƀôn sang tơring čar Gia Lai pơsit: rơwang thun 2026-2030, tơring pơsit pơtrut boh thâo mrô, pơplih mơtah mơda, đĭ kyar boh thâo pơkra gơnam, apui lơtrik pơkra phrâo hăng ngă hmua mă yua boh thâo yom. Ră anai, tơring hơmâo lu tơlơi găl či đĭ kyar bơwih ƀong mơtah jing bơwih ƀong hơdjă hăng tơlơi gêh găl prong gah apui lơtrik hơdjă, dưi đĭ kyar boh thâo măi mok mă yua pơkra anŏ hơƀak jing anŏ yua. Khua jơnum min mơnuih ƀôn sang tơring čar Gia Lai ƀuăn gong gai amra pơplih mơ̆ng tơlơi pơmin wai lăng hơdai bơwih brơi, gum hrŏm hăng anom mơdrô pok pơhai ngă bruă: “Tơring Gia Lai amra hơmâo bruă gum hrŏm hăng sang bruă mơdrô pơplih mơtah mơda. Kơnuk kơna amra djru hơdôm bruă kiăo tui hơdôm tơlơi djru. Samơ̆ yom hloh ăt jing tơlơi pơmin mơ̆ng ƀing khua gong gai, sang bruă mơdrô khŏm lăng anai jing bruă khŏm kiăng pơplih hnun kah mơ̆ng dưi bơwih ƀong hơđong. Tơring čar amra git gai, gir pok pơhai pơplih pơkra gơnam hơdjă ƀơi tơring čar hăng pran jua ngă bruă tañ hloh, khut khăt hloh laih anun tŭ yua hloh”.