Mơng anai truh abih blan 7, să Tu Mơ Rông gir run pơgiong bruă jao brơi hăng djru brơi mơnuih ƀôn sang pla rơbêh 1 klăk phun kơphê amăng đơ đam giăm 200 ektar. Hơnong pơkă ƀu djơ̆ kơnong pok prong kual pla đôč ôh ăt ƀơƀrư̆ pơjing kual pla pơƀut, ngă atur phun kiăng pơđĭ kyar kơphê tui glông rơnoh yôm. Ơi Võ Trung Mạnh, Khua git gai Ping gah să Tu Mơ Rông brơi thâo, rơbêh 1 klăk phun kơphê hơmâo pla amăng thun anai jing tơlơi yak nao blung a đôč.

Rơwang thun 2026-2030, ƀon lan ba tơbiă hơnong pơkă djru brơi mơnuih ƀôn sang pla phrâo 1.000 ektar kơphê; gir run truh thun 2030, đơ đam hmua pla kơphê amăng să him lăng giăm 1.588 ektar, anăp nao hơnong pơkă rĭm boh sang anŏ hơmâo ƀiă biă mă ñu 1 ektar kơphê kiăng pơđĭ kyar bơwih ƀong huă sang anŏ.