Ƀơi să Dam Rông 1, tơring čar Lâm Đồng, ayong Phạm Văn Hội jing sa amăng hơdôm čô mơnuih ngă hmua nao hlâo ba pơjeh mắc ca pơkra dlăm hloh, klă hloh. Mơ̆ng bruă sĭ boh săt, ñu blơi măi ƀleč kơđuh, măi ƀhu krô hăng pơjing anăn “Mắc ca Hội Dung”. Pơjeh mắc ca ƀhu hơmâo mă OCOP 3 asar pơtŭ, laih dong ngă hrŏm blơi boh mắc ca mơ̆ng neh met wa či pơkra, ba sĭ pơ anih mơdrô pơprong kah hăng Hà Nội, laih anun ƀôn prong HCM. Tui hăng ayong Hội, kiăng gơnam tam ba sĭ ataih hloh, ta khŏm sem lăng tong ten anŏ klă mơ̆ng đang hmua truh pơ tơngan mơnuih blơi: “Pơkra dlăm hloh klă hloh jing tơlơi jŭ yap mơ̆ng đang hmua truh pơ rơnuč ñu lĕ ba sĭ pơ mơnuih blơi. Tơlơi akŏ phun mơ̆ng gơmơi kiăng lĕ anŏ klă yơh yom, hnun kah mơ̆ng dưi nao ataih hloh”.

Mơ̆ng hơbô̆ bruă pơkra gơnam mơ̆ng ayong Hội, pơkra gơnam klă hloh jing jơlan ngă bruă hơmâo lu anom bơwih ƀong, ƀut ngă ƀong hrŏm hăng anih pơkra gơnam ƀơi Lâm Đồng ruah mă, kiăng pơđĭ tui anŏ yom gơnam mơ̆ng hmua. Ră anai tơring čar hơmâo rơbêh 500 anih pơkra gơnam, jep gơnam amăng kơthung, pioh amăng hruh, dưi pơkra rai rơbêh 1,53 klăk tơn rim thun, ngă phun atur kiăng gơnam mơ̆ng hmua dưi ngă djơ̆ hăng tơlơi kiăng mơ̆ng sang mơdrô kah pơpha gơnam hyu sĭ laih anun pok prong anih mơdrô pơ čar rơngiao.

Tui hăng amai Nguyễn Thị Thùy Minh, pô sang anih pơkra gơnam mơ̆ng hmua ƀơi phương Lâm Viên - Đà Lạt, pơkra gơnam dlăm klă hloh, glăk pok jơlan bơwih ƀong hơđong kơ gơnam mơ̆ng hmua. Ƀu kơnong pơsir brơi anŏ tơnap juăt rơbêh gơnam tam, ƀu hơmâo pô blơi amăng bơyan pĕ pơhrui, bruă pơkra gơnam tui anai djru pơđĭ tui mơn anŏ yom gơnam tam, dưi răk pioh sui hloh mơn, djru ba lu mơnuih amăng tơring hơmâo bruă mă laih anun pơtrut ngă hrŏm mơ̆ng bruă pơkra gơnam truh kơ ba sĭ: “Amăng bơyan pĕ pơhrui gơnam, jing phun pla ñu tơsă ha wơ̆t mơtăm, anun jing sĭ ƀu hmao ôh. Yua hnun gơnam ñu amuñ răm, brŭ hĭ. Yua hnun gơmơi ruah măi ƀhu krô anai kiăng dưi mă yua sui hloh, bơ gơnam ta pơkra rai ñu phara, jơman hloh mơn”.

Sit nik brơi ƀuh, hrŏm sa djuai gơnam mơn, samơ̆ lơ̆m hơmâo pơkra lĕ nua ñu pơmă hloh, laih dong djru mơnuih pơkra gơnam prăp rơmet hlâo ƀơi anăp tơlơi pơplih mơ̆ng anih mơdrô. Kiăng hơmâo anŏ pơplih prong hloh kơ bruă pơkra gơnam dlăm, tơring čar Lâm Đồng hơmâo pơtrun bruă đĭ kyar pơkra añăm pơtăm boh troh, rơwang thun 2026-2030. Gơñăm nao truh pơ thun 2030, mrô añăm pơtăm boh troh pơkra dlăm, hiam hloh hơmâo năng ai 30% mrô gơnam, mơ̆ng ƀrư̆ ba măi mok pơkra gơnam jing tơlơi gêh găl pơtrut đĭ kyar bơwih ƀong huă ngă hmua mơ̆ng tơring.

Tui hăng ơi Phan Nguyễn Hoàng Tân, Khua gơnong bruă hmua hăng ayuh hyiăng tơring čar Lâm Đồng, pơkra gơnam klă hloh, dlăm hloh jing boh pơkhuă pơđĭ tui anŏ yom mơ̆ng gơnam, dưi pơhno, bơkơtưn kơtang hloh hăng pok prong anih mơdrô pơ čar rơngiao. Ơi Phan Nguyễn Hoàng Tân lăi dlăm: “Kiăng pơđĭ tui anŏ yom dưi pơhno gơnam tam ăt kah hăng đĭ kyar anih mơdrô, biă ñu lĕ ba sĭ gơnam pơ čar rơngiao jing ƀing ta kiăng pơsit hơdôm kual ngă hmua pla sa djuai đôč, pơkra gơnam djơ̆ hăng anŏ pơkă. Laih dong pơđĭ tui mrô gơnam ba pơkra hiam amăng bruă ngă hmua đah mơ̆ng pơjing ra anŏ yom hăng pơđĭ tui tơlơi dưi pơhno mơ̆ng anom bruă”.

Mơ̆ng hơdôm anih pơkra gơnam anet kiăo tui sang anŏ đôč, truh kơ hơdôm anom mơdrô pơprong tuh pơ alin blơi măi rơnuk phrâo, pơkra gơnam dlăm klă hloh glăk pơjing rai tơlơi pơplih kơtang biă amăng tơlơi pơmin đĭ kyar ngă hmua ƀơi Lâm Đồng. Rim mơta gơnam mơ̆ng hmua pơkra klă ƀu kơnong pơđĭ tui prăk pơhrui kơ mơnuih ƀôn sang, plai ƀiă rơngiă gơnam tơdơi kơ pĕ pơhrui đôč ôh, ăt dưi pơhno, bơkơtưn kơtang hloh, pok prong anih ba sĭ. Anai jing jơlan nao yom biă mă, kiăng gơnam mơ̆ng hmua Lâm Đồng pơđĭ tui anŏ yom hăng đĭ kyar hơđong kjăp./.