Ƀơi tơring čar Gia Lai, hơdôm boh tơring glăk pơtrut tañ bruă sem lăng, pơtŏng sit hră pơ-ar, laih anun pơtô brơi neh met wa ngă hră kiăo tui tơlơi pơtrun đah mơ̆ng hơmâo gru mrô anih pla sâu riêng. Hăng lu mơnuih ngă hmua, bruă hơmâo gru mrô anih pla djru ba bruă pla pơjing amuñ ƀiă, dưi ba gơnam sĭ pơ hơdôm boh dêh čar kiăng hơmâo hră pơ-ar pơsit anŏ klă, thâo anih tơjŭ pla, pơkra gơnam. Ơi Hồ Nhất Cẩn, pô hmua pla sâu riêng ƀơi phường Hoài Nhơn Nam, brơi thâo, rơngiao kơ ngă hmua hơdjă, rông phun pla mơboh lu, ñu ăt lăp đing nao bruă pơjing đang pla tui hơnong pơkă:“Phrâo anai hơmâo Hră pơtrun 36 jing kâo nao pơhiăp tom laih hăng phường gơmơi. Jing ƀing amăng phường djru brơi kơ ta hơmâo anăn gơnam hơjăn păn. Ăt kiang ngă hiưm pă anăn gơnam hmư̆ hing hloh. Čang rơmang 3 thun dong đôč dưi akŏ pơdong anih blơi, sĭ gơnam”.

Ơi Võ Tấn Lực, Khua anom bruă bơwih ƀong, man pơdong anih anom hăng plơi prong phường Hoài Nhơn Nam, tơring čar Gia Lai, brơi thâo, tơring glăk pơtô ba hơdôm boh sang anŏ pla sâu riêng lăng glăi, čih pơkra hră pơ-ar, pơsit djơ̆ tơlơi pơhing anih pla. Anai hơmâo lăng jing bruă blung a dưi akŏ pơjing kual ngă hmua pơkra gơnam djơ̆ hăng anŏ či kiăng:“Phường gơmơi ngă tui Hră pơtrun 36 mơ̆ng Kơnuk kơna, laih anun pơtô brơi hơdôm boh sang anŏ ngă hmua dưi čih anăn ngă hră, đah mơ̆ng hơmâo pơtô brơi, ngă tui tơlơi pơkă ngă hmua pla pơjing, čih pioh glăi djŏp bruă ngă hmua đah mơ̆ng dưi hơmâo gru mrô anih pla ƀơi phường”.

Ƀơi lu anih pla sâu riêng pơkŏn mơ̆ng tơring čar Gia Lai, mơnuih ngă hmua glăk lăp đing nao mơn bruă hơmâo gru mrô anih pla đah mơ̆ng hơmâo anih blơi gơnam hơđong. Sang anŏ ơi Nguyễn Văn Hải, să Ia Ly pla phun sâu riêng lu thun hăng anai laih. Yua kiăo tui tơlơi pơtô ngă hmua, 2 ha đang sâu riêng sang anŏ ñu leng kơ hơmâo ƀing mơdrô blơi pơmă soh. Khă hnun, sâu riêng juăt sĭ kơ ƀing hyu mơdrô tui mơ̆ng hlâo đôč, yua dah đang sâu riêng ñu aka ƀu hơmâo mrô anih pla. Tui hăng ơi Hải, lơ̆m anih mơdrô jai ngă tơnap, bruă ngă hră gru mrô anih pla amra djru mơnuih ngă hmua dưi ba sĭ pơ lu anih dong pơ anăp anai:“Sang anŏ ngă hmua kar hăng kâo, ăt kah hăng sang anŏ pla sâu riêng hlơi mơ̆ng ƀu kiăng hơmâo gru mrô pơsit anih pla. Kiăng tơdơi anai hơmâo anih ba sĭ hơđong hloh. Yua dah sâu riêng mông anai lu biă, anih sĭ mơdrô sâu riêng jai hrơi lu mơn. Amăng anun ta hyu sĭ pơ anai pơ adih ñu ƀu hơđong tui hăng đang hmua ta hơmâo hră pơ-ar, hơmâo gru mrô anih pla”.

Truh ră anai, tơring čar Gia Lai hơmâo brơi laih 440 mrô anih pla djŏp djuai gơnam, ƀơi đơ đam đang hmua rơbêh 13.000ha, hăng 61 mrô anih anung gơnam. Kơnong phun sâu riêng, tơring čar hơmâo giăm 3.000 ha hơmâo hră pơsit mrô anih pla. Tui hăng ơi Huỳnh Việt Hùng, Khua sang bruă pơtrut pơsur ngă hmua tơring čar Gia Lai, Hră pơtrun 36 hơmâo hơdôm tơlơi phrâo, ngă hră amuñ ƀiă, ngă gêh găl đah mơ̆ng dưi hơmâo mrô anih pla kơ mơnuih ngă hmua:“Tui hăng tơlơi pơkă hơđăp, khŏm hơmâo 10 ha truh pơ ngŏ kah mơ̆ng dưi hơmâo hră pơsit mrô anih pla. Samơ̆ tui hăng Hră pơtrun 36 lĕ ƀu pơkă ôh đang hmua hơdôm pă. Hră pơtrun hơđăp lĕ sa blah hmua ta dưi ngă sa mrô anih pla đôč. Khă hnun, sit biă ñu, amăng sa blah đang hmua ƀu kơnong pla sa djuai đôč ôh, arăng juăt pla plah phun kơphê, jing Hră pơtrun 36 anai pok pơhư prong, jing sa blah đang hmua ta dưi hơmâo 2 ƀudah 3 hră pơsit mrô anih pla kơ rim djuai phun pla hơmâo ƀơi anun”.

Tơring čar Gia Lai hlăk pơtrut hmar ngă tui Hră pơtrun mrô 36 kiăng ba tơlơi pơhing tơpă ară, amuñ thâo hluh pioh mơnuih ngă hmua hla tui, sang bruă ngă hrŏm hăng mơnuih ngă bruă mơdrô amăng tơring čar thâo hơdôm tơlơi pơtrun, pơkă phrâo kơ bruă ngă brơi anăn mrô pơčrâo anih pla, hmua pơjing hăng sang bruă anung gơnam sĭ mơdrô. Amăng anun, ngă amuñ hloh kơ bruă ngă brơi hră pơar pơsit anăn gru mrô anih pla hăng sang bruă anung gơnam sĭ mơdrô hăng kơtưn bruă nao sem pel ĕp lăng tong ten boh troh gơnam sĭ mơdrô djơ̆ hnơ̆ng pơkă hơdjă rơgoh. Pô čih tơlơi pơhing črăn hơdră anai, hơmâo bưp ră ruai tom hăng tơña ơi Kiều Văn Cang, Kơ-iăng khua anom bruă wai lăng bruă hmua pla pơjing hăng pơgang phun pla, gah Gơnong bruă Ngă hmua hăng Ayuh hyiăng tơring čar Gia Lai kơ tơlơi anai.

-Ơ ơi, Hră pơtrun mrô 36 thun 2026 mơ̆ng Kơnuk kơna hơmâo hơdôm tơlơi phrâo hơgĕt pơkă kơ bruă čih anăn gru mrô anih pla, hmua pơjing?

-Ơi Kiều Văn Cang: Tui hăng hră pơtrun mrô 36/2026 mơ̆ng Kơnuk kơna lĕ hơdôm mơta tơlơi phrâo : Mơta sa, tơlơi dưi tŭ mă hăng ngă brơi hră anăn gru mrô pơkă anih ngă hmua pla pơjing dưi jao glăi kơ Jơnum min mơnuih ƀôn sang ƀơi să, anih ngă hmua anun. Dua lĕ, hrơi blan pơsir brơi hră pơar pơsit anăn gru anih pơkă kual ngă hmua pla pơjing hơmâo pơčrâo brơi rơđah rơđong, kơnong 3 hrơi ngă brơi hră amăng dêh čar hăng 10 hrơi ngă brơi hră ba sĭ mơdrô pơ tač rơngiao. Klâo lĕ, gru mrô pơsit anăn anih pla pơjeh phun pla hơgĕt, phun boh troh pơpă dưi pla ƀudah anih ngă hmua, glông hmua, tui tơlơi rơkâo mơ̆ng pô hmua, sang anŏ, khul sang bruă ngă hrŏm. Pơkă hăng pơčrâo anih pla djơ̆ anăn tui gru mrô pơkă.

-Tui hăng tơlơi pơkă phrâo, mơnuih ƀôn sang ƀudah sang bruă ngă hrŏm kiăng čih anăn rơkâo ngă brơi gru mrô pơčrâo anih pla kiăng ngă tui djơ̆ hnơ̆ng hơgĕt laih anun ngă tui hiư̆m pă, ơ ơi?

-Ơi Kiều Văn Cang: Tui hăng tơlơi pơkă phrâo, bruă ngă brơi hră čih anăn, pơdưm gru mrô wai lăng anih pla, wơ̆t hăng mrô pơčrâo sang bruă anung gơnam, abih bang ngă hră pơar mơ-it amăng plang tơlơi pơhing điện tử soh, tơlơi pơtrun, pô kiăng čih pơhaih mă anŏ kiăng, tơlơi rơkâo laih anun khom glăm ba tơlơi pơhaih mơ̆ng gơñu pô. Bruă ngă anai, ngă hrŏ ƀiă hrơi mông mă bruă, prăk kăk nao rai, ngă amuñ brơi hơdră ngă hră pơar ƀu hơmâo črăn ngă hră pơar phrâo pơpă ôh; ngă gêh găl brơi djop sang bruă, anom bruă pơhaih tong ten djơ̆ găl tơlơi rơkâo hăng tơlơi pơsir huăi hơmâo tơlơi gun. Kơ akŏ klôn hơdră ngă hră pơar pơsỉ anăn gru mrô pơčrâo anih ngă hmua pla pơjing, mơnuih ƀôn sang hăng sang bruă hlơi či ngă lĕ, hră pơar ba mơ-it pơ sang bruă khua să, jơnum min mơnuih ƀôn sang să anih wai lăng lơ̆n ngă hmua hăng sang bruă anung gơnam sĭ mơdrô, samơ̆ mơ-it tui bơnah tơlơi pơhing mơ̆ng dêh čar Cổng dịch vụ Quốc gia.

Hăng mơnuih ƀôn sang hăng sang bruă ngă hrŏm kiăng rơkâo tŭ mă anăn gru mrô lĕ: Sa prăp lui hră rơkâo pơsit gru mrô anih pla, lăi pơthâo čih tui hră pơtô brơi ƀơi bơnah pơƀut phụ lục 1 mơ̆ng Hră pơtrun mrô 36. Amăng hră čih rơkâo anun, khom sem lăng tong ten laih lăng anŏ gêh găl tơlơi pơhing hơmâo čih amăng hră pơtô brơi anun. Dua lĕ, nao tơña Jơnum min mơnuih ƀôn sang gưl să, phường anih hơmâo lơ̆n hmua hăng sang bruă mơdrô anun.

-Bruă pơpha gưl tơlơi dưi mă bruă brơi kơ Jơnum min mơnuih ƀôn sang să amăng bruă ngă brơi hră pơsit gru mrô pơčrâo anih pla, hmua đang amra ngă gêh găl hiư̆m pă kơ mơnuih ngă hmua ƀơi Gia Lai?

-Ơi Kiều Văn Cang: Bruă jao tơlơi dưi ngă brơi hră pơsit anăn gru pơčrâo anih ngă hmua pla pơjing kơ Jơnum min mơnuih ƀôn sang să ba glăi anŏ gêh găl lu yơh: Ngă hră pơar amuñ hloh, pơhrŏ ƀiă hrơi mông, prăk kăk nao rai, ngă hră pơar amuñ aset črăn hloh laih anun ngă amuñ brơi kơ djop sang bruă, mơnuih ƀôn sang ngă hmua dŏ amăng să. Djru ba boh troh đang hmua ƀơi kual ataih, tañ hơmâo anăn gru mrô pơčrâo anih ngă hmua pla pơjing, tui anun gơnam boh troh dưi ba nao sĭ mơdrô djơ̆ jơlan phun, prăk pơhrui glăi amra lu hloh mơ̆n kơ mơnuih ƀôn sang. Pơtrut pơsur djop sang bruă, sang anŏ mơnuih ƀôn sang lir hơbit ngă hmua, pơkra ming laih anun ngă hrŏm ba gơnam sĭ mơdrô pơtum sa anih, pơtum lu gơnam pioh ngă brơi hră pơčrâo anih pla tơpă hloh.

-Hnun hă, kiăng dưi pơsit brơi anăn gru mrô pơčrâo anih pla dưi djă pioh sui hiư̆m pă laih anun mă glăi hră anun, mơnuih ƀôn sang, anom bruă ngă hrŏm či ngă tui akŏ klôn ñu hơgĕt lơ̆m ngă hmua pla pơjing, wai lăng anih ngă hmua pla pơjing hăng pơčrâo ten phun tơdŭ anih pla pơjing anun?

-Ơi Kiều Văn Cang: Mơnuih ƀôn sang khom kơđiăng, lơ̆m mă bruă, ngă hmua pla pơjing khom čih pioh djop bruă mă amăng rim hrơi mơtam, čih pioh djop, pla phun hơgĕt, pruai hơbâo, kmơ̆k pơpă, ia jrao pruih hăng ia jrao hơgĕt čih pioh abih anăn ia jrao, anih blơi yua, truh kơ bruă wai lăng, răk rem, jik rơ̆k, pĕ boh lêng kơ čih glăi soh. Boh nik ñu wai lăng ia jrao pruih kơ phun pla, kmơ̆k, hơbâo pruai djop mơta khom pơhaih rơđah rơđong, thâo anăn, thâo sang bruă sĭ mơdrô, anih pơkra ming, rơnoh pruih, dưm jrao tum teč ƀu lui sa mơta ôh; ia jrao hơgĕt dưi yua, hơbâo pơpă ƀu dưi dưm nao amăng đang, rơnoh ƀiă lu hiư̆m pă khom thâo ten soh. Ngă tui djơ̆ tơlơi pơtô ba hơdră wai pơgang arong aruač hlăt pơčram; khom sem lăng tong ten anŏ đôm glăi ia jrao ƀudah hơbâo pruai amăng đang, amăng boh troh pĕ pơhrui, ngă djơ̆ tơlơi pơtrun mơ̆ng Việt Nam hăng djơ̆ lăp hăng anih anom blơi ƀơi dêh čar tač rơngiao či kiăng. Khom ngă tui djơ̆ tơlơi pel ĕp, sem lăng mơ̆ng sang bruă kơnuk kơna: Ngă hrŏm hăng jơnum min mơnuih ƀôn sang să nao ĕp rim blan, pơsir mơtam tơlơi ƀuh ƀu djơ̆ hơdră arăng pơtô lơ̆m pel ĕp amăng anih ngă hmua. Ƀu dưi brơi arăng mă yua, sĭ mơdrô nao rai hră pơsit pơčrâo anih pla, hmua đang; pơhaih tong ten djơ̆ hnơ̆ng hơmâo, rơnoh boh troh pĕ pơhrui ƀơi đơ đam sa blah đang hmua pioh pơčrâo kiăng thâo anih pe pơhrui, hmua đang mơ̆ng pơpă.

-Ơ lah, bơni kơ ih hơmâo pioh mông lăi glăi hŏ!

Gru mrô pơčrâo anih pla, hmua đang pla sầu riêng hơmâo pơtong rơđah anih pla, jing sa amăng hơdôm anŏ gêh găl khom ngă kiăng pơđĭ rơnoh sĭ mơdrô, pok prong anih anom sĭ mơdrô. Kiăng kơ anăn gru mrô pơčrâo anih pla anun ba glăi boh tŭ yua sit nik, kiăng mơnuih ƀôn sang khom prăp lui hlâo, ngă hrŏm, hmư̆ tơlơi pơtô ba mơ̆ng anom bruă hơmâo tơlơi dưi ten hăng gong gai kơnuk kơna ƀơi plơi pla.