Hơdôm hrơi hăng anai, ƀơi lu đang pla sâu riêng pơ să Čư̆ Prong, tơring čar Gia Lai, mơnuih ƀôn sang apah mơnuih koh drôm hĭ abih hơdôm phun djai. Ƀơi plơi Hoàng Yên, lu đang sâu riêng hlâo kơ anun hiam soh, tơ tă anai dŏ kơnong than kyâo krô kreñ. Tơdơi kơ lu wơ̆t pơjrao phun pla, samơ̆ ƀu rơ-ua ôh, ơi Trịnh Ngọc Oanh, plơi Hoàng Yên khŏm koh drôm hĭ abih phun sâu riêng amăng đang ñu pla sui 4 thun laih. Sang anŏ ơi Oanh hơmâo 162 phun sâu riêng, thun tal 4 laih, prăp či truh bơyan pơhrui boh tal blung a laih. Samơ̆, tơdơi kơ hơdôm hrơi đôč, phun sâu riêng djơ̆ kman pơčrăm, djai tui rơrŭ: “Đang sâu riêng sang anŏ gơmơi pla 4 thun laih, aka ƀu ƀong djơ̆ hlâo dơi ôh, thun anai ƀiă či mơboh laih samơ̆ phun djai abih laih. Hơ-ưi biă, rơngiă prăk hai lu mơn. Hiưm mơ̆ng ngă dong, khŏm drôm yơh”.

Ƀu kơnong sang anŏ ơi Oanh ôh, lu sang anŏ pơkŏn ƀơi plơi Hoàng Yên ăt hnun mơn. Hơmâo sang anŏ đa rơngiă hơdôm pluh phun, đa dong rơngiă hơdôm rơtuh phun. Mơ̆ng sa blah đang sâu riêng hiam, đang sâu riêng mơ̆ng ayong Lê Văn Thành ƀơi să Čư̆ Prong dŏ glăi phun kyâo, than wan krô đôč. Hla hlung abih, than krô krañ, lu phun djai laih. Sang anŏ ayong Thành hrŏm hăng adơi ayong pla giăm 300 phun sâu riêng, truh ră anai năng ai 6 thun laih. Thun hlâo, phun gơ̆ mơboh laih, hơmâo 17 tơn, sĭ nua 57.000 prăk/sa kg. Samơ̆, thun anai, tŭ kơ kman ƀong, ngă djai abih. Mah aka ƀu pơsit ôh yua hơget ngă phun djai, ayong Thành brơi thâo, ƀơi phun pla ƀuh anŏ tlep jŭ jŭ. Tơdơi kơ anun hla ñu añot, krô abih, hlung hla, phun djai tui rơrŭ: “Thun hlâo phun ñu djai mơn, samơ̆ ƀiă đôč, thun anai djai lu, anun neh met wa pla glăi dong. Rơngôt biă, ƀu hor či nao čuă đang hmua dong tah. Ta ngă bruă glêh glar, tuh nao prăk kăk lu lin, samơ̆ tơ tă anai phun djai abih, ƀu mơak ôh amăng pran jua”.

Ơi Ngô Anh Tuấn, mơnuih mă bruă amăng Anom bruă ngă hmua - akŏ pơdong anih anom să Čư̆ Prong, tơring čar Gia Lai, lăi pơthâo, bruă sâu riêng djai rơrŭ hơmâo lu ƀơi plơi Hoàng Yên hăng plơi Bạt. Đang hmua djai hơmâo jŭ yap năng ai 10ha. Mơ̆ng bruă sem lăng blung a, anom apăn bruă pơsit sâu riêng djai năng ai yua kơmao ngă. Hơdôm nam ƀuh ƀơi phun pla kar hăng phun tiu djai tañ, djai kaih mơn. Lăp đing nao, lu đang sâu riêng djai leng kơ hơmâo pla ƀơi anih lŏn tơthă, ia ƀu thâo rô. Lơ̆m hơjan sui, ia dong glăi, anun yơh hơmâo kman, kơmao ƀong hăng ƀă hyu. Ơi Ngô Anh Tuấn brơi thâo: “Lu phun pla djai leng kơ hơmâo pla ƀơi anih đang hmua tơthă, ia ƀu thâo rô đuăi. Kiăng kman huăi lar hyu, să iâu pơthưr hơdôm sang anŏ hơmâo phun sâu riêng djai, kiăng trơ̆i, čơkăp hĭ phun, rơmet rơmot đang hmua; bơ hmua đang aka ƀu hơmâo kman pơčrăm lĕ ta bruăi glông ia, hŭi ia dăo kơ phun ñu”.

Ră anai anom apăn bruă să Čư̆ Prong, tơring čar Gia Lai lăng glăi abih đang hmua sâu riêng răm rai yua kman, kơmao ngă, pơtô brơi neh met wa ming pơkra đang hmua hơmâo phun kyâo djai, laih anun bruăi ia kiăng lŏn thu. Sâu riêng djai tuh rơyuh tơdơi kơ hơjan prong sui hrơi, ƀu kơnong ngă rơngiă prăk kăk mơnuih pla đôč ôh, ăt brơi ƀuh anŏ ƀu klă lơ̆m pla phun anai ƀơi kual lŏn ƀu lăp djơ̆./.