Amăng mông jơnum, tơlơi bơră ruai mơng Anom bơwih ƀong hrŏm gah Ngă hmua Dă M’ri pơƀuh tong ten hơdôm tơlơi glăk ngă tơnap tap ră anai. Anom bơwih ƀong hrŏm ră anai hơmâo 180 čô ding kơna, hăng giăm 450 ektar đang pla sầu riêng. Kual pla pơprong, samơ̆ hơdôm boh sang anŏ ăt ngă phara amăng bruă pla pơjing. Đa ngă tui tơlơi găn rơgao sui thun, đa mă yua boh thâo phrâo; bruă pruai kmơk, pruih ia jrao pơgang phun pla ƀudah čih glăi bruă pla pơjing ăt aka ƀu djơ̆ hrŏm. Ơi Nguyễn Thanh Sơn, Khua Khul wai lăng ngă rah Khua anom bơwih ƀong hrŏm Ngă Hmua Dă M’ri brơi thâo: “Bruă juăt ƀuh hăng mơnuih ngă hmua ră anai lĕ rĭm boh sang ngă phara, ƀu hơmâo hlơi hrup hăng hlơi. Bruă kiăng ngă ră anai lĕ pơphun ngă hmua hiưm pă ñu. Anom bơwih ƀong gơmơi hơmâo črâo ba, pơtop hrăm, jơnum bơkơtuai, ngă lông lăng; hăng hơnong pơkă rơnuč lĕ pơphun ngă hmua tui jơlan gah hơdjă, hơđong kjăp.”

Truh kơnôl 18/9/2026, tơring čar Lâm Đồng hơmâo 1.611 mrô kual pla, amăng anun 1.094 mrô kual pla dưi ba sĭ pơ tač rơngiao hơmâo dêh čar blơi mut tŭ yap; hrŏm hăng 547 mrô anih anung gơnam. Samơ̆, 173 mrô kual pla, hăng đơ đam rơbêh 3.600 ektar, laih dong 61 mrô anih anung gơnam arăng brơi pơdơi ngă bruă ƀudah mă glăi. Hơdôm mrô jŭ yap anai brơi ƀuh, lơm bruă ngă hră pơ-ar jao mrô jai hrơi amuñ tui, hơmâo kah gưl hăng dưm amăng măi mok, bruă akŏ phun amăng wai lăng kiăng pơplih kơtang hơdai nao bruă tŏ tui djop tơlơi gal tơdơi kơ jao mrô. Anai lĕ wai lăng gơnam yua gah ngă hmua, pơhlôm bruă pla pơjing, čih glăi tong ten, pơƀuh tong ten anih pla hăng hrưn đĭ pran glăm ba mơng rĭm anih anom amăng glông bơwih ƀong anai. Khua anom bruă pơsur ngă hmua dêh čar ơi Lê Quốc Thanh lăi pơtong: “Hơmâo mrô kual pla aka ƀu dưi lăi nao hơget ôh, anai lĕ tơlơi ngă gal brơi. Bơ mơnuih ngă hmua pla pơjing hiưm pă, djơ̆ hăng hơnong pơkă hơget, mă yua tui hơdră hiưm pă, gơnam yua ngă hmua hiưm pă, abih bang mrô jŭ yap glăi anun kah dưi pơƀuh brơi gơnam đang hmua hiam hơdjă hă ƀŭ.”

Tơlơi pơtong sit anai brơi ƀuh, mrô kual pla ƀu djơ̆ kơnong lăng kar hăng “sa pok wĕ” kiăng ba gơnam đang hmua ba hyu sĭ pơ tač rơngiao. Gah tlôn rĭm mrô anun lĕ sa kual pla pơjing hơmâo pơphun ngă klă, hơmâo pơmut hrŏm hăng dưi wai lăng gơnam tam mơng pla truh ba sĭ mơdrô. Mơng tơlơi bơră ruai ƀơi Lâm Đồng, tơlơi kiăng ngă ƀu djơ̆ kơnong hăng boh sầu riêng đôč ôh mơ̆ ăt lĕ gơnam đang hmua pơkŏn dong ƀơi kual Dap kơdư hăng đơ đam dêh čar./.