Ơi Bùi Đức Quỳnh, thun anai 48 thun, dŏ ƀơi plơi Đak tăng, să Rơkơi, tơring čar Quảng Ngãi hơmâo lơ̆n đang sang anŏ ñu truh 20 hektar, pla kơphê hăng boh sầu riêng; amăng anun, phun boh sầu riêng, 15 hektar. Thun anai, rơnoh pĕ boh sầu riêng mơ̆ng đang hmua gơñu truh kơ 80 tơn, prăk pơhrui glăi 4 klai. Ơi Bùi Đức Quỳnh brơi thâo, pla boh sầu riêng khom sem lăng pơgang ba na nao hăng pioh lu hrơi mông lơ̆m phun ñu phrâo bơnga či boh adai mơda:

“Boh sầu riêng hơmâo anăn mrô pơkă gru kơnăl pơčrâo anih pla lĕ ƀing sĭ mơdrô, sang bruă mơdrô ăt hơđong mơ̆n pran jua blơi, yua thâo krăn pô, anih pla pơpă rơđa rơđong laih. Lơ̆m boh sầu riêng hơmâo laih gru mrô, rơnoh sĭ mơdrô ăt pơmă ƀiă mơ̆ng 1-2 rơnoh pơkă hăng hơdôm đang aka ƀu hơmâo anăn gru mrô”.

Dơ̆ng mơ̆ng hơdôm boh sang anŏ blung a đôč, truh ră anai đơ đam phun boh sầu riêng ƀơi să Rơkơi, tơring čar Quảng Ngãi pok prong tui truh 355 hektar. Hrŏm hăng pok prong đơ đam pla, să hlăk ngă hrŏm sang bruă mơdrô, čih anăn pơsit gru mrô pơčrâo anih, hmua đang laih anun ĕp anih anom sĭ mơdrô hơđong. Anai lĕ dưi lăng sa bruă mă yom pioh kơ phun boh sầu riêng pơđĭ kyar hơđong kơjăp. Ơi Nguyễn Minh Thuận, Khua Jơnum min mơnuih ƀôn sang să Rơkơi, tơring čar Quảng Ngãi brơi thâo, ƀơi anăp mơta lĕ, să ngă hrŏm sang bruă mơdrô djru ngă hơđong ĕp anhi ba sĭ mơdrô kơphê hăng sầu riêng:

“Kiăng prăp lui hlâo gơnam sĭ mơdrô boh troh đang hmua mơnuih ƀôn sang pô sĭ, să hơmâo ngă hrŏm lu sang bruă mơdrô pioh ngă bruă blơi pơđom lui hlâo jăng jai, ngă hơđong tui ĕp anih ba sĭ mơdrô kơphê hăng boh sầu riêng brơi mơnuih ƀôn sang. Khă hnun, kiăng pơhlom hơđong sui thun pơ anăp adih, ăt čang rơmang djop gơnong bruă, anom bruă hăng jơnum min mơnuih ƀôn sang tơring čar Quảng Ngãi khom hơmâo jơlan hơdră prong, iâu pơthưr tuh pơ alin, man pơdong sang măi blơi pơkra glăi boh troh đang hmua mơ̆ng mơnuih ƀôn sang pô sĭ glăi, biă mă ñu pơ tơring gah yŭ tơring čar, kiăng mơnuih ƀôn sang hơđong hơmâo anih sĭ mơdrô boh troh đang hmua”.

Boh sầu riêng hlăk jing sâ amăng hơdôm mơta boh troh đang hmua sĭ mơdrô hơmâo rơnoh yom ƀơi kual gah yŭ tơring čar Quảng Ngãi. Tơring čar Quảng Ngãi ră anai hơmâo4.150 hektar đang sầu riêng, amăng anun rơbêh 1000 hektar boh laih. Truh ră anai, đơ đam tơring čar hơmâo 23 mơta gru kơnăl hơmâo pơsit anăn mrô pơčrâo anih pla hmua đang, đơ đam truh 392 hektar. Anăn mrô pơčrâo anih pla, hmua đang lĕ djru dưi ĕp lăng tong ten hơdră ngă hmua pla pơjing, dưm hơbâo, pruih ia jrao pơgang hlăt kman djơ̆ hnơ̆ng pơkă huăi rơgao đơi, ia jrao đom glăi amăng boh troh ƀiă đôč, djơ̆ anŏ pơkă mơ̆ng anih či blơi pơ tač rơngiao. Ơi Nguyễn Hoài Tâm, Khua anom bruă wai lăng phun pla, hmua đang laih anun pơgang hnơ̆ng hơdjă tơring čar Quảng Ngãi brơi thâo, tơhnal pơkă ƀu tơguan pok prong đơ đam či ngă hmua pla pơjing ôh, samơ̆ đing nao pơjing gơnam boh troh đang hmua hơdjă rơgoh, hơmâo anih blơi hơđong anun yom.

“Đơ đam hmua pla boh sầu riêng ră anai lu biă mă ñu pơ kual yŭ lĕ kah hăng să Môrai, Rơkơi, Ia Tơi, Bơ Y, hơdôm să anai giăm guai dêh čar. Tơlơi anun brơi ƀuh, ayuh hyiăng, lơ̆n mơnai, glai klô djơ̆ găl hăng phun boh sầu riêng. Khă hnun, anai lĕ phun pla, hơmâo rơnoh prăk tuh pơ alin ngă bruă yom, kiăng thâo tong ten hơdră wai lăng răk rem laih anun hơmâo ia pruih hơđong, anun mơnuih ƀôn sang khom thâo tong ten kah dưi pla lu hăng hơđong kơjăp”.