Ƀơi kual glai giăm sang să Măng Đen, tơring čar Quảng Ngãi, hlâo adih gah tơring glông Kon Plong, tơring čar Kon Tum, ƀing tơhan pơgang glai rưng kual 6, gah sang bruă tơhan pơgang glai klô Quảng Ngãi hlăk ba yua flycam amăng bruă wai lăng, pơgang glai klô laih anun pơhlom apui ƀong glai. Kơnong dưm truă, sa, dua yak ngă bruă đôč, flycam pơyiong đĭ por ƀơi adai rơngit, ba glăi rung kơ pô dŏ lăng tui, kơtit mă mơ̆ng ataih. Ƀơi anih dlông pơngŏ 100 met, flycam djru kơ tơhan pơgang glai klô ƀuh mơtam tơlơi arăng kơsing mă kyâo glai.

Pơkă hăng bruă mă hyu tir rơbat hyu kah hăng hlâo, flycam djru pơkrem ƀiă hrơi mông mă bruă, pran jua rơbat hyu. Sit hơmâo tơlơi pơƀuh hlâo hŭi apui ƀong glai, ƀing khua mua, tơhan pơgang glai kơnong kơtit gư̆ mă măi lăng sŭ, por nao tơl anih kiăng thâo. Thâo rơđah apui ƀong glai anet ƀudah prong, mơ̆ng anun pơpha bruă mă hơdră nao pơsir mơtam anun tañ hăng djơ̆ lăp. Ƀu kơnong djru kơ bruă pơhlom apui ƀong đôč ôh, flaycam dŏ djru kiăng thâo tañ djop anih jum dar, giăm đang hmua, mơnuih ƀôn sang dŏ ngă, ƀudah arăng hyu koh drôm, jah glai tă tăn amăng anih gơñu wai lăng.

Ayong Huỳnh Tú, tơhan pơgang glai ƀơi anih pơgang mrô 6, gah sang bruă khua tơhan pơgang glai tơring čar Quảng Ngãi brơi thâo, flycam jing gơnam djru ngă bruă tŭ yua biă mă, samơ̆ bruă hyu tir ăt dŏ djă pioh, pơphun đôč, ñu dưi gơgrong ba prong biă mă:

“Rim hrơi, tơhan pơgang glai ngă tui bruă wai lăng, pơgang kyâo pơtâo, hyu tir. Samơ̆, bruă ba yua ia rơgơi flycam djru sit hơmâo anih apui jă, gơmơi tañ  thâo jơlan či nao giăm, tañ hmar hloh truh pơ anih anun, nao hơprah apui hmar hloh. Amăng bruă mă hyu tir, hơdôm anih giăm hmua đang ƀudah bruă hyu čông jơnah jah glai tă tăn tañ ƀuh hăng pơgăn hĭ”.

Hrŏm hăng bruă ba yua boh thâo ia rơgơi phrâo, bruă pơtô pơblang ngă hrŏm mơnuih ƀôn sang ăt dưi đing nao mơ̆n. Sang bruă wai lăng glai rưng Măng Đen, kông ty wai lăng kyâo glai Kon Plong pơgang rơbêh 9.800 ha, ƀơi 12 bit anih pơphă gak wai, lơ̆m anun mơnuih mă bruă kơnong 12 čô đôč.

Ơi Trần Văn Thanh, Khua sang bruă pơgang glai rưng Đăng Đen brơi thâo, amăng anih lŏn rơhaih glai prong, tơhan mă bruă ƀiă đơi, lăng kơ bruă hyu pơtô lăi yơh hơdră yom hloh. Lu mơta tơlơi pơtô lăi, pơčrâo ba ƀơi anăp, amuñ thâo hluh, pok pơhai brơi ană plơi pla ngă tui, thâo lu kơ bruă pơgang glai rưng hŭi apui ƀong. Yua kơ anun, tơlơi ngă soh tơlơi phiăn pơgang glai hăng rơngiă glai lĕ dưi wai lăng tong ten biă mă.

“Sang bruă wai lăng glai rưng Măng Đen čih pơthâo rup lơkak pioh pơhlom apui ƀong glai, dưm gơnam yua mă bruă ƀơi anih pơčruih apui. Pơpă anih amuñ apui jă, gơmơi hlă pơnang čih pơthâo kom apui pioh mơnuih ƀôn sang ƀuh anŏ hŭi rơhyưt. Mơnuih ƀôn sang ngă hmua, čuh jơnah giăm glai gơñu khom pơ agaih glông pơgăn ƀong rôk ƀơi, giong nao lăi hmư̆ tơhan pơgang glai thâo djru hrŏm. Amra hơmâo mơnuih pơtô brơi mơnuih ƀôn sang čuh jơnah djơ̆ hơdră”.

Ƀơi kông ty sa ding kơna wai lăng kyâo Kon Plong, bruă pơgang glai rưng dưi pok pơhai sa amăng plĕ, lu hơdră, dăp hơdră tui hluai rim  kual hăng jao tơhan dŏ mă bruă ƀơi anih hŭi apui ƀong kơtang,  biă mă ñu bruă pơhlom pơgang apui ƀong glai. Ơi Nguyễn Văn Huynh, Khua anom wai lăng tơlơi thâo măi mok kông ty sa ding kơna pla kyâo Kon Plong brơi thâo, anom bruă tuh pơ alin  blơi gơnam hue mơ̆ng ataih, ĕp anih apui jă, blơi sơmel, măi ayup apui hăng lu gơnam yua pơkŏn kiăng tañ thâo asăp apui mơ̆ng ataih. Yua kơ pơhlom pơgang klă mơ̆ng akŏ thun truh ră anai, đơ đam lŏn glai kông ty wai lăng aka ƀu hơmâo tơlơi truh hơgĕt ôh.

“Djop anom bruă tơhan pơgang glai ngă klă bruă pơhlom, pơgang apui ƀong glai amăng bơyan phang adai pơđiă. Mơ̆ng anun, hyu ĕp lăng, jŭ yap glăi djop mơta gơnam yua mă bruă, pơnăng čih pơthâo kiăng blơi prăp, pơhrua nao, bơwih brơi bruă mă pơhlom pơgang apui ƀong glai bơyan adai không phang”.

Tui hăng rơnoh jŭ yap, mơ̆ng akŏ thun truh ră anai, Quảng Ngãi hơmâo 3 wơ̆t apui ƀong glai ƀơi să Bơ Y, Sơn Hà hăng Mỏ Cày. Hơdôm wơ̆t apui bong glai anun ƀơi đang kyâo pla soh, anun hmao hăng tañ hơprah thăm apui.

Ră anai tơring čar Quảng Ngãi hơmâo rơbêh 900 rơbâo ha glai rưng. Tơring čar hơmâo pơtrut ba yua boh thâo ia rơgơi pioh lăi pơthâo tañ, yua flycam, rup mơ̆ng êkrang; laih dơ̆ng prăp lui djop mơnuih djru hrŏm, rơdêh đĭ pơphun ngă tui 4 mơta bruă sa anih, 3 bruă amra ngă tui, pioh pơsir tañ sit hơmâo tơlơi truh. Ơi Nguyễn Khánh Ngọc, Kơ-iăng khua anom bruă tơhan pơgang glai tơring čar Quảng Ngãi brơi thâo:

“Kơnuk kơna wai lăng djop đơ đam lŏn glai pơgang plơi pla hăng anih ngă hmua pla pơjing. Hăng pô glai khul 1 jing sang anŏ, mơnuih ƀôn sang, plơi pla gum hrŏm, hơdôm glai dŏ glăi yua kơ Jơnum min mơnuih ƀôn sang să wai lăng. Mơ̆ng bơyan khôn phrâo truh, djop sang bruă, khul mơnuih mơnam ngă hrŏm pơsitt bruă mă, mơnuih jao bruă, khul khua git gai pơčrâo bruă čih tơlơi phiăn ngă hrŏm hăng djop tơhan kơnuk kơna ngă hrŏm hơbit pơgang glai klô, kyâo pơtâo.