Anai lĕ sa amăng hơdôm anom bruă pơkra pơjing, sĭ mơdrô makka lu hloh ƀơi Dak Lak, kông ti Damaca Nguyên Phương pơsit tong hơdôm hơnong pơkă kơ pơhlôm gơnam hiam hơdjă hăng wai pơgang klin kman ƀơi hlô mơnong, gơnam đang hmua (SPS) amăng tơlơi pơkôl ngă hrŏm bơwih ƀong huă djop mơta amăng kual (RCEP) ƀudah hơdôm tơlơi rơkâo boh thâo phrâo glăk jing tơlơi gal prong hloh kiăng gơnam tam dưi ba sĭ mơdrô pơ tač rơngiao hơđong. Tui yă Nguyễn Thị Thu Phương, Khua kông ti, tơlơi tơnap tap ră anai ƀu djơ̆ kơnong lĕ “thâo tơlơi pơkă” đôč ôh mơ̆ ăt lĕ pok pơhai brơi djơ̆ hăng djop mơta tui tơlơi sit nik, yua anun anom bơwih ƀong sĭ mơdrô čang rơmang hơdôm gơnong bruă bơdjơ̆ nao djru brơi, črâo brơi ngă tui tong ten.

“Ƀing gơmơi čang rơmang dưi črâo ba tong ten ƀiă lơm hơdôm tơlơi pơkă, tơlơi pơtrun pơplih. Anom bơwih ƀong sĭ mơdrô kiăng ngă tui hơdôm tơlơi yak nao, anom bruă hơpă djru brơi ƀơi anăp hăng hơdôm tơhnal pơkă djru hơget kơ hră pơ-ar ƀudah prăk kak. Lơm hơmâo tơlơi gum hrŏm hăng črâo ba tong ten, anom bơwih ƀong sĭ mơdrô amra khin hơtai ƀiă amăng bruă tuh pơ alin, pơgiong tơhnal pơkă hăng ba gơnam tam sĭ mơdrô pơ tač rơngiao”.

Hăng hơdôm anom bơwih ƀong sĭ mơdrô, pơkra pơjing hăng djă pioh gơnam đang hmua ba sĭ pơ tač rơngiao, sit biă ñu lĕ sĭ mơdrô pơ dêh čar Khač, rơngiao kơ tơlơi rơkâo SPS ăt kiăng ngă tui tơlơi pơtrun mrô 280 kơ pơhlôm mơnong ƀong huă hơdjă mơng anom bruă wai lăng sĭ mơdrô pơ tač rơngiao dêh čar Khač, amra dưi ngă tui dong mơng lơ 1/6/2026. Tơlơi pơplih prong hloh lĕ anom bơwih ƀong sĭ mơdrô kiăng čih anăn amăng plang CIFER tơdơi kơ hơmâo anom bruă bơdjơ̆ nao brơi hră pơ-ar lăi pơthâo, plih hĭ hơdôm pok hră pơ-ar hơmâo anom bruă wai lăng djru brơi hlâo anun. Tơlơi anai rơkâo anom bơwih ƀong sĭ mơdrô gơgrong pơjing hră pơ-ar djơ̆ tơlơi phiăn, pơhlôm tơlơi pơhing lăp djơ̆ hăng hơmâo tơlơi glăm ba kơ bruă pơhlôm rơđah rơđông kơ hră pơ-ar čih anăn. Yua mơng tơlơi pơplih kơ jơlan gah wai lăng anai ba tơbiă hơdôm tơlơi kiăng ngă  sit nik kiăng dưi tŏ tui hăng gum hrŏm kơplah wah djop bơnah. Ơi Huỳnh Phú, pơ ala brơi sa anom bơwih ƀong sĭ mơdrô gơnam đang hmua lăi pơthâo hơdôm tơlơi bơngŏt kơ boh thâo hăng hră pơ-ar pơplih tŏ tui.

“Ră anai anom bơwih ƀong sĭ mơdrô gơmơi glăk ngă hră pơ-ar rơkâo pơkra brơi mrô adung anung gơnam hăng hơmâo nô̆p tui tơlơi pơkă hră anai. Yua anun tơdơi kơ lơ 1/6/2026, lơm tơlơi pơtrun mrô 280 sit nik dưi mă yua, hơdôm anom bơwih ƀong sĭ mơdrô ăt kiăng ngă glăi djop hră pơ-ar ƀudah tŏ tui hơđăp hă ƀŭ ?Laih dong, tơdah hơmâo tơlơi gun găn hơget amăng bruă ngă tui hơdôm sang bruă, anom bơwih ƀong sĭ mơdrô hăng gong gai ƀon lan amra rơkâo anom bruă hơpă črâo brơi hmao tlôn ?".

Hơdôm tơlơi bơngŏt anai mơng anom bơwih ƀong sĭ mơdrô brơi ƀuh, tơlơi rơkâo kiăng hloh ră anai kơ sa tơhnal pơkă črâo ba tui jơlan gah “Djă tơngan črâo bruă” lơm hrơi mông kiăng ngă tui giăm laih. Lăi glăi hơdôm tơlơi ngă bơngŏt anai, laih dong pơsit tong tơlơi gir run gum hrŏm mơng gơnong bruă ngă hmua, ơi Ngô Xuân Nam, kơ-iăng Khua anom bruă SPS Việt Nam (Ding jum ngă hmua hăng ayuh hyiăng) brơi thâo, anom bruă hrŏm hăng djop bơnah bơdjơ̆ nao hơmâo hăng glăk ječ ameč lăi pơthâo tơlơi pơhing, djru brơi anom bơwih ƀong sĭ mơdrô mơng bruă pơƀuh ten rup rap sang bruă truh pơ bruă wai lăng hră pơ-ar. Samơ̆ tui ơi Nam, tơlơi gun pran hloh ră anai ƀu djơ̆ kơnong tơnap amăng ngă hră pơ-ar đôč ôh mơ̆ ăt mơng pran gơgrong hăng tong ten mơng anom bơwih ƀong sĭ mơdrô lơm ngă tui bruă čih anăn mă pô:

“Anom bơwih ƀong sĭ mơdrô kiăng kơsem min tong ten hơdôm tơlơi pơkă hăng črâo ba lăp djơ̆. Kâo pơsit tong lơm ta hluh rơđah, thâo djop hơdôm tơlơi rơkâo, bruă čih anăn ngă amra amuñ đôč. Samơ̆, hră pơ-ar kiăng pơhlôm tong ten djop mơta, čih brơi ñu djơ̆, jŭ yap brơi tong ten truh pơ rup rap sang bruă, anom bơwih ƀong. Kơnong ƀuh soh glăi aset đôč amăng hră pơ-ar, arăng amra brơi glăi mơtăm. Lơm anom bơwih ƀong sĭ mơdrô thâo rơđah hơdôm tơlơi pơkă, prap lu tong ten hăng ngă tui djơ̆ mơng blung a, kâo đăo gơnang anom bơwih ƀong sĭ mơdrô Việt Nam lêng kơ dưi pơhlôm djơ̆ tơlơi rơkâo phrâo”.

Ding jum ngă hmua hăng ayuh hyiăng pơsit tong, hăng hơdôm gơnam tam phun anun lĕ sầu riêng, boh troh, gơnam ƀong pơkra mă ƀudah gơnam đang hmua, bruă pơhlôm djơ̆ hơdôm hơnong pơkă SPS amra huăi ngă arăng pơhŭi hlâo, brơi glăi ƀudah lui hĭ ba sĭ mơdrô. Anai ăt lĕ tơlơi yôm phun kiăng djă bong tơlơi đăo gơnang nao gơnam đang hmua Việt Nam lơm bruă bơkơtưn amăng jar kmar glăk kơtang tui.

Lăng glăi pơ tlôn dong, hơdôm tơlơi pơgăn kơ boh thâo ăt glăk ba glăi gal kiăng gơnong bruă ngă hmua pơplih pơkra tui jơlan gah tong ten, rơnuk rơnua hăng hơđong ƀiă dong. Lơm anom bơwih ƀong sĭ mơdrô gơgrong hrưn đĭ klă tui, bơ anom bruă wai lăng kơtưn ngă ha amăng plĕ, djru brơi hmao tlôn, gơnam đang hmua Việt Nam amra hơmâo dong tơlơi gal pok prong anih sĭ mơdrô hăng hrưn đĭ kơdrưh ang amăng anih anom sĭ mơdô amăng jar kmar.

Amăng jơnum “Tŭ mă lăi pơthâo hơdôm tơlơi pơkă kơ pơhlôm mơnong ƀong huă hơdjă hăng wai pơgang kman, hlăt mŏt ƀơi hlô rông, phun pla (SPS) amăng tơlơi pơkôl RCEP hăng tơlơi pơtrun mrô 280 mơng dêh čar Khač” yua Ding jum ngă hmua hăng ayuh hyiăng pơphun ƀơi Dak Lak, ơi Võ Văn Hưng, Kơ-iăng Khua ding jum ngă hmua hăng ayuh hyiăng lăi pơtong, bruă pơsir hĭ tơnap tap brơi anom bơwih ƀong sĭ mơdrô kiăng pok pơhai khut khăt hlâo kơ lơ 1/6/2026 kiăng pơhlôm huăi ngă gun amăng bruă sĭ mơdrô gơnam đang hmua, kyâo pơtâo, akan hơdang pơ tač rơngiao.

“Ƀing gơmơi lêng kơ ƀuăn gum hrŏm gong gai ƀon lan, hơdôm gơnong bruă, sang bruă hăng anom bơwih ƀong sĭ mơdrô kiăng kơ prap lui klă hloh, gơgrong hloh hăng hơdeč hmar hloh lăp djơ̆ hơdôm tơlơi pơkă phrâo. Hơnong pơkă lĕ hrưn đĭ tŭ yua amăng bruă sĭ mơdrô pơ tač rơngiao, pơtrut blơi pơhrui gơnam đang hmua brơi mơnuih ƀôn sang, mơng anun djru brơi gơnam đang hmua Việt Nam ba sĭ mơdrô pơ dêh čar Khač kah hơdôm anih sĭ mơdrô pơkŏn tŏ tui hơmâo lu mơnuih blơi yua, lăp djơ̆ tơlơi rơkâo phrâo pơ anăp anai”.

Lơm bruă sĭ mơdrô pơ tač rơngiao tŏ tui lĕ tơlơi pơtrut yôm amăng pơđĭ kyar bơwih ƀong huă, bruă pơhlôm brơi tơlơi đăo gơnang mơng gơnam hiam hơdjă, ngă tui khut khăt hơdôm hơnong pơkă SPS hăng pơplih hơdeč hmar hăng hơdôm tơlơi pơkă phrâo amra jing tơlơi akŏ phun kiăng gơnam đang hmua Việt Nam pơđĭ kyar hơđong kjăp, pok prong anih sĭ mơdrô hăng pơgôp ba glăi tŭ yua amăng tơlơi bơwih ƀong huă amăng lŏn ia./.