Krah adai pơđiă kơtang lăng amung pơdai tơsă kơñĭ bă hră djop anih amăng hmua na plơi Mỹ Xuân 1, să Hòa Thịnh, ayong Nguyễn Hải Triều dik dăk hrŏm hăng 3 čô mơnuih ngă bruă ñu hlăk mơgăt rơdêh yuă hơprah pơdai ƀơi hmua prong 5 ar (sao) pơdai tơsă laih. Ayong Triều čăng glăi, tal ia ling dăo kơtang aka ƀu hơmâo djơ̆ ôh blan 11/2025, puh pơđuăi, kor abih kông ngăn, dram gơnam sang anŏ wơ̆t pơdai pơjeh pioh lui či rah pơtem bơyan phang hai. Laih ia ling dăo thu, nao kai čuar glăi hmua na, sang anŏ dưi hơmâo kơnuk kơna djru 30 kg pơdai pơjeh, 50 kg hơbâo pruai pioh rŭ glăi bruă ngă hmua. Tơdơi kơ 3 blan rah pơtem pơdai puih phang, wai lăng klă, 5 ar hmua ia gơñu ră anai truh hrơi yuă pơdai yơh.

“Sang anŏ gơmơi ngă 5 ar hmua pơdai ia, rah pơjeh pơdai anăn BĐR999 hăng Đài Thơm. Hnơ̆ng boh thun anai đĭ hloh 20% pơkă hăng bơyan anai thun hlâo. Ƀuh rơđah sa ar yuă hơprah hơmâo 400 kg. Yuă pơdai, ba glăi djă pioh 10 kơsăk tăp huă, dŏ glăi sĭ tla prăk blơi hơbâo pruai, kmơ̆k, ia jrao hăng apah mă bruă”.

Ƀơi hmua ia Hòa Tân Đông, phường Đông Hòa, ơi Trần Văn Hữu hrŏm hăng dua čô ană ñu ăt hlăk dŏ yuă pơdai amăng hmua prong giăm sa hektar, pơdai tơsă abih laih. Bơyan pơdai puih phang thun anai, yua kơ adai gêh găl ƀiă hăng wai lăng tong ten, anun boh pơdai đĭ lu hloh ƀuh rơđah. Ơi Hữu lăi:

“Adai ayuh hyiăng thun anai hơjan akŏ thun gêh găl ƀiă, pơđiă phang djơ̆ hnơ̆ng, anun pơdai đĭ hiam boh jor hloh, him lăng sa ar mơ̆ng 300-350 kg pơdai pơhrui glăi, đĭ hloh 20% pơkă hăng bơyan phang thun hlâo. Sang anŏ gơmơi ngă hmua ia sa hektar, năng ai yuă giong pơhrui glăi mơ̆ng 3,3-3,5 tơn. Sang anŏ mơak biă mă”.

Ơi Nguyễn Thanh Minh-Khua sang bruă ngă hrŏm gah đang hmua Hoà Đồng, să Hòa Thịnh brơi thâo, tơdơi kơ tal ia ling dăo blan 11/2025 laih rơgao, lu sang anŏ mơnuih ƀôn sang răm ƀăm soh, hmua pơdai, pơjeh pơdai hai ia kor wơ̆t hơbâo pruai, kmơ̆k pioh amăng sang, bơbeč prong biă mă kơ bruă ngă hmua bơyan phang. Ngă tui tơlơi git gai mơ̆ng khua mua jơnum min mơnuih ƀôn sang tơring čar Dak Lak hăng yua hơmâo tơlơi djru ba mơ̆ng ƀing mơnuih čơmah, sang bruă ngă hrŏm hmua pơdai gơmơi hơmâo djru 126 tơn pơdai pơjeh hiam, laih dơ̆ng pok anih pơtô brơi hlâo kơ mơnuih ƀôn sang thâo hơdră rah pơtem. Yua kơ anun, bơyan yuă pơdai thun anai pơdai boh jor ƀiă; sang bruă ngă hrŏm bruă hmua ăt prăp lui ĕp sang bruă mơdrô blơi pơdai ngă hơđong nua, kiăng hơmâo anih mơnuih ngă hmua sĭ pơdai hơđong.

“Akŏ bơyan yuă pơdai, Sang bruă ngă hrŏm hơmâo gum hrŏm anom bruă wai lăng bruă pla pơjing hăng pơgang phun pla tơring čar Dak Lak kual 6 pơphun anih pơtô brơi mơnuih ngă hmua thâo hơdră pơhlom pơgang arong aruač, hlăt pơčrăm hmua pơdai, pơtô brơi hơdră wai lăng răk rem hmua pơdai kiăng boh lu, hlom klă. Ră anai, sang bruă ngă hrŏm ăt gum hrŏm ƀing apăn bruă pơtô ba pơtrut pơsur ngă hmua ƀơi să, anom bruă wai lăng tơlơi bơwih ƀong huă să ngă hrŏm 7 boh sang bruă mơdrô brơi nao kĭ hră blơi pơdai mơnuih ƀôn sang sĭ glăi, djru mơnuih ngă hmua hơđong anih sĭ pơdai. Bơyan tŏ tui pơ anăp, sang bruă nbgă hrŏm amra ngă hrŏm dơ̆ng mơ̆n Jơnum min mơnuih ƀôn sang să Hòa Thịnh dăp hơdră djru pơjeh pơdai brơi mơnuih ngă hmua tui Hră pơtrun 112/2024/NĐ-CP”.

Bơyan hmua pơdai puih phang thun 2025-2026, să Hòa Thịnh hăng phường Đông Hòa rah pơtem 4 rơbâo hektar hmua pơdai. Yua hơmâo tơlơi djru ba pơjeh pơdai hăng sa črăn hơbâo pruai kmơ̆k djah djâo, mơnuih ƀôn sang tañ rŭ glăi bruă ngă hmua pơdai bơyan phang. Phun pơdai đĭ hiam, boh jor mơ̆ng 300-400 kg lơ̆m sa ar. Ƀơi anăp kơ tơlơi hŭi ayuh hyiăng adai ƀu klă, djop să ăt prăp lui ngă tui hơdră pơhlom hlâo tañ. Ơi Huỳnh Mỹ Phong, Khua Jơnum min mơnuih ƀôn sang phường Đông Hòa, tơring čar Dak Lak brơi thâo:

“Kiăng pơhlom hlâo boh tŭ yua bruă ngă hmua bơyan puih phang thun anai, ngă tui hơdră pơčrâo “Mơtah pơ sang klă hloh tơsă lui pơ hmua hlung hĭ”, Jơnum min mơnuih ƀôn sang phường hơmâo git gai sang bruă ngă hmua gah hmua pơdai pok pơhai akŏ bruă brơi yuă pơdai mơnuih ƀôn sang, lăng pơdai tơsă mơ̆ng 85-90%, anăm lui pơdai tơsă đơi luh hĭ pơ hmua. Laih dơ̆ng, ăt kiăng huăi bơbeč djơ̆ bơyan hơjan akŏ bơyan juăt hơmâo hơkruah yâo, pler lê̆ ngă răm pơdai, hŭi pơdai čăt pơ đang, khom hơmâo hơdră pơhlom hlâo tong ten”.

Mơ̆ng hơdôm blah đang hmua tom răm ƀăm yua ia ling dăo ngă, ră anai ia iom kơñĭ boh pơdai tơsă, amung lăng nao boh lu brung brăng hiam biă mă, ƀuh glăi ƀơi hơdôm să gah ngŏ tơring čar Dak Lak; ƀu kơnong sa tơlơi mơak djơ̆ bơyan hơpuă yuă jor đôč ôh, dŏ pơsit pran jua kơtang hơmâo gir run bong glăi hăng rŭ đĭ hmua pơdai mơ̆ng mơnuih ƀôn sang ngă hmua pơ anai. Tơlơi djru hrŏm hmao kru mơ̆ng gong gai kơnuk kơna, kual plơi pla, sang bruă ngă hrŏm gah đang hmua laih anun tơhan djop sang bruă kơnuk kơna jing anih tơki, kơnang mơ̆ng mơnuih ƀôn sang dưi găn rơgao hĭ tơlơi tơnap tal lông lăng anun hơmâo sa bơyan pơdai tơsă kơñĭ hiam, bơyan trơi pơđao yâo mơak brơi kơ mơnuih ƀôn sang bơyan phang phrâo thun anai.