Amăng 4 blan akŏ thun anai, tơring čar Dak Lak hơmâo ngă brơi hră 10 kơčăo bruă phrâo tuh pơ alin amăng lu bruă mă, hăng rơnoh prăk giăm 4.800 klai, amăng anun 4 kơčăo bruă gah bruă pơkra ming gơnam sĭ mơdrô boh troh mŏng đang hmua-kyâo pơtâo-mơnong akan hơdang. Hơdôm kơčăo bruă anai lu biă mă ñu pơkra ming răk pioh boh troh hăng añăm mơnong dưi lui sui ƀiă hăng ba yua boh thâo ia rơgơi phrâo pơđăm sui.

Dak Lak ăt pơphun lu jơlan hơdră hơduah ĕp tuh pơ alin, pôr pơthâo, anŏ gêh găl ƀơi tơring čar gah bruă ngă hmua pla pơjing, kah hăng pla pơjing, ming pơkra tơpung kơphê hiam jơman, pơkra gơnam mơ̆ng boh durian ( boh sầu riêng), boh makka. Tui hăng Gơnong bruă Ngă hmua hăng Ayuh hyiăng tơring čar Dak Lak, hơdôm kơčăo bruă anun, tơring čar git gai brơi đing nao hlâo hơdôm kơčăo bruă hơmâo tơlơi ƀuăn ngă tui djơ̆ hơdră pơgang ayuh hyiăng, kông ngăn lŏn glai tŭ yua klă, pơkrem ia jâo, apui yua, kiăng pơgang anih dŏ jum dar rơgoh hơdjă, ngă hmua tui hơdră pơhlom akŏ klôn pơgang anŏ rơgoh hơdjă huăi yua ia jrao, hơbâo pruai lu jrao, pơđĭ rơnoh sĭ mơdrô gơnam tam. Laih dơ̆ng ngă giong ruăi pơkă rơnoh sĭ mơdrô hơđong nua gơnam đang hmua, sa amăng jơlan anăp či ngă bruă kiăng Dak Lak hơmâo atur, kiăo tui ngă djơ̆ tơhnal pơkă pơđĭ kyar thun blan pơ anăp.