Amăng mông jơnum, ƀing khua mua brơi thâo, rơngiao kơ ia yua hăng ia pruih, kual Tong krah hăng Dap kơdư hơmâo truh 94 hnoh ia ƀlang hăng ia pơđao čăt mơng atur lŏn. Tui nai tha prin, nai prin tha Nguyễn Văn Lâm, Khua khul wai lăng ayuh hyiăng lŏn mơnai Việt Nam, anai lĕ tơlơi gal prong kiăng pơđĭ kyar bơwih ƀong huă. Kiăng mă yua tơlơi gal anai, hơdôm boh ƀon lan kiăng tañ pok pơhai bruă dưm dăp abih bang hăng pơhưč tuh pơ alin tuh tia pơkra ming.

Jơnum bơkơtuai “Wai lăng, mă yua hăng pơsur tuh pơ alin pơđĭ kyar kông ngă ia yua pơlir hăng ngă hmua, plơi pla phrâo hăng apui yua mơtah kual Tong krah-Dap kơdư” ăt pok rai tơlơi dưi pơsur tuh pơ alin, pohưč ngăn rơnoh hluai tui ngă hrŏm kơnuk kơna-mơnuih ƀôn sang (PPP) kiăng pơgiong anih anom gơnong bruă ia yua, pơsir hĭ anŏ gun ră anai, anăp nao hơnong pơkă pơđĭ kyar hơđong kjăp brơi đơ đam kual.