Sui thun pơlir hăng kual pla phun boh rơmah ƀơi Tây Ninh, ayong Lê Minh Trung, Khua anom bơwih ƀong hrŏm bruă ngă hmua Minh Trung, brơi thâo bruă lui hĭ ngă tui hră pơkôl amăng pơlir hơbit ngă hmua mah aset tui samơ̆ ăt dŏ mơn. Lơm anun gơnam đĭ kơtang, lu mơnuih ngă hmua sĭ gơnam brơi ƀing sĭ mlia; samơ̆ lơm trun nua luh nao sĭ brơi anom bơwih ƀong hrŏm. Tơlơi anai ngă kơtun nao abih brơi anom bruă blơi pơhrui. Ƀơi anăp kơ tơlơi sit nik anun, anom bơwih ƀong hrŏm Minh Trung khŏm hơdai nao blơi pơhrui tui nua pơkŏn mơn plih hĭ bruă blơi tui nua pơkă mơng blung a. Anom bơwih ƀong hrŏm pơkôl blơi abih gơnam tam, lơm anun prăk duh ngă bruă hơmâo jŭ yap tui mrô prăk pơhrui.

Kar kăi tui anun, ayong Nguyễn Viết Vị, Khua anom bơwih ƀong hrŏm gah bruă ngă hmua Phước Thiện brơi thâo, kiăng pơjing kual pla hơđong ƀơi kual giăm guai Bình Phước hlâo anun, anom bơwih ƀong hrŏm kiăng tuh pơ alin lu biă mă mơng anah phun pla, gơnam măi mok bơwih brơi truh pơ bruă pơjing anăn apăn sĭ mơdrô hăng ĕp anih sĭ gơnam. Amăng hrơi blan bơkơtưn kơtang ră anai, bruă pơhlôm hơđong anih blơi pơhrui hăng tŏ tui pran đăo gơnang nao gơnam đang hmua ƀon lan lĕ tơlơi ngă tơnap tap.

Mah tui anun, anom bơwih ƀong hrŏm juăt dong ƀơi anăp kơ bruă mơnuih blơi pơhrui mơng pơkŏn nao juă nua, ngă nua đĭ kơtang kiăng blơi pơhrui lu, ngă lu mơnuih ngă hmua lui hĭ ngă tui hră kĭ pơkôl. Samơ̆, lơm nua trun, bruă kơtrâ̆o kiăng blơi pơhrui gơnam amra jao glăi anom bơwih ƀong hrŏm tui hră pơkôl pơkă hơđăp.

Anom bơwih ƀong hrŏm djru blơi pơhrui, djru brơi prăk duh pơlir hơbit, samơ̆ lơm ƀuh bruă lui hĭ ngă tui hră pơkôl, ră anai ƀu hơmâo tơhnal pơkă lăp djơ̆ dưi pơhlôm pơgang brơi tơlơi dưi Ayong Nguyễn Viết Vị, brơi thâo: “Hơmâo hơdôm tơlơi gun prong biă mă hăng amra ngă pơrai hĭ hơdôm bruă pơlir hơbit ră anai. Anai lĕ hơdôm anom bơwih ƀong hrŏm, anom bruă sĭ mơdrô ăt aka ƀu hơmâo tơhnal pơkă lăp djơ̆ mơng gong gai hăng ƀon lan amăng bruă mut hrŏm pơlir hơbit hăng mơnuih ngă hmua. Lơm anun, bruă mơnuih sĭ mlia pơplih nua đĭ trun blơi pơhrui gơnam, ngă bruă bơkơtưn ƀu bơkơnar hăng bruă mơnuih ngă hmua ngă soh tơlơi ƀuăn ăt dŏ ƀuh lu biă mă”.

Amăng hrơi blan ba gơnam đang hmua Việt ba hyu tač rơngiao, yă Ngô Tường Vi, CEO kông ti sĭ mơdrô gơnam pơ tač rơngiao Chánh Thu brơi thâo: Hơdôm thun rơgao, anom sĭ mơdrô kơ ñu hơmâo gơgrong mă bruă ƀơi anăp hăng hơdôm sang sĭ mơdrô pơprong hăng anom bruă ngă hrŏm blơi mut gơnam, sit biă ñu lĕ ƀơi hơdôm anih anom sĭ mơdrô dêh čar Khač, kiăng ĕp anih sĭ mơdrô hơđong. Hluai tui hơdôm tal ĕp lăng hăng jơnum pơčrông lô, anom bruă sĭ mơdrô lăng: boh kruăi bưởi mơtah, sầu riêng hrŏm hăng lu phun boh truh pơkŏn mơng Việt Nam hơmâo tơlơi dưi prong pơ anih anom sĭ mơdrô dêh čar Khač, kơnong lăp djơ̆ hơdôm hơnong pơkă gơnam hiam hơdjă.

Samơ̆, bruă ba sĭ mơdrô jơlan phun rơkâo hơmâo tơlơi mut hrŏm hăng amăng plĕ hăng ngă djơ̆ tơlơi pơkă tong ten mơng anom bruă sĭ mơdrô hăng mơnuih ngă hmua. Mơng bruă wai lăng ia jrao pơgang phun ple, hơmâo mrô kual pla truh pơ hơdôm tơlơi ƀuăn jao gơnam lêng kơ ngă tui khut khăt. Kơnong sa tơlơi ngă soh, abih bang glông pơlir hơbit amra bơdjơ̆ nao kơtang biă mă.

Anom bruă sĭ mơdrô ƀu djơ̆ kơnong hajan tơbiă hyu gah rơngiao, hăng mơnuih ngă hmua ăt anăm lăng nao kơnong bruă hơđong yua kơ sĭ hơmâo nua ƀiă hrơi. Tơlơi đing nao blung hlâo lĕ pơjing kual pla hơđong pơhlôm gơnam hiam hơdjă wŏt pơhrui hơmâo lu dong djơ̆ tơlơi rơkâo mơng anih anom sĭ mơdrô. Lơm anih blơi pơhrui pơhlôm, nua phun boh troh Việt Nam kah mơng đi pơmă. Yă Ngô Tường Vi lăi pơtong, tơdah ƀu pơplih tơlơi pơmĭn amăng ngă hmua hăng pơhlôm kjăp pơlir hơbit, mơnuih ngă hmua amra tañ gah đuăi mơng bruă sĭ mơdrô gơnam pơ tač rơngiao: “Rơngiao kơ nua sĭ, neh met wa kiăng pơmĭn nao bruă hơđong amăng blơi pơhrui gơnam mơ̆ hơdôm anih anom glăk pok pơhai brơi neh met wa, anai lĕ bruă mơ̆ neh met wa kiăng pơmĭn nao blung a. Ƀing ta dưi sĭ hơmâo nua hơdôm tơ̆n ƀudah amăng ha thun, samơ̆ neh met wa kiăng ĕp sa anom bruă gum hrŏm mơng hrơi blung a pla pơjing truh pơ hơdôm thun tơdơi dong…Yua anun ƀing ta kiăng pơmĭn ngă hiưm pă kiăng dưi yak nao ataih ƀiă dong”.

Tui ơi Nguyễn Đình Tùng, Khua anom bruă Vina T&T Group, kơ-iăng Khua khul pla añăm tam boh troh Việt Nam, tơlơi đăo gơnam tam mơng Việt Nam glăk hơmâo hơkrŭ glăi kjăp amăng anih anom sĭ mơdrô pơ tač rơngiao. Bruă lu anih juăt ngă glêh tơnap lơm blơi gơnam tŏ tui pok blah amăng lĕ tơlơi gal prong kiăng đĭ tui prăk pơhrui hơđong kjăp brơi mơnuih ngă hmua. Yua anun, mơnuih ngă hmua glăk ƀơƀrư̆ lui hĭ tơlơi juăt pla hơget sĭ gơnam anun, gơgrong tŭ mă hơdôm tơlơi rơkâo boh thâo hăng pơthâo tong ten anih pla kiăng mut hrŏm amăng glông sĭ mơdrô klă hloh.

Mơng tơlơi sit nik ngă bruă, ơi Tùng lăng tơlơi akŏ phun ăt lĕ pran đăo gơnang kơplah wah anom bruă sĭ mơdrô hăng mơnuih ngă hmua. Anom bruă sĭ mơdrô črâo brơi boh thâo hăng ƀuăn blơi pơhrui gơnam; pơ ala glăi, mơnuih ngă hmua kiăng ngă tui hơdră pla pơjing hăng jao gơnam djơ̆ tơlơi pơkôl. Tui tơlơi sit nik, lu anih pơlir hơbit bơwih ƀong ƀu dưi yua hưp ham kiăo tui nua lu hloh ƀơi anăp. Samơ̆, bruă sĭ mơdrô gơnam tam amăng rŏng lŏn tơnah ră anai, bruă bơwih ƀong tui pran hor, ƀu pơlir hơbit amra ƀu bơwih ƀong sui ôh.

Hơdră bruă mơ̆ ơi Nguyễn Đình Tùng dưi pơhrăm glăi mơng tơlơi sit nik, anun lĕ pơphun bơwih ƀong hluai tui hơdôm anom bơwih ƀong hrŏm kiăng mơnuih ngă hmua wai lăng mă hăng kiăo tui lăng tơdruă:

“Ră anai ƀing gơmơi kơnong mă bruă hăng anom bơwih ƀong hrŏm hăng hơdôm grup ngă hrŏm…Lơm anun neh met wa mut hrŏm hăng hơdôm tơlơi pơkă mă, kiăo tui lăng tơdruă. Hăng hlơi pô ngă soh ƀing gơñu amra brơi tơbiă, mơ̆ ƀu kiăng hơdôm anom bơwih ƀong sĭ mơdrô hơmâo tơlơi pơkă hơget ôh. Ƀing gơmơi kiăng kơnong pơhlôm dưi mă bruă hăng ƀing mơnuih mă bruă tơpă sit, ngă djơ̆ hăng hơmâo hrŏm hơnong pơkă hơđong kjăp kiăng pơjing anăn apăn sĭ mơdrô Việt Nam ră anai”.

Lơm hơdôm anih anom blơi mut ba tơbiă hơnong pơkă jai hrơi prong tui, bruă pơlir bơwih ƀong ƀu djơ̆ kơnong lĕ sa tơlơi ruah mă đôč ôh ăt jing tơlơi kiăng ngă. Kiăng gơnam đang hmua Việt Nam ba hyu ataih, bruă gum tơngan ngă tui tơlơi ƀuăn hăng ngă hơbôr đĭ pran đăo gơnang sui pơ anăp kơplah wah anom bruă sĭ mơdrô hăng mơnuih ngă hmua lĕ jơlan kiăng ngă tui./.