Hăng ƀô̆ mơta lăng amlaih yua krong mơta ƀu hơmâo pit đih, bơngơ̆t bơngañ lu, ơi Nguyễn Văn Tấn, dŏ ƀơi thôn 8, să Ia Tô, tơring glông Ia Grai, tơring čar Gia Lai brơi thâo, mlam phrâo rơgao sang anŏ ñu ƀuh ƀing dơ̆p mut nao dua wơ̆t. Lan sang ƀhu kơphê hơmâo kuăt pơga dăng jum dar krep laih, samơ̆ ƀing dơ̆p ăt mut nao kiăng dơ̆p kuăi mă kơphê hlăk dŏ ƀhu ƀơi lan sang. Sang anŏ ñu lĕ hơmâo 3 ha đang kơphê, ră anai hlăk pĕ giong ha mơkrah đôč, năng ai 25 tơn kơphê asăt hlăk tuh lui ƀhu krah lan sang. Tui hăng ơi Tấn, nua kơphê thun anai pơmă, rim sa kơsăk kơphê sĭ hơdôm klăk prăk baih, anun yơh ngă kơ ƀing dơ̆p ƀu hŭi ƀơ̆i mut nao pĕ  ƀudah dơ̆p kơphê.

“Ră anai sa kơsăk kơphê asăt rơbêh sa klăk prăk baih, bơ asar kơphê krô laih sĭ hơmâo mơ̆n hơpluh klăk prăk anun yơh ƀing dơ̆p khin hơtai biă mă ƀu ƀuh djơ̆ ôh kah hăng anai tơđar thun, mlam đĭ pơga, mut amăng war, lan sang dơ̆p kơphê hlăk dŏ ƀhu. Mlam tom brơi đôč, dua wơ̆t khom kiăo đuăi ƀing dơ̆p. Pơ hmua adih gơñu wơ̆k than, ruăč boh, lơ̆m dŏ pĕ ƀơi gah anai, gah adih gơñu nao glăm mă kơsăk kơphê phrâo črô̆ amăng pâo”.

Hrŏm hăng ƀơi tơring čar Gia Lai tui anun, lu tơring čar pơkŏn amăng kual Dap Kơdư hnun soh, bơyan pĕ kơphê arăng dơ̆p kưp kơphê lu biă mă. Mơnuih ngă hmua mơak yua kơphê đĭ nua mơ̆ng 120-130 prăk sa kg kơphê asar krô, samơ̆ mơnuih ƀôn sang ƀơi lu anih ăt bơngơ̆t bơngañ mơ̆n ƀing dơ̆p hyu pĕ, hyu klĕ dơ̆p mă kơphê arăng. Ơi Nguyễn Văn Qúy, dŏ ƀơi plơi Thanh Lâm, să Đức Minh, tơring glông Dak Mil, tơring čar Dak Nông brơi thâo, hơdôm wơ̆t arăng pĕ dơ̆p kơphê ngă kơ mơnuih ƀôn sang pit ƀu hơđong dong ƀu mơak ƀơ̆i amăng bơyan pĕ kơphê.

“Thun anai, kơphê nua yom, mơnuih ƀôn sang pơ anai, lu anih arăng dơ̆p hĭ kơphê tơnap biă mă, čang rơmang grup hyu djru pơgang kơphê kah hăng hơdôm thun hlâo, ngă klă bruă gơñu amăng đơ đam să Đức Minh”.

Hrŏm hăng đang phun pla, tơdron ƀhu, lan sang mơnuih ƀôn sang ƀhu pơdai, kơphê ƀing klĕ dơ̆p ƀu hŭi ƀơ̆i mut nao kuăi mă kơphê hlăk ƀhu amăng lan sang laih anun anih ƀhu kơphê mơ̆ng sang bruă plah anom, kông ty kơphê hai, hơdôm anih tuh ƀhu kơphê lu, arăng glăi mơ̆ng pĕ tuh pơƀut pioh ƀhu sa anih. Ơi Đỗ Giao Hưởng, Khua khul git gai, khua anom bruă kông ty kơphê Ia Blan, tơring glông Ia Grai, tơring čar Gia Lai brơi thâo, tơlơi pơhing arăng klĕ dơ̆p kơphê amăng bơyan pĕ kơphê thun anai ăt tơnap tap biă mă, ƀing gơñu khin hơtai đơi, ngă kơ anom bruă gir run mơai yơh hyu tir ĕp lăng, pơgang hăng pơgăn tơlơi dơ̆p kưp. Hrơi blan hăng anai, khua mua, mơnuih apăn bruă đơ đam amăng kông ty lêng kơ pơtum brơi khul grup tơhan hyu tir, kiăng pơgang phun pla, boh troh kơphê hlăk ƀhu amăng tơdron, lang sang hrơi mlam dŏ wai.

“Hrơi ăt hrup mlam mơ̆n, kah hăng tom brơi hơmâo 4 wơ̆t lơ̆m krah mlam 11-12 mông gơñu mut nao amăng lan ƀhu kơphê mơ̆ng kông ty, bưng mơ̆n ƀing tơhan pơgang kông ty hmao ƀuh hăng kiăo mă gơñu, gơñu đuăi hĭ. Thun anai, rơnoh kơphê pơmă, aka ƀu hơmâo djơ̆ ôh kơ anom bruă kơphê, anun yơh bruă mă pơgang hŭi arăng klĕ dơ̆p khom ngă kơjăp. Mơ̆ng hơdôm hrơi blung a bơyan pĕ kơphê ƀing gơmơi ngă hrŏm kông an să rơkâo gong gai kơnuk kơna djru hrŏm amăng bruă wai pơgang bơyan pĕ kơphê mơ̆ng mơnuih ƀôn sang".

Pơgang đang phun pla, kông ngăn brơi kơ mơnuih ƀôn sang amăng bơyan pĕ kơphê lăi hrŏm, kông ngăn đang hmua boh troh hnun mơ̆n, dưi hơmâo ƀing kông an amăng kual Dap Kơdư pok pơhai ngă tui na nao. Khă tui anun, tơlơi pơhing pơgang rơnuk rơnua amăng bơyan pĕ kơphê thun anai tơnap tap biă mă, yua kơ anun, kông an djop tơring čar, plơi pla ăt prăp lui brơi kơtưn ngă hrŏm tong ten hăng mơnuih ƀôn sang laih anun grup pơgang tơlơi rơnuk rơnua, ngă tui bruă hyu tir, ĕp lăng, biă mă ñu amăng bơyan pĕ kơphê, boh kơphê hlăk tơsă. Trung tá, Đồng Thị Lâm, Khua kông an să Đức Minh, tơring glông Dak Mil, tơring čar Dak Nông brơi thâo:

“Hăng hơbô̆ bruă pơgang boh kơphê bơyan pĕ kơphê kông an să hơmâo lăi pơthâo brơi pok pơhai bruă pơgang ba. Samơ̆, lăng nao kơ tơlơi pơhing sit nik amăng anun, rơngiao kơ bruă jao brơi 6 grup hyu ĕp lăng truh pơ đang hmua tui anih kăng pơpha nao ĕp lăng, 1 grup dŏ mă bruă pơ anih mă bruă, anun mrô tơhan mă bruă ăt lu tui”.

Ƀơi tơring glông Ia Grai, tơring čar Gia Lai, Trung tá Trương Ngọc Ánh Khua grup lăi pơthâo khua mua kông an tơring glông brơi thâo, bruă pơgang đang kơphê mơ̆ng mơnuih ƀôn sang dưi pơphun hăng pơpha lu tal ngă bruă hyu wai pơgang.

“Hăng anăp ngă bruă lĕ “Pơhlôm ba mơ̆ng plơi pla, pơgang ba mơ̆ng djop anih”, ƀing gơmơi hơmâo pok pơhai lu bruă mă hyu tir 3 tal; tal pơ anăp lĕ pơgang tơlơi rơnuk rơnua ƀơi plơi pla, tal dua lĕ kông an să, hăng tal gah rơnuč lĕ tơhan kông an tơring glông. Hrŏm hăng anun, ƀing gơmơi ngă hrŏm bruă hyu tir, ĕplăng djă phao kơtuang, kiăng pơgang rah tơlơi rơnuk rơnua hăng pơgang boh troh đang hmua kơ mơnuih ƀôn sang”.