Dăp hơdră pơkra pra phang ƀơi anih dlông bơbung sang anih hmâo pơ-iă sa hrơi, jing anô̆ amuñ ƀuh amăng hơdră pơkra añăm mơnong rơmô phang sa pơ-iă mơ̆ng anom pơkra añăm mơnong rơmô Tuấn Hậu, tơring kual Phú Túc, tơring glông Krông Pa. Hơdôm čơđeh mơnong rơmô dưm đơr hăng plă tơngan dưi ruah mơ̆ng mơnong hiam jơman hloh, hmâo čơđeh dlông, ƀu hmâo rơmă, tơdơi kơ pơđăm năng ai ñu 60 mơnit hăng gơnam pơƀâo phara ha jăn (biă ñu lĕ hra, rơsun, tỏi, pơhăng lao hăng plăng), amra dưi ba nao phang pơ-iă mơ̆ng 3-4 mông. Ơi Trần Quang Tuấn – Khua Anom pơkra añăm rơmô phang sa pơ-iă Tuấn Hậu brơi thâo, rim hrơi hmâo pơ-iă hiam, ñu phang hmâo 2 wot, mơ̆ng 9h mơguah truh 12h yang hrơi dŏng hăng mơ̆ng 12h truh 3 mông čơtlăm. Ơi Tuấn brơi thâo, mơ̆ng sa gơnam ƀong đưm hlâo mơ̆ng neh wa Jarai ƀơi anai, mơnong rơmô phang sa pơ-iă Krông Pa ră anai jing gơnam dưi ba hyu sĭ hyu djop anih:

 “Añăm rơmô phang sa pơ-iă anai pơphun mơ̆ng añăm ƀong đưm hlâo mơ̆ng mơnuih Jarai, mơ̆ng anun mơ̆ neh wa mă anun pioh ngă añăm ƀong kơ arăng blơi amăng hơdôm hrơi hlâo adih. Kơnong kơ pơđăm gơnam pơƀâo lĕ ƀing gơmơi pơkra tui sang anô̆ juăt pơkra, ƀu djơ̆ tui hăng arăng pơkra pioh sĭ ôh. Rim tal hmâo pơphun kơ hơdôm gơnam mơ̆ng mơnuih pơkra rai gơnam lĕ sang anô̆ hmâo gum hrŏm mơ̆n. Hmâo jơnum ngui sang čơ jak iâo nao lĕ kâo amra gum hrŏm klă pioh lăi pơhưč hơdôm gơnam anai truh hăng mơnuih blơi yua klă hloh”.

Hrŏm hăng Anom pơkra añăm rơmô phang krô sa pơ-iă Tuấn Hậu, lu sang anô̆ ƀơi tơring glông Krông Pa ăt gum hrŏm mơn bruă pơkra añăm mơnong rơmô phang sa pơ-iă, pơjing anăn hmư̆ hing klă hăng dưi tŭ yap lĕ gơnam OCOP mơ̆ng tơring dlông. Yă Hồ Thị Mười – Pô Anom pơkra añăm rơmô phang khô sa pơ-iă Mười Đức tơring kual Phú Túc, tơring glông Krông Pa hmâo tơlơi găn rơgao giăm hmâo 30 thun pơkra añăm rơmô krô phang sa pơ-iă. Tui hăng ñu, rim hrơi, anom ñu pơkra hmâo năng ai ñu 50kg añăm mơnong rơmô. Hơdôm hrơi giăm tết hmâo hrơi pơkra mơ̆ng 5 truh 7 tạ añăm mơnong rơmô pioh sĭ hyu kơ hơdôm anih anom pơkra añăm rơmô krô, ba glăi prăk lu lăp yap ba biă.

 “Ră anai, sang anô̆ kâo ăt glăk hmâo gơnam OCOP 3 asar bôh pơtŭ gưl tơring glông pơsit brơi hăng pơ̆ anăp anai tơring glông ăt hmâo ba tơbiă mơn kơ kâo đĭ 4 asar bôh pơtŭ gưl tơring čar, gơnam pô pơkra rai đĭ hloh hơdôm anô̆ klă hiam hloh, añăm rơmô ăt jơman hloh mơn, kiăng ba hyu sĭ kâo ăt hmâo mơn 4 asar bôh pơtŭ pioh tui anih anom sĭ mơdrô đơ đam dêh čar. Yua kơ tơlơi suaih pral mơ̆ng mơnuih blơi yua kâo ăt anăp nao mơn tơlơi pơhlôm gơnam ƀong hăng hơdôm gơnam hmâo anô̆ klă hloh”.

Amai Hoàng Thị Minh Châu, dô̆ ƀơi tơring kual Phú Cần, tơring glông Krông Pa ăt lĕ mơnuih juăt blơi añăm rơmô phang krô sa pơ-iă pioh brơi kơ sang anô̆ pơ̆ plơi pla pô rim tal Tết truh.

 “Kâo hor ƀong biă añăm rơmô krô phang sa pơ-iă ƀơi Krông Pa, Gia Lai, yua kơ ƀơi anai hmâo anô̆ jơman hơnong hmâo mơ̆ng añăm rơmô, ƀâo jơman, thu khuă, dưi phang hăng pơ-iă kơtang, ƀong hmâo anô̆ jơman phara ha jăn ñu. Rim thun giăm tết lĕ kâo juăt blơi hơdôm kg glăi ngă gơnam mơ-ĭt kơ gop djuai, ơi yă, amĭ ama, adơi ayong”.

Đơ đam tơring glông Krông Pa hmâo năng ai ñu 30 bôh anom pơkra añăm rơmô krô phang sa pơ-iă. Amăng abih bang mrô 29 añăm rơmô OCOP mơ̆ng tơring glông, hmâo 20 mơta añăm mơnong rơmô dưi pơkra mơ̆ng mơnong rơmô kah hăng rơmô ƀu hmâo hak jing ară, rơmô krô pioh along sa čơđeh prong, tơlang sŭ rơmô phang sa pơ-iă, rơmô phang hăng dlông pra... Ơi Nguyễn Đình Nhung – Khua Khul mơnuih ngă đang hmua tơring glôhg Krông Pa brơi thâo: kiăng djru brơi mơnuih ƀôn sang pơđĭ kyar pok prong bruă ngă rai gơnam hăng ba hyu sĭ khul hmâo gum hrŏm hăng hơdôm jơnum min, gơnong bruă, tơring glông pơtrut kơtang lăi pơhing pơtô brơi mơnuih ƀôn sang gum hrŏm klă jơlan hơdră OCOP ngă gal brơi pioh pô gơnam hmâo tơhnal lăi pơhưč gơnam pô, pok prong anih anom ba hyu sĭ.

 “Rim thun khul mơnuih ngă đang hmua tơring glông ăt hmâo mơn kơčăo bruă pơjing jơlan hơdră, biă ñu amăng bruă mơ̆ ba hơdôm gơnam nao gum hrŏm hơdôm mông jơnum ngui sang čơ gơnam mă mơ̆ng đang hmua yua kơ khul mơnuih ngă đang hmua tơring čar pơphun, laih anun hơdôm bôh tơring glông pơkon pơphun ăt tui anun mơn. Črâo ba khul mơnuih ngă đang hmua gưl tơring glông pơphun kơ hơdôm bôh sang anô̆ pơkra sĭ mơdrô gơnam rơgơi, biă ñu hơdôm bôh sang anô̆ hmâo gơnam OCOP, gơnam blơi sĭ tui jơlan măi mok”.

Hăng abih bang pŭ rơmô rơbêh kơ 64.000 drơi, amăng anun biă ñu rơmô ta, Krông Pa glăk pơlar klă anô̆ gal gah mrô rơmô klă hiam. Tơlơi pơkĕ pơlir hrŏm kơplah wah ayuh hyiăng hmâo anô̆ gal, hơdră pơkra phara ha jăn hăng hơdôm hơdră djru gum hmâo djru laih bruă pơkra añăm mơnong rơmô krô phang sa pơ-iă jing bruă ba glăi nua yôm kơ mơnuih ƀôn sang ƀơi anai.

Či anai lĕ, tơlơi bơ ră ruai plah wah pô čih tơlơi pơhing hăng ơi Võ Ngọc Châu, Khua anom bruă ngă hmua hăng pơđĭ kyar plơi pla tơring glông Krông Pa kiăng thâo rơđah anŏ gêh găl, anăp pơđĭ kyar anom bruă rông rơmô čuh tă ngă añăm mơnong ƀhu ƀudah pơhang sa pơđiă ƀơi tơring glông anai kơñ pơgi.

-Bơni kơ ih ơi Võ Ngọc Châu, Khua anom bruă ngă hmua hăng pơđĭ kyar plơi pla tơring glông Krông Pa, hơmâo tŭ ư bưp hăng bơ ră ruai hrŏm kơ jơlan hơdră anai. Ih dưi mơ̆n brơi thâo hơnơ̆ng pơkă lăng abih bang bruă pơđĭ kyar, pơkra ming añăm mơnong rơmô ƀhu sa pơđiă ƀơi tơring glông Krông Pa ta ?

-Ơi Võ Ngọc Châu : Añăm mơnong rơmô ƀhu krô sa pơđiă (Pơ-iă), kiăng lăi ƀhu pơhang thu krô mă amăng sa hrơi adai pơđiă kơtang, jing mơnong rơmô ƀhu krô ƀong jơman biă mă hmư̆ hing ƀơi tơring glông Krông Pa. Añăm mơnong anai hơmâo čih anăn jing añăm mơnong rơmô sa pơđiă Krông Pa, Gia Lai. Hơmâo anom bruă pơgang ngă pô pơčeh phrâo tui mrô pơsit 1319237 lơ 18/3/2022, añăm mơnong rơmô jơman hloh yua pŭ rơmô rông truh 64.000 drơi, ba akŏ amăng tơring čar Gia Lai, rơmô rông djuai mơ̆ng hơđăp amăng plơi pla, rông prưh lui, hyu kiă amăng glai klô ƀong rơ̆k mơda, ia jơngeh amăng tơring glông, anun añăm mơnong rơmô pơ anai jơman hloh, ƀâo bơngưi. Añăm mơnong rơmô jơman phara, hiam, tŭ yua biă mă, hrŏm hăng ƀhu krô amăng pơđiă kơtang sa hrơi man ƀrô djă pioh huăi brŭ hiă laih anun huăi khăng đơi lơi mơ̆n, anun lĕ hơdră pơkra ming añăm mơnong rơmô sa pơđiă mơ̆ng Krông Pa hmư̆ hing, ngă gêh găl pơjing rai mơnong ƀong hiam, jơman hmư̆ hing. Yua mơnong rơmô jơman tui anun, tơbiă rai mơ̆ng ayuh hyiăng lŏn mơnai glai klô, rơ̆k tơ̆k, ia mơñum amăng glai čroh hnoh tơring glông pơjing rai. Ră anai, amăng tơring glông Krông Pa hơmâo 30 mơta gơnam sĭ mơdrô mơ̆ng añăm mơnong rơmô ƀhu krô sa pơđiă, biă mă ñu amăng anun hơmâo 2 mơta gơnam hơmâo pơ anăn gơnam OCOP pơsit rơnoh pơkă 4 asar pơtŭ gưl tơring čar. Yua kơ anun, anai ăt jing kơnuih hiam kơ bruă pơđĭ kyar hăng tơlơi hing ang kơ anom bruă sĭ mơdrô mơ̆ng tơring glông Krông Pa.

-Tui anun, tui hăng ih hơgĕt anŏ ngă hiam hloh pơjing rai ia jơman phara mơ̆ng añăm mơnong rơmô sa pơđiă Krông Pa lĕ ?

-Ơi Võ Ngọc Châu : Anŏ hiam klă hlâo hloh ñu phara biă mă lĕ añăm mơnong rơmô ƀhu sa pơđiă Krông Pa, anŏ ƀâo bơngưi ia jơman mơ̆ng añăm mơnong rơmô, sit čuh tă, ba ƀhu amăng pơđiă kơtang sa hrơi đôč ƀơi Krông Pa, pơjing rai añăm mơnong ñu hơmâo lu mơta anŏ hiam pơƀut glăi phara biă mă. Blung hlâo lĕ, phun ñu añăm rơmô jing djuai rơmô đưm Jarai hơbai ta ƀơi plơi pla, dưi rông prưh phai lui amăng đang rơ̆k mơda ia jơngeh lŏn mơnai glai rưng rơgoh hơdjă amăng kual; ayuh hyiăng adai khô, thu hăng pơđiă kơtang lu. Tơlơi anai, ngă kơ pŭ rơmô ñu gơgrong kơtang, añăm mơnong ñu huin, khuă, ƀong jơman hăng ƀâo bơngưi. Lơ̆m čuh tă, pơkra ming añăm mơnong rơmô, ƀhu amăng sa pơđiă, krô man ƀrô, huin rơ-un muăn, ñu dŏ djă hơnơ̆ng ia jơman, anŏ ƀâo hiam mơ̆ng ñu. Rơngiao kơ anun, hơmâo hơdră gru grua akŏ pơjing rai mơnong ƀong huă phara mơ̆n tui hăng hơdră ƀhu krô añăm mơnong rơmô sa pơđiă ƀơi Krông Pa, ba glăi anŏ găn rơgao tơlơi thâo thăi pơkra ming mơnong ƀong huă phara biă mă sit sĭ kơ arăng blơi ƀong. Hơdôm tơlơi anai yơh pơgôp hrŏm pơjing rai añăm mơnong rơmô ƀong jơman ƀâo hiam, biă mă ñu pơhưč lu mơnuih hor blơi hăng hmư̆ hing amăng tơring čar laih anun amăng dêh čar hai.

-Tui anun, gong gai kơnuk kơna tơring glông hăng lu sang bruă pơkŏn djru hơgĕt pơđĭ kyar gơnam sĭ mơdrô añăm mơnong rơmô krô sa pơđiă anai, kơñ pơgi ni anăp ?

-Ơi Võ Ngọc Châu : Rim thun, Jơnum min mơnuih ƀôn sang tơring glông git gai pơčrâo trun djop anom bruă amăng tơring glông hăng sang bruă kơnuk kơna djru hrŏm pơphun jơnum pơsă anih sĭ mơdrô, lăi pơthâo añăm mơnong rơmô krô sa pơđiă. Rim thun tơring glông ăt mơ-it nao mơnuih ngă bruă, ƀing ngă pô gơnam sĭ mơdrô OCOP, hyu pôr pơthâo anăn gơnam sĭ mơdrô hăng pôr pơthâo añăm mơnong rơmô sa pơđiă amăng tơring glông, hyu pơ lu tơring čar, ƀôn prong amăng dêh čar. Anŏ kiăng pơsit bruă anai lĕ, lăi pơthâo anăn gơnam sĭ mơdrô hăng pôr pơthâo añăm mơnong rơmô thu ƀhu sa pơđiă mơ̆ng tơring glông Krông Pa truh pơ lu anih anom. Kiăng pơđĭ kyar hơđong kơjăp, tơring glông anăp nao djru hơdră pơkra ming tui hơdră măi mok phrâo, anih ƀhu hơdjă rơgoh, pơkra ming djơ̆ lăp čih anăn pok prong anih ba hyu sĭ mơdrô hăng pơđĭ kyar bruă ngă hrŏm ruăi sĭ mơdrô rơnoh yom, gơnam hmư̆ hing amăng tơring glông, mơ̆ng bruă pơkra ming truh kơ sĭ mơdrô. Añăm rơmô thu krô sa pơđiă Krông Pa lĕ jing gơnam ƀong jơman hmư̆ laih, phara biă mă, laih dơ̆ng jing anŏ pơtrut hrŏm pơđĭ kyar bơwih ƀong huă hăng pôr pơthâo rup rap anăn hing ang mơ̆ng tơring glông.

-Hai bơni kơ ih hŏ !