Amăng anun, nua gơnam đĭ ƀơi lu mơta, djru pơhrui glăi prăk mơ̆ng gơnam sĭ kơ dêh čar tač rơngiao đơ đam tơring čar đĭ lu, pơtŏng sit dong bruă yôm phăn amăng hơdră bơwih ƀong mơ̆ng tơring čar. Thun 2024, nua hơdôm mơta gơnam mă mơ̆ng đang hmua ƀơi Dak Lak djă pioh ƀơi rơnoh dlông. Nua kơphê, tiu hmâo hrơi nua đĭ na nao. Tơlơi anai djru mơnuih ƀôn sang, anom bơwih ƀong pơhrui glăi lu prăk, pơjing tơhnal gal kơ gơnam đĭ nua. Bôh tơhnal bruă ngă đang hmua mơ̆ng tơring čar amăng sa thun pơhlôm djơ̆ kơčăo bruă ba tơbiă.

Bruă đang hmua, đang kyâo hăng akan hơdang him lăng hmâo rơbêh kơ 23.450 klai prăk, đĭ rơbêh kơ 4% bơhmu hăng thun hlâo, hloh kơ 0,65% kơčăo bruă. Gơnam tam mơ̆ng Dak Lak hmâo sĭ kơ 70 bôh dêh čar hăng kual lŏn, prăk pơhrui glăi hmâo giăm truh 1,7 klai dolar Mi. Ơi Nguyễn Hoài Dương, Khua Gơnong bruă đang hmua hăng pơđĭ kyar ƀôn lan tơring čar Dak Lak brơi thâo: Thun 2025, gơnong bruă đang hmua hrưn đĭ hmâo abih bang nua gơnam mă mơ̆ng đang hmua, akan hơdang rơbêh kơ 24.700 klai prăk, đĭ rơbêh kơ 5% bơhmu hăng thun 2024. Kiăng hmâo tơhnal anai, tơring čar amra pơđĭ dlông mrô gơnam mă mơ̆ng đang hmua djơ̆ tui tơhnal pơkă sĭ kơ dêh čar tač rơngiao./.