Lăi nao anăp ba tuai hyu ngui ră anai pơđĭ kyar mơtah kiăng lăi pơđĭ hơdjă hăng hơđong kơjăp, anun pơtruh brơi bruă mă pơčrâo brơi anih hyu ngui hiam lăi brơi anăn mơ̆ng logistics anom bruă rơdêh por pơgiăng tuai truh pơ anih či nao, kiăng brơi thâo rơđah  atur ngă bruă, boh yom phun kiăng pơjing rai gơnam sĭ mơdrô kơ tuai hyu ngui, ba glăi tơlơi mơak hloh, pioh kơ tuai jar kmar hor dŏ glăi laih anun pơwơ̆t glăi lu wơ̆t pơ Việt Nam. Tui anun, tuai hyu ngui ƀơi Việt Nam hăng hơdră pơpă kiăng hơmâo tơlơi mơak, pơhưč pran jua ƀing tuai? Anai lĕ hơdră čih tơlơi tơña laih anun kiăng hơmâo anăp ngă bruă či ngă tui phrâo pơhưč ƀing tuai rơnguai mơ̆ng jar kmar rai pơ Việt Nam jai hrơi lu hloh mơ̆ng nai prin tha Võ Trí Thành, Khua anom kơsem min bruă mă djă anăn hmư̆ hing hăng pơhno lăi:

“Bruă tuai hyu ngui ƀơi Việt Nam hăng hơdôm boh pia či lăi pơthâo pơđĭ kyar bruă tuai hyu ngui, anun lĕ tơlơi găn rơgao hyu ĕp lăng hăng dŏ glăi, ngui ngor mơak pran jua dŏ hrŏm amăng plơi pla. Yua kơ anun, tơlơi kiăng ngă, bruă ba tuai hyu ngui Việt Nam kiăng ngă hiư̆m pă, pơphun bruă či ngă hơgĕt pioh pơjing rai anŏ pơblih phrâo pơhưč ƀing tuai, pioh pơđĭ kyar hơđong kơjăp. Anun lĕ tơlơi pơblih ngă pơhưč pran jua ƀing tuai ba glăi, dŏ amăng anŏ gêh găl hăng hơdră bơwih brơi kơ tuai klă hloh”.

Tŭ ư hrŏm hăng tơlơi pơmin djơh hăng anai, ơi Vũ Quốc Trí, Khua čih pioh khul ba tuai hyu ngui Việt Nam, lăi pơthâo anăn pia kơ bruă tuai hyu ngui ƀơi Việt Nam lĕ Timeless Charm, anŏ hiam đut tơhnal:

“Hơdră ngă anai djơ̆ rơ-ua kah hăng jar kmar juăt ngă. Boh pia ăt djă hơnơ̆ng tui anun Việt Nam  hiam rô̆ đut tơhnal, samơ̆ hơdră pôr pơthâo kiăng pơhưč tuai rơnguai hloh. Kâo pơmin lĕ, tơlơi yom hloh ană păn kơ bruă kiăng čih pơhưč tuai jar kmar rai pơ ta, yua kơ anun kiăng čih hăng tơlơi pơhiăp arăng, lui hĭ tơlơi dêh čar ta. Tơlơi pơmin anun mơ̆ng gơmơi lĕ lăi nao kơ anŏ hiam rô̆ mơ̆ng Việt Nam mơ̆ng đưm, ră anai hăng kơñ pơgi. Anŏ hiam anun ƀu thâo krăn thun blan ôh. Ƀu djơ̆ lăi hăng mrô jŭ yap ôh, dŏ hiam amăng lăm dŏ na na.

Bơ ơi Nguyễn Ngọc Bích, Khua anom Rustic Hospitality Group, Khua pơblih pơčeh phrâo kơčăo bruă tuai čuă ngui dêh čar Thụy Sĩ yua kơ tơlơi pơđĭ kyar hơđong kơjăp lăi lĕ, tơlơi găn rơgao thâo thăi mơ̆ng lu thun ngă bruă čơkă tuai hyu ngui brơi ƀuh, kiăng pơđĭ kyar bruă tuai hyu ngui lĕ djop anom bruă mơdrô kiăng ngă hrŏm tong ten, hrŏm hơbit nao ataih hloh pơhrua kơ bruă ngă hlơi kơtang pô anun ngă kah hăng ră anai:

Kâo ngă hrŏm khul mơnuih kơhnăk amăng bruă pơđĭ kyar tuai čuă hyu ngui mơtah mơ̆ng Mekong Startup, gơmơi ƀuh hơmâo lu hơdră samơ̆ ăt sa hơdră mơ̆ng hơdôm boh sang bruă mơdrô đôč. Bruă ngă hiư̆m pă ƀing ta pơlir hrŏm djop hơdră anun, pơjing rai sa glông bruă pơsir brơi kơ abih bang amăng plơi pla dưi pơđĭ kyar mơtah, pơjing rai ruăi rơnoh čơkă tuai hyu ngui mơtah, hăng pơđĭ kyar bơwih ƀong huă mơtah mơ̆ng Việt Nam.

Lăi pơtong kơ tơlơi gơgrong mơ̆ng anom bruă rơdêh por amăng bruă bơwih brơi logistics, ơi Lê Tuấn Anh, Khua anom wai lăng tuai čuă ngui hăng tơlơi pơhiăp jar kmar, Sang hră gưl prong gru grua hiam Hà Nội, lăi lĕ:

Tuai jar kmar rai pơ Việt Nam rơbêh 80% lĕ hăng jơlan rơdêh por. Yua kơ anun, tơlơi ră ruai kơ bruă tuai hyu ngui khom lir hơbit hăng anom bruă rơdêh por, kiăng hơmâo anŏ tong ten hăng pơđĭ kyar. Anŏ ngă hrŏm plah wah hơdôm bơnah yom biă mă. Anom bruă rơdêh por ăt sa  glông pôr pơthâo, pơhưč tañ, yua kơ tuai rai pơ Việt Nam lĕ đĭ rơdêh por soh. Yua kơ anun, amăng bruă mă sit nik, boh pơhiăp, jua pôr, rup rap mơ̆ng Việt Nam pơphun mơ̆ng rơdêh por, anun yơh tơlơi ră ruai kơ bruă rơdêh por jing anih pơphun blung a, pơđut hăng pơwơ̆t glăi kiăng đing nao hloh.

Amăng thun blan jai hrơi hơmâo lu tuai tač rơngiao laih anun lu dêh čar pơhno bruă pơhưč tuai nao ngui amăng dêh čar pô mơ̆ng jar kmar, bruă Việt Nam pok pơhai bruă mă gah rơdêh por pơgiăng tuai hăng čơkă tuai hơmâo hơdră anăp nao kơ djop dêh čar amăng rŏng lŏn tơnah lĕ khom ngă. Bruă kơtưn kiăng thâo krăn anăn păn bruă čơkă tuai bơwih brơi sĭ mơdrô gah bruă čơkă tuai amăng jar kmar, ba yua anŏ gêh găl hăng jơlan rơdêh por pơgiăng tuai, anăp lăng nao mơ̆ng Việt Nam jing anih phun pơčrâo jơlan logistics hơmâo lu tơlơi gêh găl hloh sit tơdron rơdêh por Long Thành ngă giong amăng thun 2025, djop sang bruă mơ̆ng Việt Nam thâo ngă hrŏm hơbit pơđĭ kyar bruă tuai čuă ngui mơtah hăng anih nao ngui, ĕp lăng rơnuk rơnua, jĕ giăm, pơhưč pran jua kơ ƀing tuai jar kmar sit hơmâo rai pơ Việt  Nam laih anun kiăng pơwơ̆t glăi pơ Việt Nam dơ̆ng.