Mah hơmâo tơlơi găn rơgao hơdôm hơpluh thun pla phun mai, samơ̆ ayong Lê Niê Minh Quân, dŏ amăng să Čư̆ Êbua, plơi prong Buôn Ma Thuột, tơring čar Dak Lak ăt bơngŏt kơ bơyan bơnga thun anai yua rơ-ơ̆ rơ-ŏt hăng angĭn dong. Kiăng kơ plai ƀiă ngă sat yua ayuh hyiăng ƀu gêh gal brơi phun mai, ayong Quân kiăo tui lăng na nao, pơplih bruă bơwih brơi kiăng ngă hiưm hơpă brơi bơnga mai bluh rai hiam hloh. Ayong Quân brơi thâo:

“Ră anai glăk amăng hơdôm hrơi kiăo tui lăng hăng bơwih brơi kiăng dưi bluh bơnga hiam hloh kah mơng hơmâo lu mơnuih hor hăng blơi yua”.

Hrŏm hăng mai, đào, cúc đại đoá ăt hơmâo lu sang anŏ ƀơi Dak Lak ruah blơi yua amăng bơyan tết anai. Hơdôm phun bơnga cúc đại đoá pla amăng bung bai prong 1m2 truh pơ 1m5 glăk bluh đĭ tơdơi kơ rơbêh 5 blan pla. Amăng hơdôm hrơi anai lĕ hrơi mông yôm phăn hloh kiăng pơhlôm brơi bơnga sĭ mơdrô nua hă ƀŭ. Yua anun, hơdôm boh sang anŏ pla bơnga cúc đại đoá sĭ amăng bơyan tết kar hăng ayong Nguyễn Thanh Hùng, să Čư̆ Êbua, plơi prong Buôn Ma Thuột, tơring čar Dak Lak kiăng bơwih brơi klă hloh. Rĭm pok hla krô, bơnga añot amra trơ̆i hĭ, pioh rông brơi hơdôm than bơnga pơprong hiam ƀiă. Ayong Nguyễn Thanh Hùng brơi thâo:

“Amăng hơdôm hrơi anai lĕ hrơi mông tuč rơnuč yua anun đang pla bơnga kiăng wai lăng klă. Ƀing gơmơi bơwih brơi bơnga hiưm pă kiăng hla hiam, bơnga huăi ƀuh hlăt ƀong, kiăng bơnga bluh đĭ hiam sĭ brơi mơnuih blơi yua. Mơnuih blơi yua dưi hơmâo sa bơyan čơkă thun phrâo hiam klă”.

Ƀơi plơi pla bơnga Khánh Xuân, phường Khánh Xuân, plơi prong Buôn Ma Thuột, tơring čar Dak Lak, mơng akŏ blan 9-10 tui blan di, hơdôm đang pla bơnga hơmâo pơphun pla hơdôm djuai bơnga ƀiă hrơi anun lĕ bơnga Cúc mâm xôi, cúc vạn thọ, phong lữ thảo…kiăng kơ hmao sĭ mơdrô amăng bơyan čơkă thun phrâo tui phiăn juăt. Yă Phạm Thị Kiều Diễm, đang pla bơnga Hà Mi, phường Khánh Xuân brơi thâo, thun anai, ñu hơmâo pla 2.000 bung bai bơnga cúc mâm xôi. Ayuh hyiăng ăt ƀu gêh gal lơi samơ̆ hăng tơlơi găn rơgao mơng đang pla bơnga, truh ră anai, hơdôm bung bai pla bơnga ăt pơđĭ kyar hiam, pơhlôm brơi bơnga sĭ amăng bơyan tết anai. Yă Diễm čang rơmang truh giăm Tết tui phiăn juăt amra hơmâo lu mơnuih blơi yua hăng ba glăi pơhrui hơđong brơi mơnuih pla bơnga.

“Pla kar kăi hăng rĭm thun mơn ƀu lu tui ƀudah aset ƀiă. Rơnoh sĭ mơdrô ăt kar kăi hăng nua rĭm thun mơn. Sit biă ñu tuai rai lăng ăt lu mơn. Ƀing gơñu ăt hyu čuă lăng hăng rơkâo lui hlâo. Đang pla bơnga ăt čang rơmang tuai rai lăng tơl anih, mơng anun kah dưi sĭ lu bơnga”.

Mah bưp lu tơnap tap yua ayuh hyiăng ƀu gêh gal, samơ̆ hơđong đang pla bơnga ƀơi Dak Lak ăt gir run abih pran jua. Mơng tơngan rơmoăn rơmĕ mơng mơnuih pla bơnga amra hơmâo hơdôm phun bơnga hiam hloh, mơng anun ngă hiam brơi rĭm boh sang anŏ amăng bơyan čơkă thun phrâo anai./.