Dŏ kơnong sa wơ̆t hrơi tơjuh đôč, Jơnum ngui bruă Sầu riêng (Durian) Dak Lak thun 2026 amra sit nik pok pơhai hăng 17 mơta tơlơi jơnum, bruă ngă, ngui ngor anet pơprong či hơmâo.

Dak Lak anăp nao kiăng dưi čih pioh amăng hơdrôm hră Guinness hăng khul rơdêh rŭi pơgiăng boh durian ruăi  nao glông hloh aka ƀu hơmâo djơ̆ ôh, kiăng pơjing anŏ lăp hơdor pioh, pôr pơthâo brơi anăn păn boh sầu riêng-durian Dak Lak truh pơ anih sĭ mơdrô ƀơi jar kmar.

Tơlơi pơmin pơčeh phrâo anai kiăng čih pioh amăng hơdrôm hră Guinness rŏng lŏn tơnah, tơbiă rai mơ̆ng tơlơi kiăng pơđĭ tui anŏ thâo krăn mơ̆ng boh durian Dak Lak amăng anom sĭ mơdrô ƀơi jar kmar. Bruă ngă kiăng hơmâo čih pioh Guinness rŏng lŏn tơnah ƀu kơnong čih pioh gru kơđŏm sa anŏ pơkă phrâo đôč ôh, dŏ pơjing rai gru tơlơi mơak, pơhưč pran jua arăng pôr amăng tơlơi pơhing, pơhưč tơlơi đing nao mơ̆ng ƀing čih tơlơi pơhing hăng gơyut gơyâo jar kmar, mơ̆ng anun kiăng pôr pơthâo rup rap boh durian ăt kah hăng kual lŏn tơring čar Dak Lak hmư̆ hing. Ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lak, Khua khul pơphun Jơnum ngui bruă Sầu riêng Dak Lak thun 2026 brơi thâo, amăng thun blan boh sầu riêng (durian) ră anai hlăk bong ƀơi anăp lu tơlơi lông lăng, jơnum ngui tal anai kah hăng tơhnal bruă gru grua hiam laih anun mông gêh găl pôr pơthâo anăn boh durian-sầu riêng, pơđĭ tui rơnoh yom boh durian Dak Lak amăng anih sĭ mơdrô ƀơi jar kmar.