Khul mơnuih ngă hmua tơring čar Dak Lak, hơmâo 102 khul ngă hrŏm amăng plơi pla, sang bruă khul pơyŭ hăng abih bang 300 rơbâo čô mơnuih ding kơna. Tơdơi kơ pơmut hrŏm sang bruă kơnuk kơna, hơbô̆ bruă gong gai dua gưl ƀơi tơring čar hăng pơmut glăi plơi pla, ƀôn ƀut, grup plơi pla amăng ƀôn prong, bruă kiăng pơblih yua mrô, pơđĭ kyar bơwih ƀong huă lu khul mơnuih hăng man pơdong plơi pla phrâo, kiăng đing nao pơ anăp pơblih kơtang hloh boh yom phun amăng bruă mă, hơdră či mă bruă amăng khul kiăng tŭ yua sit nik hloh.

Ƀơi mông jơnum bơkơtuai, lu khua mua kah pơpha hơdră tom ngă, ba glăi boh tŭ yua hăng rơkâo ngă tui hơdră phrâo amăng khul djơ̆ hăng anŏ kiăng mơ̆ng ding kơna khul, pơtrut pơblih yua mrô hăng pơđĭ kyar lu khul anet, grup mơnuih ngă bruă mut hrŏm sa hnơ̆ng bruă, pơkra ming gơnam sĭ mơdrô pơđĭ rơnoh yom ƀơi plơi pla. Yă Vũ Thị Thúy Hòa, Khua khul mơnuih ngă hmua să Ea Drăng kah pơpha tơlơi thâo thăi tom găn rơgao ƀơi să gơñu:

“Kiăng ngă hrŏm hăng mơnuih ngă hmua lĕ khom thâo hluh rơđah anŏ hơgĕt gơñu či kiăng pioh ta hơmâo hơdră djru ba lăp, djơ̆ tơhnal pơkă. Tơdơi kơ dăp glăi, pơphun bruă mă hơđong laih, hơdră ngă tui phrâo khom pơtô hrăm brơi tum teč, pơčrâo brơi bruă mă tum teč hloh kơ rim čô ding kơna amăng khul, khua khul pioh pok pơhai hăng git gai wai lăng amăng glông bruă hră pơar pơtrun ăt kah hăng dưi pơmut hrŏm abih bang amăng Google Form”.

Hrŏm hăng lu hơbô̆ bruă hơmâo boh tơhnal laih anun, lu khua mua ăt pơčrâo brơi hơdôm anŏ dŏ kơƀah, tơnap tap amăng bruă mă tơdơi kơ pơmut glăi anom bruă kơnuk kơna, boh nik ñu tơlơi kiăng pơblih yua mrô hăng khul mơnuih ngă khua apăn bruă amăng plơi pla. Yă Châu Thị Hồng Thảo, Khua khul mơnuih ngă hmua să Hoà Mỹ rơkâo đĭ tui hăng bruă tom hơmâo sit nik amăng plơi pla tui anai:

“Rơkâo kơ Khul mơnuih ngă hmua tơring čar djru pok anih pơtô pơhrăm brơi hơdră ba yua pơblih yua mrô, pơtô brơi AI kơ djop khul grup amăng plơi pla, grup mut phung mơ̆ng mơnuih ngă hmua, kiăng djop mơnuih amăng plơi, amăng să mơnuih ngă hmua thâo hluh hăng ba yua boh thâo ia rơgơi AI. Boh nik ñu, amăng lu tơlơi hơmâo ră anai, arăng juăt plư pleč leč pơdar amăng plang internet, tơlơi pơhing mơnuih mơnam jing sa tơlơi pơhing lăp đing nao biă mă mơ̆n”.

Ƀing khua mua tŭ ư hrŏm hăng lăi, bruă pơblih ngă tui boh yom phun, pơđĭ tui boh tŭ yua amăng bruă mă khul tañ ngă pơrơđah tui hăng hơdôm bruă mă djơ̆ găl hloh hăng anŏ hơmâo sit nik amăng djop plơi pla, djol khul grup. H’Giang Niê, Khua khul mơnuih ngă hmua tơring čar Dak Lak brơi thâo, lu tơlơi pơgôp hiăp, tơlơi čih lăi pơthâo amăng mông jơnum hơmâo kah pơpha nao rai lu hơbô̆ bruă mă, hơdră mă bruă phrâo tŭ yua laih anun pơdah thâo lu jơlan hơdră kiăng pơsir djơ̆ lăp kiăng pơđĭ tui boh tŭ yua bruă mă kơ khul mơnuih ngă hmua amăng plơi pla.

“Hơdôm boh yom phun hơmâo pơčrong sai nao rai tŭ ư hrŏm laih, kiăng tañ ngă pơrơđah hloh ba jing jơlan hơdră, djop akŏ bruă hăng pơsir djơ̆ găl hăng tơlơi hơmâo sit nik mơ̆ng khul, rim să, plơi pla. Yua kơ anun, rim gưl khul mơnuih ngă hmua, rim khul plơi pla kiăng djă kơjăp tơlơi gơgrong ba, pran jua mă bruă prăp lui hlâo, thâo pơčeh amăng bruă mă mơ̆ng khul mơnuih ngă hmua; pơblih pơčeh phrâo amăng bruă mă, kiăng ngă anŏ pơtrut kơtang hloh, rođah rơđong boh tŭ yua amăng bruă mă mơ̆ng khul ƀơi plơi pla. Ƀing gơmơi amra pơƀut glăi djop abih bang tơlơi pơgôp hiăp, tơlơi rơkâo kiăng kơsem min, pơhrua nao, ba boh yom phun ngă tui amăng djop jơlan hơdră či ngă thun blan pơ anăp”.