Anai lĕ sa amăng hơdôm bruă mă phun amăng mông jơnum ngui sầu riêng Dak Lak thun 2026, hơmâo giăm 400 čơgăn gơnam sĭ mơdrô mơ̆ng 140 boh sang bruă mơdrô amăng dêh čar, 20 sang bruă mơdrô mơ̆ng jar kmar.

Ƀơi anih pơdă gơnam sĭ mơdrô, lăp đing nao hloh lĕ hơdôm gơnam sĭ mơdrô pơkra ming anăp nao gơnam hơdjă rơgoh, ngă hmua mơtah mơda hăng hơđong kơjăp, ăt jing anăp ngă bruă mơ̆ng anom bruă sầu riêng Dak Lak mơ̆n. Lu anom bruă ba glăi lu hơdră tŭ yua hiam, boh thâo ia rơgơi phrâo gah bruă ngă hmua pla pơjing kiăng djru ba mơnuih ngă hmua pla pơjing rơnuk rơnua mơ̆ng bruă wai lăng. Ơi Nguyễn Thanh Điền, khua pơ ala kơ anom bruă mơdrô djru ba gơnam sĭ mơdrô hơbâo pruai hơdjă pioh ngă hmua, ñu lăi anom bruă gơñu ba nao pơdă gơnam sĭ mơdrô kiăng kah pơpha boh thâo ia rơgơi wai lăng arong aruač, hlăt kman amăng phun boh sầu riêng đôč.

“Kơnang kơ tal pơdă gơnam sĭ mơdrô anai, mơnuih ƀôn sang ngă hmua amra thâo hluh tong ten hloh kơ hơdră git gai wai lăng mơ̆ ƀing gơmơi ba rai, biă mă ñu gơnam pơgang phun pla hăng mơnong hơdip, wai lăng hlăt pơčram phun pla. Mơ̆ng anun, djru mơnuih ƀôn sang ngă hmua kiăo tui jơlan hơdră ngă bruă hơđong, tŭ yua hloh hăng djru akŏ pơdong atur ngă hmua Việt Nam pơđĭ kyar kơjăp”.

Nao gum hrŏm mơ̆ng 20 boh sang bruă mơdrô mơ̆ng jar kmar, ăt pơjing rai sa jơlan pơtruh nao rai amăng mông jơnum ngui prong anai. Mơ̆ng djop čơgăn dưm gơnam sĭ mơdrô, bơnah ngă hrŏm mơ̆ng tač rơngiao hơmâo anŏ gêh găl hơduah ĕp gơnam sĭ mơdrô, bơ anom bruă mơdrô gah Việt Nam lĕ, hơmâo mông gêh găl kiăng thâo anŏ či kiăng mơ̆ng anih blơi yua mơ̆ng jar kmar, dưi hơmâo anih lăi pơthâo amăng mông jơnum prong, kiăng djop pô sang bruă mơdrô ƀuh hăng pôr pơhưč gơnam sĭ mơdrô thâo krăn anăn gru hăng pok prong anih anom sĭ mơdrô.

Yă Nguyễn Thị Thu An, Khua Gơnong bruă tuh tia pơkra ming hăng sĭ mơdrô tơring čar Dak Lak brơi thâo, kơnang kơ hơdôm bruă mă, pơtruh nao rai anai, tơring čar kiăng pơđĭ tui rơnoh sĭ mơdrô boh troh đang hmua ƀu kơnong dŏ glăi ƀơi bruă sĭ đôč ôh, dŏ pơđĭ boh tŭ yua hiam, anăn gơnam sĭ mơdrô, bruă pơkra ming hăng anŏ ngă kiăng ba glăi tơlơi hiam klă kơ anih anom sĭ mơdrô. Anai lĕ anăp nao phrâo kơ gơnam sĭ mơdrô boh sầu riêng, kiăng ngă djơ̆ anŏ pơkă mơ̆ng anih anom sĭ mơdrô. Anai lĕ anăp nao kơ boh sầu riêng pơjing rai gơnam OCOP mơ̆ng Dak Lak kiăng mut hrŏm lu hloh hăng anih sĭ mơdrô amăng dêh čar laih anun truh pơ jar kmar.

“Blung hlâo lĕ khom lăi pơthâo gơnam boh sầu riêng Dak Lak hăng mơnuih blơi yua, pơtruh nao rai hăng lu sang sĭ mơdrô hăng ngă bang bơngač tơlơi pôr mơ̆ng tơring čar lĕ ngă gêh găl brơi djop sang bruă mơdrô mă bruă sĭ mơdrô, ăt kah hăng pơtruh nao rai, mut hrŏm lu hloh pơkra ming gơnam sĭ mơdrô hiam hloh đah mơ̆ng ngă djơ̆ anŏ kiăng ba nao pơ anih sĭ mơdrô boh sầu riêng nao pơ ataih hloh”.