Anai jing tal blung a jơnum ngui sâu riêng ƀơi Dak Lăk hơmâo pơphun prong gưl tơring čar, mơ̆ng kơnôl 15/8 truh kơnôl 2/9 ƀơi phường Buôn Ma Thuột, să Krông Pač, phường Tuy Hòa hrŏm hăng hơdôm tơring pơkŏn pla sâu riêng lu.

Mông jơnum ngui hơmâo 17 mơta bruă, hmư̆ hing lĕ jơnum blung a ƀơi Tơdron lăk 10/3; Jơnum bruă pơtruh nao rai abih bang mơ̆ng pơkra truh kơ ba sĭ sâu riêng hơđong kjăp; ngui ngor ƀong huă, čih pioh anăn hmư̆ hing hloh ƀơi Việt Nam hăng 102 mơta gơnam ƀong hơmâo pơkra mơ̆ng sâu riêng; anih pơdă kơnong sâu riêng đôč hăng gơnam OCOP; tour hyu sem lăng đang sâu riêng pơlir hơbit hăng čơkă tuai hyu ngui pel ĕp gru grua - anih anom glai klô; hrŏm hăng bruă ngui ngor adoh suang, pơdă prưng laih anun pơtrut sĭ mơdrô.

Ƀơi mông jơnum mă tơlơi pơhing phrâo, lu mơnuih čih tơlơi pơhing tơña kơ anŏ tŭ yua sit nik mơ̆ng mông jơnum anai hăng mơnuih pla sâu riêng, biă ñu bruă pok prong anih ba sĭ gơnam, pơhưč tuh pơ alin, sĭ mơdrô hăng hơdôm hơnong pơkă pơtŏng lăng anŏ ba glăi mơ̆ng mông jơnum ngui anai.

Lăi glăi kơ tơlơi anai, yă Đặng Thị Thuỷ, Kơ-iăng khua Gơnong bruă hmua hăng ayuh hyiăng tơring čar Dak Lăk brơi thâo, tơring čar glăk ngă ha amăng plĕ bruă wai lăng mrô pơsit anih pla, anih anung gơnam, pioh amăng kơdung, amăng hruh, mă yua boh thâo mrô, lăng glăi dong tơdơi kơ hơmâo pơkra giong hră pơ-ar, pơkra gơnam pơtruh nao rai, pơkra gơnam tong ten, jơman hloh hlâo či ba sĭ, logistics, hăng ba sĭ gơnam pơ lu dêh čar hloh, đah mơ̆ng akŏ pơjing gơnam pơkra mơ̆ng sâu riêng đĭ kyar hơđong kjăp: “Gơnong bruă hơmâo laih jơlan hơdră ngă bruă rơđah rơđông či lăi pơthâo kơ Jơnum min mơnuih ƀôn sang tơring čar hơmâo hơdră pơsir hlom bom mơ̆ng anom bruă anai amăng bruă wai lăng sâu riêng. Gơmơi glăk lăi pơthâo hăng Jơnum min mơnuih ƀôn sang tơring čar ngă hră pơtrun, kiăng pơtrut mă yua boh thâo mrô, amăng anun hơmâo bruă mă 30 hrơi mlăm. Dua dong lĕ ngă tui tơlơi pơtrun pel ĕp sem lăng tơdơi kơ pơkra giong, ră anai hăng bruă brơi mrô anih pla hăng anih anung gơnam amăng hruh, pioh amăng kơthung jing gơmơi ăt pơtrut kơtang mơn, ngă hiưm pă kiăng bĕ hĭ tơlơi pleč ƀlor amăng mrô pơsit anih pla”.

Sâu riêng jing gơnam yom phun mơ̆ng Dak Lăk hăng năng ai 45 rơbâo hektar, thun 2025 pơhrui hơmâo 390 rơbâo tơn, ba sĭ hăng tač rơngiao hơmâo rơbêh 1,1 klai USD.

Tui hăng Anom pơphun jơnum, hrơi ngui ngor anai ƀu kơnong pơƀuh anăn hmư̆ hing mơ̆ng sâu riêng Dak Lăk đôč ôh, ăt anăp nao akŏ pơjing anih pơkra gơnam pơtruh nao rai abih bang, pơtruh ba sĭ, pơhưč tuh pơ alin amăng bruă pơkra gơnam klă, tong ten hloh, logistics, hăng đĭ kyar bruă čơkă tuai hyu ngui. Dak Lăk ƀơ ƀrư̆ ba Tơlơi jơnum ngui sâu riêng jing bruă jơnum prong gưl dêh čar, anăp nao ngă prong gưl jar kmar hlao.

Ơi Trần Hồng Tiến, Khua gơnong bruă gru grua, bơkjăp drơi jăn hăng tuai čuă ngui tơring čar Dak Lăk brơi thâo, hơdôm tour hyu sem lăng đang sâu riêng hơmâo ngă ƀu kơnong bơwih brơi bruă jơnum ngui đôč ôh, hơmâo sem lăng tong ten kiăng jing bruă čơkă tuai hơmâo ngă na nao, ngă brơi bơyan sâu riêng jing anih tuai nao čuă ngui rim thun mơ̆ng Dak Lăk: “Hơdôm tour anai ƀu kơnong bơwih brơi amăng hrơi ngui ngor đôč ôh, tơdơi anai hơmâo sem lăng tong ten akŏ pơjing tour čơkă tuai hyu ngui rim thun mơtăm. Mah ƀu hơmâo jơnum ngui rim thun mơtăm lơi, samơ̆ kiăng abih bang rai ngui pơ Dak Lăk dưi sem lăng bruă pla sâu riêng, hơmâo ƀong boh, sem lăng bruă arăng ngă hmua pla pơjing, pĕ boh, pioh amăng hruh hiưm pă. Tơdơi kơ mông jơnum ngui, gơmơi kiăng rim bơyan sâu riêng lĕ abih bang hơdor hăng hor či rai ngui pơ Đăk Lăk”.