Mơng rơnuč blan 3/2026 truh ră anai, pơ-iă hang sui hrơi ngă kơ 757 ektar hmua pơdai bơyan puih phang ƀơi hơdôm boh să anun lĕ Hoà Thịnh, Hòa Mỹ, Tây Hòa hăng Phú Hòa 2 glăk kơƀah ia yua. Thun hlâo, hơjan ia ling dăo ngă răm rai king ia yua anun hrơi blan sai pơdai bơyan puih phang 2025-2026 kaih ƀiă ha blan pơhmu hăng rĭm thun, ngă kơ pơdai hrôh mơboh djơ̆ amăng bơyan không phang.

Kiăng pơdai huăi djai yua khŏt ia, amăng 10 hrơi rơgao, kông ti TNHH sa ding kơna Dơnao pơkŏng ia Đồng Cam hơmâo mă yua ha wŏt 7 boh măi ƀô̆p ia. Hrŏm hăng hơdôm anih ƀô̆p hơđăp, hơdôm măi ƀô̆p phrâo ăt ba nao mă yua. Ia amăng hơdôm čroh hnoh hơmâo yua abih kiăng kơ ƀô̆p pơhrua nao hơdôm king ia. Ơi Nguyễn Văn Nhành, kơ-iăng Khua kông ti TNHH sa ding kơna Dơnao pơkŏng ia Đồng Cam brơi thâo:

“Hăng đơ đam hmua kơƀah ia rơbêh 700 ektar rôk tui king ia gah dơnung, bruă kiăng ngă lĕ ƀô̆p brơi ia hmao tlôn kiăng huăi ngă hmua pơdai krô kreñ. Tui đăo lăng hlâo mơng anai truh rơnuč blan 4 ăt dŏ pơ-iă hang yua anun amăng rơwang hrơi tơjuh anai hăng tơdơi dong lĕ hrơi mông glêh glar hloh, kông ti ăt pơphun ƀô̆p ia na nao, lơm asar pơdai ñu rơyăk laih, kông ti amra ƀô̆p đĭ aset tui.”

Kiăng bruă pơđoh hyu ia ba glăi boh tŭ yua, hơdôm grup wai lăng king ia kiăng tui lăng tơhrơi kah hăng mlăm, ha bơnah wai lăng hơdôm măi ƀô̆p ia, ha bơnah dong gum hrŏm hăng wai lăng king ia mơng hơdôm anom bơwih ƀong hrŏm gah ngă hmua pok pơhai mă yua ia lăp djơ̆ tui jơlan gah mơng ataih truh pơ giăm; huăi brơi ƀuh bruă mơnuih ngă hmua pơđoh mă ia hơjan ngă tơnap kơ bruă pơpha hyu ia yua. Ơi Đặng Quốc Hòan, grup wai lăng king ia kual Hòa Đồng, Hòa Mỹ brơi thâo:

“Kiăng pơhlôm djop ia yua, ƀing adơi ayong hơmâo kiăo tui lăng 100% kiăng măi dưi ƀô̆p tơhrơi hăng mlăm kiăng pơđoh nao hơdôm kual gah kơdư, ataih, hơdôm hmua pơdai glăk khŏt ia.”

Ăt glăk ƀuh khŏt ia ƀơi hơdôm kual čư̆ siăng gah Ngŏ tơring čar Dak Lak, lơm lu dơnao khŏt ia. Giăm ha blan rơgao, truh 5 hrơi hơdôm boh sang anŏ ƀơi plơi Hòa Sơn, să Sơn Hòa amra nao ƀô̆p ia, ƀing gơñu ƀô̆p mơng ia bơmun khuer mă. Tui neh met wa ƀơi anai, dơnong pơkŏng ia khŏt laih, anun khŏm khuer ia bơmun kiăng ƀô̆p brơi hmua pơdai mah rơngiă lu prăk kak.

“Hlâo anun ƀô̆p ha tal laih, ƀô̆p tal anai dong lĕ tal dua dong, tơdah ƀu hơmâo ia asar pơdai bô mơtăm”.

Ƀơi anăp kơ ayuh hyiăng pơ-iăng hang kơtang ră anai, gơnong bruă ngă hmua hăng ayuh hyiăng tơring čar Dak Lak rơkâo hơdôm anom bruă pel ĕp, lăng glăi tong ten ia yua ƀơi hơdôm boh dơnao pơkŏng kah hăng pok pơhai bruă pơjing čơkă bruă mă yua ia brơi tŭ yua, lăp djơ̆ hăng tơlơi sit nik ia yua amăng rĭm kual, rĭm blah đang hmua, sit biă ñu lĕ ƀơi hơdôm kual him lăng amra khŏt ia, kơƀah ia; laih dong hơmâo hơdră ngă hmua lăp djơ̆, plai ƀiă ngă răm rai yua không phang pơ-iă hang./.