Jơnum hơmâo tơlơi mut hrŏm mơng lu mơnuih pơ ala brơi djop ding jum, gơnong bruă, ƀon lan, khul grup, anom bơwih ƀong sĭ  mơdrô hăng anom  bơwih ƀong hrŏm amăng bruă pla pơjing, sĭ mơdrô sầu riêng pơ tač rơngiao. Amăng mông jơnum, ƀing khua mua hơmâo lăi pơthâo jơlan hơdră yua lông lăng anih pơƀuh anih pla; ĕp lăng tơlơi pơkă sĭ mơdrô sầu riêng pơ dêh čar Khač; laih dong pơlăi nao rai hơdôm bruă yua boh thâo măi mok, wai lăng kual pla hăng pơphun pơkra tui glông. Lu tơlơi pơgôp hiăp mơng anom bơwih ƀong sĭ mơdrô, anom bơwih ƀong hrŏm đing nao hơdôm bruă tơnap tap amăng pok pơhai, sit biă ñu lĕ bruă pơlăi nao rai tơlơi pơhing hăng lăp djơ̆ tơlơi rơkâo ba sĭ mơdrô pơ tač rơngiao.

Ơi Nguyễn Văn Long, Khua anom bruă boh thâo ia rơgơi, Ding jum ngă hmua hăng ayuh hyiăng lăi pơtong amra tŏ tui gum hrŏm kjăp hăng hơdôm boh ƀon lan, anom bơwih ƀong sĭ mơdrô kiăng pơgiong măi mok hluai tui bruă tŭ mă tơlơi pơgôp sit nik, pơhlôm lăp djơ̆ tơlơi rơkâo wai lăng, ngă gêh gal hloh brơi mơnuih pla hăng sĭ mơdrô pơ tač rơngiao.