Anai lĕ sa yak bruă yom biă mă kiăng pơsir hĭ anŏ ngă gun, pơđĭ tui boh tŭ yua sit mă yua ia mơ̆ng bơnư̆ pơkong ia Ia Mơr-ring bruă pơđoh ia yua, ngă hmua prong hloh amăng kual Dap Kơdư. Kơčăo bruă anai, yua Khul wai lăng Tuh pơ alin hăng Man pơkra Bơnư̆ pơkong ia mrô 7 ngă pô tuh pơ alin mă bruă. Hră pơar rơkâo pơblih lŏn glai jing lŏn hmua, dưi ngă tui djơ̆ Tơlơi phiăn wai lăng kyâo glai hăng hơdôm pok hră pơtrun pơdjơ̆ nao; laih dơ̆ng pô anom bruă tuh pơ alin man pơkra bơnư̆ pơkong ia anun ngă giong laih tơlơi gơgrong duh prăk jia pla glăi kyâo glai pơhrua ƀơi anih ngă rơngiă lŏn glai, kyâo pơtâo.

Bruă ngă pơgiong tañ bơnư̆ pơkong ia anai, pling ia rô pơ djop hnoh anet čơƀeng mơ̆ng hnoh prong phun dưi jing sa tơlơi čang rơmang djru pok prong đơ đam lŏn hmua ia dưi truh nao, pruih kơ phun pla, ba glăi boh tŭ yua prong mơ̆ng bơnư̆ pơkong ia Ia Mơr, djru ngă djop ia yua ngă hmua pla pơjing hăng pơtrut tơlơi bơwih ƀong huă -mơnuih mơnam amăng kual gah yŭ tơring čar Gia Lai.