Jơlan bê tông anet kuet kueo mut nao pơ plơi Đại Lộc, phường Bình Thuận, tơring čar Lâm Đồng (hlâo lĕ să Hàm Hiệp, tơring glông Hàm Thuận Bắc, tơring čar Bình Thuận). Dua bơnah jơlan hơmâo đang bơnga dar čuh blang hiam kơtang kơtit, kơnĭ lŏn adai, ia iŏm hiam kah hăng iâu bơyan bơnga glăi. Tơdơi kơ têt, lơ̆m bơnga buai, hlung ƀơi lŏn, ăt jing mông lu sang anŏ mă tơngan, ba glăi ană bă, ană amon nao mă bruă ataih, ƀuăn bưp glăi thun tơdơi dong. Sang anŏ yă Trần Thị Nhẽ, hơmâo 8 čô ană. Hăng ñu, lơ̆m 30 phun bơnga dar ƀơi anăp sang đah, jing ha wơ̆t dong hơmâo tơlơi mơak: “Bơyan bơnga ta ƀuh bơnga dar đah, čuh blang bơnga jing mơak biă. Bơnga dar ta pla tui anai lĕ ană tơčô nao mă bruă pơ ataih tŭ mơn, truh têt lĕ glăi ngui pơ sang yơh, hơmâo pran biă”.

Bơnga dar čuh blang, têt truh laih. Bơnga buai, têt abih mơn. Hăng mơnuih pla bơnga dar ƀơi Hàm Hiệp, phương Bình Thuận, Lâm Đồng, hrơi blan ƀu yap hăng hrơi blan ôh, arăng yap thun phun bơnga dar.

Sang anŏ ayong Hồ Đắc Thuận, klâo rơnuk laih pla bơnga dar, ră anai glăk pla giăm 1.000 phun bơnga dar anet prong amăng đang 1 ha. Ayong Hồ Đắc Thuận hơdor kơ thun ƀơi phun bơnga, amăng anun hơmâo bơnga dar prong hloh rơbêh 80 thun - gru kơđŏm pioh mơ̆ng ơi ñu nao juă lŏn pơ anai: “Rim thun hnun soh, ƀuh bơnga dar lĕ ta ƀuh têt truh laih, abih bang hok kodok, mơak čơkă thun phrâo. Rơnuk ơi kâo hơmâo laih phun bơnga dar pơ anai. Gru grua pla bơnga dar mơ̆ng plơi pơ-ư pơ-ang biă kơ djuai bơnga dar. Bơnga dar pơ anai juăt hơmâo mơ̆ng 5 truh 18 pok, ƀâo hiam phara mơn. Rim thun mơnuih mơ̆ng Bình Định, Huế, Đà Nẵng, mơ̆ng kual Yŭ glăi pơ anai blơi bơnga lu biă”.

Plơi bơnga dar Hàm Hiệp, phường Bình Thuận, tơring čar Lâm Đồng hơmâo hơdôm rơtuh boh sang anŏ amăng hơdôm pluh thun rơgao pla bơnga dar. Têt Bính Ngọ 2026 găn rơgao pơ plơi bơnga dar Hàm Hiệp, tơlơi hơdip pơwơ̆t glăi tui hơđăp, ăt dŏ ngă bruă pla bơnga, čơkăp hla, ƀŏi than. Rim pok bơnga dar hlung ƀu kơnong pơjưh glăi sa bơyan jơnum sang anŏ, ăt pok rai tơlơi đăo kơnang phrâo kơ bơyan bơnga phrâo pơ anăp dong./.