Ƀơi tơdrun mă akan Đông Tác, phường Phú Yên, tơring čar Dak Lăk, 22 boh ƀat tô mă akan pơ ia rơsĭ pơwơ̆t glăi truh laih, djă ba hơdôm pluh tơn akan ngừ ia rơsĭ, sĭ kơ anom mơdrô akan hơdang. Rim boh ƀat tô hơmâo mơ̆ng 50 truh 70 drơi akan ngừ đại dương, dưm dưm hăng mơ̆ng 2,5 truh 3 tơn akan. Kah hăng ƀat tô ơi Phùng Hồng Ánh hơmâo 90 drơi akan ngừ. Ƀat tô ơi Bùi Văn Xông rơbêh 70 drơi. Nua akan ngừ grih kơñĭ akŏ thun phrâo hơmâo hơdôm anom mơdrô brơi rơbêh 100 rơbâo/kg, dưm kơnar hăng hơdôm thun hlâo mơn.

Akan hơmâo lu, nua hơđong mơn, mơnuih mă akan jing hơmâo prăk lu ƀiă. Ơi Bùi Văn Xông, dŏ pơ phường Phú Yên, tơring čar Dak Lăk hok mơak lăi:“Thun anai mơ̆ng akŏ thun nao mă akan tơphă biă, neh met wa jing mơak mơn, thun phrâo mơ̆ sa boh ƀat tô hơmâo tơjuh tơpăn pluh drơi akan lĕ yang brơi kơ ta yơh anun. Akan hơmâo lĕ klă yơh. Nua hai hơđong mơn jing mơak hloh.

Pô song, ƀattô hơmâo hmăi, pô kiăo tui ăt hơmâo prăk mơn, hơmâo prăk či blơi ƀong amăng hrơi Tê̆t Bính Ngọ. Mơnuih mă akan Phạm Đắc Dũng, ƀut plơi 4, phương Phú Yên hok kơdok:“Thun anai adai lăp mơn, angin rơnang phang mơak, akan hơmâo lu. Ta nao dua pluh hơdôm hrơi akan hơmâo dua tơn hơdôm mơtăm, kah pơpha hĭ jing sa čô hơmâo năng ai 15-16 klăk prăk. Adơi ayong bơwih ƀong hơmâo, prăk hơmâo lu hloh mơn”.

Juăt ñu, mơ̆ng blan Chạp truh blan Sa yap tui thun ƀong Tê̆t jing mông akan ngừ đại dương hơmâo lu. Tơdơi kơ kơthel pưh nao, ia rơsĭ hơđong glăi, akan ngư hơmâo glăi dong yơh, anun jing djru mơnuih mă akan hơmâo biă, yua hnun neh wa hơmâo pran či nao pơ ia rơsĭ dŏ glăi pơ ia rơsĭ amăng hơdôm hrơi tê̆t hăng čơkă mông tơkuh thun phrâo ƀơi ia rơsĭ. Sa čô mơnuih mă akan brơi thâo:“Tơdơi kơ kân kĭ sĭ akan, mơnuih mă akan juăt pơdơi hĭ năng ai 1 wơ̆t hrơi tơjuh, giong anun neh wa nao pơ ia rơsĭ dong yơh, ƀong tê̆t hlao pơ ia rơsĭ, yua amăng sa thun kơnong kơ hơdôm blan anai yơh hơmâo akan lu”.

Neh met wa ăt čang rơmang amăng thun phrâo 2026 bruă ngă hmua tơring čar Dak Lăk djru lui hĭ tin ñăn laih anun plih hĭ hăng bruă krăp lăng mơ̆ng ataih anih ƀat tô nao rai kiăng amuñ brơi neh wa amăng bruă ngă hră djru ia jâo mơ̆ng Kơnuk kơna. Ơi Đặng Cu Em, pô ƀat tô akan PY91008TS lăi:“Măi mơit nao tơlơi ta či lăi arăng iâu lĕ tin ñăn anun rơbêh ha pluh thun, ră anai jing sô biă mă yơh, mơit nao ƀu djŏp dong tah. Anun kiăng anom bruă kơnuk kơna lui hĭ bĕ mơit amăng tin ñăn, mă yua măi krăp lăng anih nao rai mơ̆ng ne met wa dong klă ƀiă”.

Hơdôm hrơi tê̆t Bính Ngọ giăm či truh jing hrơi pơ hơdôm boh tơdrun nao mă akan dik dak, ƀat tô mut tơbiă tơthul mơtăm yơh. Neh met wa čang rơmang thun phrâo adai lăp djơ̆, ia rơsĭ hơđong, akan hơmâo lu, bă kơ song, bă kơ hơñôl, hră kak kơñĭ Kual Mi Kô̆ hơmâo lui hĭ, kiăng nua akan ngừ ba sĭ pơ čar rơngiao lu ƀiă dong, djru mơnuih mă akan pơ ia rơsĭ plai ƀiă tơnap tap tơdơi kơ ha thun hơmâo lu hơjan kơthel, ia dăo. Thun phrâo abih bang gum tơngan ba bruă mă akan mơ̆ng tơring čar Dak Lăk đĭ kyar hơđong./.