Amăng hơdôm hrơi giăm Tê̆t Bính Ngọ 2026, rôk dua bơnah hang ia Dạ Nhim, neh met wa pla añăm, hơbơi, boh troh ƀơi hơdôm boh să D’ran, Ka Đô, Đơn Dương...tơring čar Lâm Đồng dik dak nao pơ hmua. Samơ̆, ƀu dik dak mơak mơai tui hăng bơyan pĕ boh buč añăm ba sĭ amăng hrơi Tê̆t hơdôm thun hlâo ôh, yua dah mông anai, mơnuih ƀôn sang pơƀut čoh sur đang hmua, pơkra glăi đing pruih ia hăng tơjŭ pla, pơdjuai phun phrâo.

Ơi Phạm Bích, dŏ pơ plơi Đường Mới, să D’ran brơi thâo, hơjan kơthel ia dăo rơnuč thun 2025 ngă kơ lu blah hmua pla añăm ter hang ia krông Dạ Nhim lŏn čuah, ia kor đuăi, lŏn dor klŏm abih, hơmâo anih đa ia jroh ngă pơčah čơđang abih lŏn. Bruă pla glăi añăm jing rơngiă sui hrơi, rơngiă prăk lu biă. Ƀơi anăp, lu sang anŏ ĕp jơlan čoh sur pơkra lŏn dơ̆ pă lĕ pla tui añăm dơ anun: “Sang anŏ đa pla phun su hào, añăm bơi, boh trong mơsăm, pơhăng. Tui hăng anai ne, lŏn či pla xa lach yơh anai. Truh blan tơƀang kah mơ̆ng buč. Ră anai ƀu hmao dong tah buč sĭ amăng hrơi Tê̆t”.

Amăng tal hơjan kơthel ia dăo rơnuč thun 2025, să D’ran jing sa amăng hơdôm boh tơring răm rai kơtang hloh mơ̆ng kual ngă añăm Đơn Dương, hăng giăm 300 ha đang añăm ba sĭ yua ia dăo kor đuăi abih. Ơi Trương Quang Kiên, Kơ-iăng khua Jơnum min mơnuih ƀôn sang să D’ran brơi thâo, amăng hrơi pơjing glăi đang hmua, gong gai ăt ngă hrŏm djru ba neh met wa mơn, djru brơi neh met wa kơƀah lŏn bơbôr đĭ, čoh sur pơjing glăi hiam lŏn hmua či pla. Laih dong, să ăt rơkâo prăk djru ba neh met wa tañ rŭ glăi bruă ngă hmua pla pơjing: “Ping gah, gong gai iâu pơthưr hăng pơhiăp tom laih hơdôm sang bruă prăk djru brơi neh met wa dưi čan prăk kơmlai aset đôč či rŭ glăi tơlơi ngă hmua pla pơjing tơdơi kơ ia dăo ngă. Gong gai, ping gah ăt pơtrut pơsur neh met wa pơkra ming lŏn kiăng hiam či pla djŏp djuai phun tui bơyan, pla añăm pơtăm kiăng hơmâo prăk. Truh mông anai, bruă pơjing glăi đang hmua tơdơi kơ ia dăo hơmâo ngă rơbêh 70% laih”.

Mah Tê̆t anai, lu sang anŏ pla añăm pơ kual Đơn Dương ƀu hơmâo añăm či ba sĭ ôh, samơ̆ ƀơi hơdôm blah hmua ia dăo, pơtâo klŏm hlâo kơ anun, ră anai bluh čăt đĭ añăm mơtah mơda laih. Anun jing tơlơi hơdip hơmâo rŭ pơdong, pơjing glăi, pok rai tơlơi čang rơmang bơyan pơ anăp amra mơak hloh, hơmâo hloh hăng neh met wa pla añăm pơ anih pla prong hloh mơ̆ng tơring čar Lâm Đồng./.