Ƀơi să Hòa Thịnh, tơring čar Dak Lak-anih răm ƀăm kơtang tơdơi kơ ia ling dăo, tơdơi kơ king hmua bơnư̆ pơkong ia phun Chính Nam dưi ming pơkra glăi giong ƀiă, ia pling glăi pơ hmua na, hmua ia, mơnuih ngă hmua  hneč mă kai čuar, rah pơtem pơdai. Đơ đam đang hmua rơbêh 2.200 hektar hmua puih phang, truh ră anai lu plơi pla, mơnuih ƀôn sang rah pơtem laih ƀiă giong abih. Rơngiao kơ 110 tơn pơjeh pơdai tơring čar djru ba, rơnoh kiăng rah pơtem dưi djop lĕ 180 tơn pơjeh pơdai, tơring čar Dak Lak hơmâo jơlan hơdră brơi djru prăk kơ mơnuih ngă hmua blơi mă pơjeh tui gơñu kiăng, djơ̆ găl bơyan ngă hmua puih phang, kiăng hmao hăng bơyan rah pơtem. Tơlơi mơak ƀuh rơđah pơdah đĭ ƀơi ƀô̆ mơta ană plơi pla, lơ̆m hơmâo tơlơi djru djơ̆ hrơi blan, hmao kru. Ơi Mai Tấn Huy, mơnuih ngă hmua ƀơi să Hòa Thịnh kah pơpha:

 “Mơnuih ƀôn sang ngă hmua bơyan puih phang anai dưi hơmâo kơnuk kơna djru pơjeh pơdai pioh kơ mơnuih ƀôn sang rah pơtem hmao kru, djơ̆ bơyan. Adai ayuh hyiăng thun anai ƀuh gêh găl mơ̆n jăng jai anai, mơnuih ƀôn sang hlong rah pơtem yơh. Čang rơmang truh bơyan hơpuă yuă lĕ boh jor pơdai lu ƀiă”.

Ƀu kơnong ƀơi Hoà Thinh đôč ôh, lu plơi pla kual gah ngŏ tơring čar Dak Lak giăm či rơngiă abih pơjeh pơdai dŏ răk pioh. Tui hăng rơnoh jŭ yap mơ̆ng anom bruă ngă hmua, rơnoh pơjeh pơdai či kiăng pioh rah pơtem bơyan puih phang đơ đam tơring čar lĕ 26.000 tơn. Truh ră anai, hăng tơlơi djru ba mơ̆ng tơring čar, sang bruă mơdrô, sang anŏ mơnuih ƀôn sang, hơmâo laih 15.000 tơn pơjeh pơdai, kiăng hmao djru mơnuih ngă hmua nao rah pơtem. Khă tui anun, pơkă hăng anŏ či kiăng sit nik, đơ đam tơring čar Dak Lak ăt dŏ kơƀah 11.000 tơn pơjeh pơdai, tơring čar ăt djru prăk kăk pioh mơnuih ƀôn sang ĕp blơi mă hơdôm hrơi pơ anăp.

Hrŏm hăng anun, tơlơi djru mơ̆ng tơring čar, mơ̆ng lu sang bruă kơsem min ia rơgơi gum hrŏm mơnuih ngă hmua amăng kual hơmâo tơlơi truh lŏn adai ngă. Bơyan ngă hmua puih phang anai, Anom bruă kơsem min ia rơgơi ngă hmua kual Dơnung Tong krah pok pơhai na nao hơdră djru ba pơjeh pơdai brơi mơnuih ngă hmua kual ngŏ tơring čar Dak Lak. Ơi Nguyễn Đức Thọ, Khua anom bruă jao glăi boh thâo ia rơgơi kơsem min ngă hmua, gah sang bruă kơsem min ia rơgơi ngă hmua kual ter hang ia rơsĭ Dơnung Tong krah brơi thâo, ƀơi lu plơi pla anih hyu ƀơk pơjeh pơdai, hơdôm tơn pơdai pơjeh hơmâo jao tơl tơngan mơnuih ngă hmua.

“Ƀing gơmơi ba pơjeh pơdai phrâo pioh rah pơtem, pơjeh pơdai anai boh lu hloh, laih anun kaih hloh mơ̆n pơkă hăng pơjeh pơdai juăt rah pơtem. Yua kơ anun gơmơi ba pơjeh sui man ƀrô hăng ƀiă blan kiăng pơdai boh jor hloh bơyan puih phang pơ anăp djru djrăi mơnuih ngă hmua”.

Tui hăng rơnoh jŭ yap, truh ră anai đơ đam tơring čar Dak lak hơmâo rah pơtem abih 70% đơ đam hmua na amăng mrô 26.000 hektar hmua bơyan puih phang. Mrô đơ đam dŏ glăi hlăk dưi hơmâo mơnuih ngă hmua rah pơtem pơhrua sit adai ayuh hyiăng gêh găl. Mah rah pơtem kaih hloh pơkă hăng hrơi blan pơkă, samơ̆ hăng bruă ba pơjeh pơdai ƀiă hrơi blan hăng hrơi blan sui man ƀrô, anom bruă ngă hmua ăt čang rơmang pơdai boh jor ƀiă laih rơnoh pơdai bơyan puih phang thun anai ăt djop hnơ̆ng pơkă đôč.

Yă Đặng Thị Thủy, Kơ-iăng Khua Gơnong bruă Ngă hmua hăng Ayuh hyiăng tơring čar Dak Lak brơi thâo, anom bruă ngă hmua hơmâo čih pioh hăng lăng yom biă mă tơlơi djru hrŏm hmao kru, hăng gơgrong ba mơ̆ng ƀing ngă bruă sĭ mơdrô, ƀing pơdrong hơmâo pran jua čơmah hăng djop sang bruă kơsem min ia rơgơi djru ba mơnuih ƀôn sang kual ia ling dăo. Anai lĕ tơlơi ngă yom biă mă djru ba mơnuih ngă hmua tañ rŭ glăi bruă ngă hmua pla pơjing, hơđong tơlơi bơwih ƀong huă. Yă Đặng Thị Thuỷ brơi thâo: Ră anai,Gơnong bruă ngă hmua hăng ayuh hyiăng tơring čar Dak Lak hơmâo git gai djop anom bruă hơmâo tơlơi thâo kơtưn nao tơl plơi pla, pơtô ba mơnuih ƀôn sang ngă tui hơdră pla pơjing djơ̆ rơ-ua boh thâo ia rơgơi laih anun rông hlô mơnong djơ̆ tơlơi pơkă kiăng pơđĭ tui boh tŭ yua amăng bruă ngă hmua hăng čem rông hlô mơnong amăng thun blan pơ anăp anai.

“Anom bruă ngă hmua hơmâo gai gai djop anom bruă hơmâo tơlơi thâo hyu sem lăng hăng pơtô ba mơnuih ƀôn sang djop să hmao rah pơtem djop hăng gêh găl ăt kah hăng pơhlom kơ bruă čem rông hlô mơnong ră anai wơ̆t pơ anăp anai hnun mơ̆n. Laih dơ̆ng, pơtô brơi hmao kru amăng bruă mă pơtô hrăm kơ rim plơi pla pioh kơ mơnuih ƀôn sang ngă hmua hơđong pran jua hăng pơphun ngă bruă rah pơtem”.

Dơ̆ng mơ̆ng hmua na hlăk rŭ glăi tơdơi kơ bơyan ia ling dăo ngă, tơlơi đăo kơnang hlăk glăi hăng mơnuih ngă hmua gah ngŏ tơring čar Dak Lak. Hăng tơlơi djru ba mơnuih ƀôn sang mơ̆ng pơjeh, hơdră pla pơjing truh pơ bruă git gai ngă hmua pla pơjing, mơnuih ƀôn sang čang rơmang biă mă bơyan ngă hmua puih phang thun 2026-2027 amra jing bơyan hơpuă yuă pơdai jor kơtor lu hloh, djru hrŏm ngă hơđong tơlơi hơdip mơda mơnuih ƀôn sang hăng pơđĭ kyar kơjăp tơdơi kơ tal lŏn adai ngă răm ƀăm kơtang.