Tal hơjan ia ling dăo rơnuč blan 11 thun 2025 ngă pơđăm đang pla añăm Bình Ngọc, tơring čar Dak Lak. Anai lĕ plơi pla dong tong krah dua ară ia krông Đà Rằng hăng Sông Chùa. Hơjan ia lip tañ hăng dơlăm, kor đuăi lu kông ngăn gơnam tam mơnuih ƀôn sang, amăng anun hơmâo sa ar bơnga lay ơn phrâo pla giăm 1 wŏt hrơi tơjuh mơng sang anŏ yă Bùi Thị Hồng. Mah thun tha rơma laih, dua rơkơi bơnai ăt gir run pla añăm tam, pla bơnga kiăng hơmâo prăk pơhrui mơ̆ ƀu kiăng gơnang nao ană bă. Dua klăk prăk blơi pơjeh bơnga lay ơn ia kor đuăi, hăng yă Hồng anai lĕ mrô prăk ƀu aset ôh. Ñu brơi thâo:

“Ƀing gơmơi pla lơ 23 blan 10, truh lơ 1 blan 11 ia ling dăo. Phrâo bluh đĭ ia kor đuăi abih ha mơkrah ar, tơdơi kơ ia ling dăo mơnuih pla pơwot glăi ngă”.

“Ayong hyiăng ngă rơngiă, rơkâo lŏn mơnai tla glăi”, tơdơi kơ ia đoh trun, neh met wa amăng plơi pla bơnga Bình Ngọc pơphun pơwot glăi bơwih ƀong ngă hmua. Hlŭ lŏn yua ia ling dăo pioh glăi ngă hiam tui lŏn mơnai hăng djru brơi phun añăm tam, phun bơnga pơđĭ kyar tañ ƀiă. Hơdôm hrơi anai, pran jua mă bruă ăt ječ ƀiă. Rơbêh 40 ektar đang hmua ter ha ia krông ƀuh mơtah mơda mơng añăm tam, mơng bơnga. Neh met wa glăk ječ ameč nao pruai kmơi, pruih ia brơi hơdôm pla bơnga glăi đĭ nua. Ơi Lê Văn Đệ, mơnuih pla bơnga ƀơi kual plơi pla Ngọc Phước, plơi pla añăm tam, bơnga Bình Ngọc brơi thâo:

“Bơyan tê̆t anai sĭ hơmâo hmăi hă ƀŭ ăt aka ƀu thâo hlơi, bơ bruă mă ăt gêh gal ƀiă pơhmu hăng thun rơgao, yua ƀing gơmơi ngă tơdơi kơ hơjan ia dăo, mơng bruă pla truh pơ bơwih brơi, ăt amuñ ƀiă mơn”.

Lơm anun, hăng hơdôm djuai bơnga pla amăng ƀưh, bưp lu tơnap tap ƀiă pơhmu hăng rĭm thun. Yă Phạm Thị Kim Liên, pô sang pla bơnga Đinh Tiên Hoàng, phường Tuy Hòa, tơring čar Dak Lak brơi thâo:

“Bơnga bluh đĭ kaih ƀiă yua bơdjơ̆ nao mơng ayuh hyiăng pơplih. Bơnga cúc bluh tañ ƀiă, bơ phun quất ăt ƀu hiam đơi lơi, yua bơdjơ̆ nao mơng ayuh hyiăng, hlung hla. Bơnga dar kơñĭ truh ră anai ƀuh bluh kơñĭ laih.”

Bơnga dưm amăng ƀưh tơnap pla anai lĕ tơlơi hơmâo ƀuh, bruă sĭ mơdrô tơdu trun ăt ngă mơnuih pla bơnga bơngô̆t mơn. Ƀing mơnuih ngă hmua ăt hơdeč hmar yua tuh pơ alin pla hơdôm ƀưh bơnga pơprong hăng nua mơng 1 klăk prăk pơ glông, ră anai hơdai nao hơdôm djuai bơnga ƀiă hrơi, ƀưh anet, nua aset mơng hơdôm hơpluh truh pơ rơma, năm hơpluh rơbâo. Amai Phạm Thị Kim Liên, pô sang pla bơnga Đinh Tiên Hoàng, phường Tuy Hòa brơi thâo dong:

“Bruă sĭ mơdrô thun anai nua trun ƀiă. Rĭm thun truh ră anai rơdêh rai blơi lu biă mă mơ̆ thun anai ăt hơmâo rơdêh rai blơi samơ̆ aset ƀiă, ƀuh raih daih, yua anun ƀing gơmơi blơi ăt nua trun mơn. Kar hăng ƀưh bơnga anai, rĭm thun sĭ 70,80 rơbâo prăk mơ̆ ră anai sĭ giăm 50 rơbâo prăk phun pơprong, bơ phun găp ƀrô, phun anet sĭ giăm 40, bơ hơdôm phun bơnga anet ƀiă sĭ giăm 15, 20 rơbâo. Anŏ ba truh hrŏm lĕ yua hơjan ia ling dăo, hlơi lêng kơ tơnap tap soh”.

Bơ ơi Lê Văn Đệ, mơnuih pla bơnga lay ơn tê̆t Bính Ngọ čang rơmang:

“Ră anai kâo čang rơmang hơmâo nua ƀiă kiăng neh met wa hơmâo prăk pơhrui glăi dong”.

Kơnong giăm 1 wŏt hrơi tơjuh dong lĕ truh bơyan ngui ƀong tê̆t Bính Ngọ. Lơm anai, ƀơi hơdôm plơi pla bơnga tê̆t gah Ngŏ tơring čar Dak Lak anun lĕ Tuy Hòa, Bình Kiến…hơdôm kơthung Quất, ƀưh bơnga Cúc, bơnga lay ơn sĭ tê̆t glăk bluh đĭ hiam, lăi pơthâo sa bơyan bơnga phrâo glăk glăi. Mah găn rơgao ha thun tơnap tap yua hơjan ia ling dăo, samơ̆ neh met wa ăt gir run găn rơgao tơnap tap hăng đăo gơnang sa thun phrâo truh kih-Hơjan kơthel rơgao laih, lŏn amra bluh đĭ kyâo bơnga./.