Hơdôm hrơi hlâo kơ Tết thun phrâo Bính Ngọ, ƀing ngă kông ñơn amăng anih mă bruă pơkra añăm mơnong rơmô ƀhu krô Huy Vũ Đak Đoa, tơring čar Gia Lai hlăk dik dăk mă bruă črô̆ amăng kơdung, pơpha tui hluai gơnam sĭ mơdrô arăng rơkâo blơi mơ̆ng hlâo. Či akiăng anih dŏ črô̆ amăng kơdung anun, amai Nguyễn Thị Diễm Kiều, pô sang sĭ mơdrô, pơdă lui sa boh kơƀang grê anet, sa boh jam dưm čơđeh añăm mơnong rơmô ƀhu krô, hơdôm boh kơdung dưm gơnam sĭ mơdrô črô̆ amăng kơdung kơsu hơdjă rơgoh hăng sa boh măi telephôn rơgơi hơmâo gai hlă ngă tơkai gơgrong pioh mă rup pơdah thâo online juăt lăi Livestream sĭ mơdrô añăm mơnong rơmô krô mơ̆ng sang anŏ ñu.

Amai Kiều lăi pơthâo tơlơi pơhing: 3 thun hlâo kơ anun, mah gơnam sĭ mơdrô añăm mơnong rơmô ƀhu krô sang anŏ gơñu dưi pơsit jing gơnam OCOP 4 asar pơtŭ gưl tơring čar, samơ̆ ăt tơnap mơ̆n pơhno hăng gơnam arăng sĭ mơdrô gah rơngiao. Hơmâo gơnam sĭ mơdrô blơi pơmut aka truh 100 rơbâo prăk ôh sa kg. Lơ̆m anun, bruă ngă ba yua mrô ia rơgơi tơlơi pơhing, pơdah thâo gơnam sĭ mơdrô djru ngă pơkơđai glăi hăng tơlơi sĭ mơdrô ƀu tơpă. Amai Nguyễn Thị Diễm Kiều brơi thâo, hơmâo blan ñu sĭ mơdrô pơhrui glăi 1 klai prăk hăng lu hră rơkâo blơi gơnam ba sĭ truh pơ dêh čar Singapore.

“Ƀuh rơđah, sĭ mơdrô raih daih đĭ tui mơ̆ng 10%-15%, samơ̆ boh tơhnal dưi pơhrui glăi lĕ hơmâo hră pơkôl blơi lu, sĭ mơdrô prong. Mrô bơnah blơi thâo yua plang tơlơi pơhing online lu biă mă. Bruă pơblih ba yua mrô tui anun djru ba kông ty sang anŏ ñu lu biă mă. Lơ̆m tơlơi ră ruai kơ hơdră pơkra ming gơnam sĭ mơdrô bang hyu lu, ră anai lu mơnuih tŭ mă hăng thâo hluh tong ten yua hơgĕt rơnoh sĭ pơmă hloh; ƀing tuai blơi ră anai arăng thâo hruaih biă ruah gơnam sĭ mơdrô. Lu boh kông ty đing nao anŏ tŭ yua hiam hơmâo kĭ pơkôl hăng ƀing gơmơi lu biă mă”.

Ƀơi kông ty pơčruh ngăn ngă hmua A griS Gia Lai, phường Ayun Pa, Gia Lai, bruă ba yua ia rơgơi mrô hơmâo pok pơhai sang amăng plĕ hăng khut  khăt amăng bruă wai lăng anih pla hăng tơbâo hlâo či pơkra sik. Tui hăng Trần Thị Lê-Kơ-iăng khua kông ty, bruă ba yua boh thâo ia rơgơi mrô djru kơ sang bruă mơdrô gơñu pơsir tŭ yua biă mă hơdôm tơlơi jŭ yap prăk kăk, tuh pơ alin djơ̆ hơdră, laih dơ̆ng rơđah rơđong hloh abih bang djop črăn amăng bruă mă. Boh nik ñu, amăng bruă pơhrui tơbâo, hơmâo lăng nao kơ ling pơčrâo amăng hră lơkak anih pla, jơlan nao, thâo krăn hlơi pô wai lăng rim đơ đam hmua đang tơbâo, kiăng huăi lŭk pŭk, huăl kơduăl amăng mrô sang anŏ pla tơbâo kiăo tui tong ten akŏ bruă dăp hlâo hăng ba glăi boh tŭ yua hiam klă amăng sang măi.

Ƀu dŏ glăi anun ôh, hơdôm boh tơhnal blung a, A gris Gia Lai ăt pok pơhư prong tui pơblih yua mrô kơnang kơ hơdôm jơlan hơdră Demo Farm. Sang bruă mơdrô hơdai gum hrŏm lu mrô rơnoh pơprong amăng hră pơčrâo ling lơkak, anih lŏn pla, đang tơbâo, pơkă lăng ayuh hyiăng hlim hơjan pioh lăi lui hlâo hmao kru brơi mơnuih ngă hmua thâo pơhlom pơgang, pla djơ̆ hrơi blan, pơgang djơ̆ mông, hơdră pla răk rem wai lăng arong aruač hlăt pơčram. Bruă ngă pơrơđah rơnoh tuh pơ alin, hơdră ngă hmua hăng hơdră pơgang djơ̆ găl tui hluai lŏn mơnai anih pla, anun ba yua dưm truă gơnam mă bruă ia rơgơi hơđong kơjăp, djru mơnuih ngă hmua hơđong tơlơi hơdip mơda. Yă Trần Thị Lê brơi thâo:

“Kơ bruă ba yua boh thâo ia rơgơi mrô, ră anai kông ty ngă tui amăng bruă git gai wai lăng tui rim blah đang hmua. Ƀing gơmơi lêng kơ pơkă, kač rup ling lăi pơthâo amăng hră lơkak MapInfo. Bruă wai lăng tum teč rim blah đang hmua kơnong dưm črăn pơthâo ia rơgơi amăng măi komputer dưi wai lăng djop rơdêh pơdŭ pơgiăng TMS djru bruă koh pơhrui tơbâo djơ̆ đang hăng djop hmua. Rơnoh tơbâo laih pơhrui glăi ba pơ sang măi amăng 24 mông, pơmut abih tơbâo mơnuih ƀôn sang pô hmua, anun huăi rơngiă hăng huač hĭ ôh”.

Pơblih yua mrô pơjing rai lu tơlơi pơblih klă amăng bruă ngă hmua ƀơi Gia Lai. Đơ đam tơring hơmâo jao brơi 308 gru mrô anih pla, ngă đang hmua đơ đam rtơbâo truh 10.700 hektar, amăng anun hơmâo 255 gru mrô pơkă anih pla pioh sĭ mơdrô hăng tač rơngiao rơbêh 10.240 hektar hăng 53 gru mrô pơčrâo anih pla pioh sĭ mơdrô amăng dêh čar, dưi djop boh thâo ia rơgơi tơlơi pơkă hnơ̆ng mơ̆ng anih sĭ blơi hlong truh pơ dêh čar Japan, Hàn Quốc, Khač hăng kual Mi kô̆.

Lơ̆m bruă sĭ mơdrô, jai hrơi hơmâo lu mơnuih ngă hmua, sang bruă ngă hrŏm hăng sang bruă mơdrô prăp lui ba gơnam sĭ mơdrô mơ̆ng đang hmua pôr pơthâo amăng plăng điện tử, sĭ mơdrô ƀơi anăp hai  hăng mơnuih blơi gêh găl soh. Thun 2025, mrô rơnoh sĭ mơdrô amăng diện tử mơ̆ng Gia Lai đĭ 9 hnơ̆ng pơkă, dong tal 37/73 boh tơring čar, ƀôn prong hlăk aka pơmut, ƀuh rơđah boh tŭ yua amăng bruă ba gơnam sĭ mơdrô pơthâo amăng plang internet jing ba yua ia rơgơi mrô.

Yă Nguyễn Thị Bích Thu, Khua anom bruă pơsur ngă hmua hăng ĕp anih anom sĭ mơdrô gah Gơnong bruă tuh tia pơkra ming hăng sĭ mơdrô Gia Lai brơi thâo, hơdôm gơnam sĭ mơdrô hơmâo pơthâo amăng plang internet, tui anŏ ia rơgơi mrô lĕ gơnam amuñ hloh arăng blơi, yua gơnam juăt blơi amăng điện tử, arăng ba nao tơl sang:

“Tơdah lăi hơdôm gơnam sĭ mơdrô ba yua ia rơgơi mrô ƀuh rơđah, anun lĕ gơnam đang hmua  pơkra hơdjă rơgoh, tui hơdră sĭ mơdrô pơgang rơnoh yom. Mơ̆ng črăn pla pơjing truh koh pơhrui hăng pơkra ming hơmâo ngă tui sa dơnuai sir krep mơ̆ng anih phun, pơčrâo tong ten pô pơkra ming, truh lŏn mơnai anih ngă hmua pla pơjing hơmâo hră pơsit tong ten soh. Hơdôm mơta gơnam anai, ră anai hlăk pơtruh brơi kơ mơnuih blơi yua lu biă mă. Gah sang bruă ƀing gơmơi, amra hơmâo lu jơlan hơdră djru ba, ngă hrŏm pôr pơthâo kiăng djru kơ sang bruă mơdrô pơđĭ kyar hloh”.

Yă Nguyễn Thị Bích Thu, Khua anom bruă pơsur ngă hmua hăng ĕp anih anom sĭ mơdrô gah Gơnong bruă tuh tia pơkra ming hăng sĭ mơdrô tơring čar Gia Lai lăi dơ̆ng, amăng hră pơtrun jơnum ruah khua ping gah tơring čar Gia Lai tal sa, rơwang bruă thun 2025-2030 hơmâo pơtong rơđah, ba yua mrô ia rơgơi phrâo jing jơlan hơdră pơblih kơtang, pioh pơđĭ kyar boh thâo ia rơgơi tơlơi pơhing, pơblih pơčeh phrâo hăng bơwih ƀong huă mrô, lir hơbit hăng pơblih bruă ngă hmua pla pơjing laih anun pơđĭ tui boh tŭ yua, tơlơi pơhno sĭ mơdrô. Anăp nao bruă ngă anai, amra jing gai pơčrâo phun pioh ba yua ia rơgơi mrô hơmâo pok pơhai sa amăng plĕ, lu hloh, prong tui, pok jơlan kơ bruă ngă hmua ƀơi Gia Lai yak nao amăng anih anom sĭ mơdrô phrâo hăng boh tŭ yua, djă pioh mrô rơnoh hăng pơhlom rơnoh yom hơđong na nao.