Hơbô̆ bruă dưi pok pơhai ngă tui ƀơi să Krông Ƀŭk. Ƀơi đơ đam pla năng ai 150 hektar (ha) boh durian, Kông ty pơkă hnơ̆ng tơlơi dưi gah bruă ngă hmua, ba yua boh thâo ia rơgơi phrâo Hồng Thuận, lông pla lăng pơsir kiăng boh amăng bơyan phang ƀơi 15 ha laih anun hơmâo boh bơyan phang thun blung a, amra pĕ amăng bơyan 3 anai mơtam. Tui hăng tơlơi sem lăng čih pioh amăng đang hmua, phun boh durian thun tal 7, boh lơ̆m sa phun mơ̆ng 25 truh 35 asar boh, pơkă kg mơ̆gn 90-110 kg sa phun, pơ alin abih bang lơ̆m sa ha truh 12 tơn.

Nao hrŏm khul grup hyu mă bruă, hơmâo Kơ-iăng nai tha prin-nai prin tha Nguyễn Văn Minh, Khua anom bruă pơtô gah bruă ngă hmua, sang hră gưl prong Đại học Tây Nguyên, brơi thâo, rơnoh sĭ boh durian, sầu riêng bơyan phang ră anai 160 prăk sa kg, pơmă hloh dua wơ̆t pơkă hăng bơyan pĕ boh jing bơyan hlim. Mah boh amăng bơyan phang ƀu lu đơi ôh, samơ̆ yua boh hiam klă, rơnoh sĭ pơkă, anun yơh boh tơhnal pơhrui glăi kơ tơlơi bơwih ƀong huă ăt đĭ đăi mơ̆n.

Gah sang bruă mơdrô pô tuh pơ alin ngă tui hơbô̆ bruă anai, ơi Vũ Văn Cẩn, Khua kông ty pơkă hnơ̆ng tơlơi dưi Ngă hmua ba yua boh thâo ia rơgơi phrâo Hồng Thuận brơi thâo, anăp nao pơblih phrâo gah anom bruă pơkra ming gơnam sĭ mơdrô, sang bruă mơdrô tuh pơ alin rơnoh prăk lu hloh. Khă tui anun, ăt kah hăng lu pơjeh djuai boh durian pơkŏn mơ̆n ƀơi Dak Lak, yua pla plah wah amăng đang kơphê, kơsu anun ƀu dưi tŭ mă gru mrô pơkă anih pla kah hăng anih ngă hmua dơnong pla sa mơta pơjeh durian, tơlơi anun ngă tơnap amăng bruă ba sĭ mơdrô pơ tač rơngiao. Tơlơi anai yơh kiăng djop gưl anom bruă kơnuk kơna sem glăi.

Tui hăng ơi Nguyễn Hắc Hiển, Khua anom bruă wai lăng phun pla ngă hmua hăng Pơgang phun pla tơring čar Dak Lak, anai yơh anŏ ngă gun prong hăng anom bruă pla boh sầu riêng anăn phun gơ̆ boh durian ƀơi tơring čar:

“Tui hăng Hră pơtrun 38/2026, hơmâo čih pơkra samơ̆ aka ƀu ngă tui sit nik ôh kơ bruă wai lăng anih pơkă gru kơnăl đang dŏ pla hơdôm đơ đam hmua hlăk pla ră anai kah hăng ƀu dưi ngă brơi hră tŭ mă mrô gru kơnăl pơkă anih pla ôh, yua kơ pla hrŏm plah wah amăng đang kơphê hăng phun pla pơkŏn. Ră anai, anom bruă nao sem lăng tơlơi anun lĕ tơhan kông an, ƀing gơñu mut mă bruă ăt tơnap mơ̆n. Ta ngă soh glăi lĕ hiư̆m thâo”.

Tơdơi kơ hmư̆ tơlơi pơgôp hiăp mơ̆ng sang bruă mơdrô hăng hơdôm sang bruă hơmâo mơnuih kơsem min tong ten sa hnơ̆ng, ơi Đỗ hữu Huy, lăng yom hơbô̆ bruă pla boh durian sầu riêng bơyan phang, jing anăp ngă bruă lăp brơi pơlar tui lu. Boh durian tơring čar Dak Lak hlăk lu tui hăng amra pơhrui truh 1 klăk tơn, pơtum nao amăng klâo blan bơyan hlim hăng bơyan akŏ puih đôč, anun ngă kơtrâ̆o kơ bruă djru blơi sĭ abih sa wơ̆t hăng logistics. Yua kơ anun, bruă pơđĭ kyả bruă pla boh sầu riêng, boh durian amăng bơyan phang lĕ ƀu kơnong djru kơ boh tơhnal bơwih ƀong huă pơđĭ kyar đôč ôh, dŏ djru amăng bruă pơpha gơnam sĭ mơdrô, phara bơyan amra ngă djhul ƀiă anih blơi ba sĭ mơdrô. Ñu rơkâo ƀing mơnuih kơsem min ia rơgơi phrâo djru hrŏm hăng sang bruă mơdrô kiăng pơtong glăi ten boh tŭ yua, hnơ̆ng boh ñu, ngă giong rơnoh pơkă boh thâo phrâo hăng hơdră kơsem min kiăng pơlar tui prong hloh kơñ pơgi ni anăp.

Khua mua tơring čar ăt pơtă pơtăn kơ bruă pơtong glăi mrô rơnoh gah anom bruă pla boh durian, pơblih yua mrô hlăk pơtrut kơtang. Dak Lak ră anai hơmâo rơbêh 30% rơnoh kơphê hăng boh durian amăng dêh čar ta, samơ̆ rơnoh prăk sĭ mơdrô hăng dêh čar tač rơngiao dua anom bruă anai ƀơi tơring čar hơmâo 23%. Yua kơ anun, Khul ngă bruă sầu riêng, khul kơphê hrŏm hăng lu sang bruă mơdrô laih anun sang bruă kơnuk kơna git gai wai lăng ngă hrŏm jŭ yap glăi abih bang, lăi pơthâo tơlơi pơhing djop djel, tơpă ară, djơ̆ tong hloh kơ rơnoh sĭ mơdrô mơ̆ng gơnong bruă anai, ngă atur kơ bruă git gai wai lăng hăng jơlan hơdră pơphô pơ anăp adih.

Hăng hơdôm tơlơi dŏ gun pơdjơ̆ nao kơ gru kơnăl pơkă  anih pla, anih ngă hmua, ơi Huy rơkâo djop sang bruă hơmâo tơlơi thâo ten mơ̆ng kơnuk kơna, jŭ yap glăi, ngă giong hră pơar hăng rơkâo hăng ding jum, anom bruă pơ gơnong dlông sem glăi kiăng pơsir hĭ:

“Gah gong gai kơnuk kơna lĕ ăt hơmâo tơlơi rơkâo đĭ; ăt ngă tui na nao hăng Ding jum kông ngăn lŏn glai brơi nao sem lăng. Dua dơ̆ng lĕ prăp lui djop tơlơi pơhing, hơdră či ngă bruă, boh nik ñu tal plĕ hră ruah khua pơ ala mơnuih ƀôn sang dêh čar dơ̆ng, anun lăi pơthâo hăng ƀing pơ ala mơnuih ƀôn sang ƀơi gơnong dlông thâo, kiăng thâo tong ten ƀơi anăp bruă ngă ră anai. Laih dơ̆ng pơ anăp anai jơnum ƀing khua pơ ala mơnuih ƀôn sang dêh čar, kiăng dưi rơkâo čih pơkra hră pơtrun, ba tơbiă pioh pơgôp hiăp kiăng djơ̆ lăp”.