Hơbô̆ bruă hơmâo ngă ƀơi să Krông Ƀuk, prong năng ai 150 ha đang sâu riêng. Amăng anun Kông ti gơgrong tui prăk pơčruh ngăn ngă hmua hăng boh thâo phrâo Hồng Thuận lông ngă lăng bơnga čuh blang ƀu djơ̆ bơyan ƀơi 15 ha, laih anun mơboh laih, him lăng pĕ amăng blan 3 anai.

Tui hăng tơlơi čih pioh ƀơi đang hmua, sâu riêng thun tal 7 dưi hơmâo 25-35 boh, ha phun dưi hơmâo 90-110kg, dưm dưm giăm 12 tơn/ha. Ră anai, nua sâu riêng ƀu djơ̆ bơyan ba sĭ pơ čar rơngiao năng ai 160 rơbâo/kg, pơmă dua wơ̆t pơhmu hăng amăng bơyan sâu riêng. Pơtŏng glăi ƀơi mông sem lăng, Kơ-iăng khua ping gah tơring čar ơi Đỗ Hữu Huy lăi, bruă ngă sâu riêng ƀu djơ̆ bơyan jing tơlơi ta kiăng pơtrut pran jua, kiăng bơwih ƀong hơmâo, laih dong thâo kah pơpha bơyan pĕ pơhrui, plai ƀiă ngă tơnap bruă ba sĭ gơnam./.