Sang anŏ yă Nguyễn Thị Mai, dŏ amăng plơi Phú Yên 1, să Ia Hiao, tơring čar Gia Lai phrâo koh giong 3 ektar tơbâo, pơhrui glăi rơbêh 240 tơ̆n. Tơdơi kơ duh hĭ prăk tuh pơ alin, sang anŏ yă Mai pơhrui glăi giăm 100 klăk prăk. Tơlơi hok mơ-ak đĭ dua wŏt lơm koh hơmâo, nua đĭ, laih dong hơmâo sang măi djru brơi prăk tuh pơ alin hăng pơphun dưm dăp pla tañ ƀiă.

“Tơlơi hok mơ-ak prong hloh thun anai lĕ sang măi blơi pơhrui amăng hrơi ƀong tê̆t kiăng pơhlôm brơi bruă pơhrui mơng neh met wa. Sang măi djru blơi pơhrui 30 rơbâo/1 tơ̆n kiăng pơsur pran neh met wa”.

Mơng hrơi mut hrŏm hơbô̆ bruă pơlir hơbit hăng hơdôm boh sang măi pơkra sik, sang anŏ ơi Đinh Kot, dŏ amăng plơi Ó, să Chư Krey, tơring čar Gia Lai hơmâo djru brơi pơjeh phrâo, črâo brơi boh thâo hăng ba măi mok phrâo kai pơkra lŏn, pla truh pơ koh pơhrui. Hăng hơdră ngă phrâo anai, tơbâo pơhrui mơng 70 tơ̆n/ektar đĭ giăm 90 tơ̆n/ektar. Pơlir kjăp phik kah hăng djru brơi ñu huăi duh dong prăk apah arăng mă bruă kar hăng hlâo. Yua anun, 5 ektar hmua pla tơbâo bơyan anai ba glăi pơhrui rơbêh 200 klăk prăk brơi sang anŏ ơi Đinh Kot.

“Neh met wa gơmơi pla tơbâo hơđong ƀiă pơhmu hăng pla hơbơi plum, kơtor, rơtă…yua tơbâo mơ̆ tơlơi hơdip hơđong ƀiă”.

Hơbô̆ bruă pơlir pla tơbâo hơmâo pơgôp pơplih tơlơi hơdip lu sang anŏ amăng plơi Ó, să Chư Krey lăi phara, ngă pơplih prong amăng tơlơi pơmĭn, bruă mă mơng neh met wa kual mơnuih djuai ania ƀiă amăng tơring čar Gia Lai lăi hrŏm. Ơi Đỗ Minh Sơn, Khua Jơnum min mơnuih ƀôn sang să Chư Krey, tơring čar Gia Lai brơi thâo, neh met wa amăng să hơmâo ƀơƀrư̆ pơplih hơdôm hmua pla phun pơhrui ƀiă hơdai nao pla tơbâo, lăp djơ̆ hăng ayuh hyiăng lŏn mơnai amăng să.

“Hơdôm thun giăm anai, neh met wa amăng să hơmâo pơplih phun pla, ba hơdôm phun pla hơmâo nua, pơhrui lu anun lĕ tơbâo pla. Mơng hrơi pla tơbâo ngă pơplih tơlơi bơwih ƀong huă mơng neh met wa, hơmâo tơlơi hơdip hơđong ƀiă, ƀô̆ mơta amăng să ăt pơplih tong ten ƀă”.

Gia Lai ră anai lĕ kual pla tơbâo prong hloh kual Tong krah-Dap kơdư, hăng hmua pla giăm 40.000 ektar. Tơring čar hơmâo 2 boh sang măi pơkra sik, dưi akĕ rơbêh 26.000 tơ̆n tơbâo sa hrơi. Hơdôm thun giăm anai, hơdôm boh sang măi hơmâo pơlir glông pơlir ngă hmua hăng mơnuih ƀôn sang, pơjing kual pla hơđong kjăp. Tơbâo koh pơhrui tŏ tui hơđong rơbêh 80 tơ̆n sa ektar; lu đang hmua pla yua đing pruih hăng pla pơjeh phrâo dưi pơhrui rơbêh 90 tơ̆n sa ektar.

Ơi Nguyễn Xuân Phước, Kơ-iăng Khua sang măi pơkra sik An Khê (tơring čar Gia Lai) brơi thâo, sang măi glăk pơjing kual pla tơbâo pơprong, pơtrut yua măi mok, mă yua boh thâo phrâo amăng wai lăng koh pơhrui hăng bruă akĕ tơbâo, ba glăi tơlơi dưi ha amăng plĕ brơi mơnuih ngă hmua hăng sang măi.

“Ră anai, đang hmua pla tơbâo kiăng prong biă mă. Sit biă ñu lĕ bruă sang măi pơđuăi kơtang tui hơmâo akĕ tơbâo tañ ƀiă, pơgôp ngă hơđong tơlơi hơdip mơda kơ mơnuih ƀôn sang ƀơi ƀon lan”.

Lơm hơmâo glông pơlir kơplah wah mơnuih ngă hmua hăng sang măi jai hrơi kjăp, phun tơbâo glăk djru ngă hơđong tơlơi hơdip mơda brơi hơdôm hơpluh rơbâo boh sang anŏ ƀơi Gia Lai. Bruă pơhlôm nua blơi pơhrui hơđong, djru boh thâo, yua măi mok hăng pơphun bơwih ƀong klă hloh djru brơi mơnuih pla tơbâo hơđong hăng bruă ngă hmua, plai ƀiă huač pơrai, đĭ tui boh tŭ yua amăng bơwih ƀong, pơgôp pơđĭ kyar ngă hmua hơđong kjăp amăng ƀon lan./.