Rơbêh 1 ektar đang pla sầu riêng mơng sang anŏ yă Nguyễn Thị Hồng ƀơi să Ea Knêč, tơring čar Dak Lak glăk yak nao bơyan bơnga blang či mơboh, sầu riêng mơboh hă ƀŭ ăt mơng bơyan anai yơh. Samơ̆, ayuh hyiăng pơ-iă hang ngă sang anŏ khŏm pơplih djop mơta amăng bruă bơwih brơi phun pla. Yă Hồng brơi thâo:

“Ayuh hyiăng pơ-iăng hang tui anai, ƀing gơmơi khŏm tơgŭ mơng 3 mông pruih brơi, truh 8-9 mông pơdơi. Pơ-iă hang, mă bruă ƀu anăm lơi, tơlơi anai ngă glêh glar brơi mơnuih ngă hmua”.

Ƀu djơ̆ kơnong sầu riêng, hơdôm phun pla phun pơkŏn, amăng anun hơmâo 210.000 ektar đang kơphê, giăm 29.000 ektar hmua pla tiu, ăt glăk dong ƀơi anăp kơ bruă kơƀah ia pruih. Lu mơnuih ngă hmua hơmâo pơplih mơng pruih sah lŏn tui hơđăp hơdai nao pruih pơkrem. Ơi Nguyễn An Sơn, dŏ amăng să Čư̆ Mgar brơi thâo, sang anŏ ñu hơmâo dưm đing pruih pơkrem dua thun anai laih, ngă hrŏ 1/3 ia pruih pơhmu hăng hlâo anun.

“Hlâo anun ƀing gơmơi pruih dui hyu hăng đing, ngă rơngiă lu ia, rơngiă mông mă bruă. Ră anai yua đing pruih tơdjoh pơkrem rah, plai ƀiă mơnuih mă bruă, ba glăi boh tŭ yua amăng bơwih ƀong huă.”

Hăng tơlơi gơgrong hlâo mơng mơnuih ƀôn sang, gong gai ƀon lan hăng gơnong bruă ngă hmua ăt pok pơhai lu hơdră pơhlôm hlâo yua pơ-iă hang không phang sui hrơi, amra ngă khŏt ia. Ƀơi hơdôm boh să, hơdôm čroh ia hơmâo pĕl ĕp, pok pơđoh ia gap ƀrô; laih dong pơhŭi mơnuih ƀôn sang yua ia pơkrem, yua đing pruih pơkrem. Ơi Nguyễn Văn Kiên, kơ-iăng Khua anom djru djop bruă brơi mơnuih ƀôn sang să Ea Knô̆p, tơring čar Dak Lak brơi thâo:

“Jơnum min mơnuih ƀôn sang să jao hơdôm anih anom bơdjơ̆ nao pel ĕp glăi hơdôm čroh ia kiăng pơđoh hyu ia pơkrem gap ƀrô. Laih dong, pơhŭi hlâo mơnuih ƀôn sang yua ia pơkrem, mă yua đing pruih tơdjoh phrâo kiăng pơhlôm brơi ia pruih brơi phun pa amăng bơyan không phang anai.”

Tui đăo lăng hlâo, ayuh hyiăng pơ-iă hang ƀơi Dak Lak amra sui pơ anăp dong, him lăng amra kơƀah ia yua, sit biă ñu ƀơi hơdôm kual ataih mơng čroh ia ƀudah hơdôm dơnao ia amra ƀu lăp djơ̆ tơlơi kiăng. Yă Đặng Thị Thủy, kơ-iăng Khua gơnong bruă ngă hmua hăng ayuh hyiăng tơring čar Dak Lak brơi thâo, tơring čar hơmâo prap lui hơdôm hơdră pơhlôm hlâo, pơphun ngă hmua lăp djơ̆ amăng bơyan tŏ tui pơ anăp:

“Hơdôm anom bruă bơdjơ̆ nao glăk gum hrŏm kiăo tui lăng ayuh hyiăng amăng bơyan puih phang hăng hơdôm hrơi pơ anăp kiăng pơkrem ia brơi lăi djơ̆. Laih dong, prap lui ngă hmua bơyan phang, črâo brơi ƀon lan pơplih phun pla brơi lăp djơ̆ hăng bruă mă yua ia. Hrŏm hăng anun, tŏ tui pel ĕp hơdôm dơnao pơkŏng ia, gơgrong amăng bruă pơhlôm ia yua amăng ngă hmua hăng yua rĭm hrơi.”./.