Amăng mông jơnum, ƀing khua mua brơi thâo, bruă pơkra brơi mrô kual pla hăng mrô anih anung gơnam lĕ tơlơi yôm phăn kiăng gơnam đang hmua ba sĭ mơdrô pơ tač rơngiao tui jơlan phun. Samơ̆, kiăng ngă ba glăi tŭ yua, hơdôm boh ƀon lan, anom bơwih ƀong hrŏm, anom bruă sĭ mơdrô hăng mơnuih ngă hmua kiăng đing nao bruă tŏ tui bruă pla pơjing brơi klă, wai pơgang hlăt mŏt pơčrăm, mă yua ia jrao brơi djơ̆ tơlơi pơkă hăng tong ten tơlơi pơhing amăng ngă hmua pla pơjing.

Yă Hồ Thị Bích Kiều, Khua anom bruă bơwih ƀong huă să Ea Knuếc, lăi nao hơdôm tơlơi gun sit nik kiăng pơsir hĭ mơtăm: “Ră anai, să glăk bưp tơnap tap amăng bruă pơsit tong anih kơ rĭm blah lŏn tui tơlơi pơkă, yua bơdjơ̆ nao hơdôm boh kông ti, anom bruă sĭ mơdrô kơphê. Amăng lŏn hmua ră anai kơ hơdôm boh kông ti pla kơnong kơphê, samơ̆ mă yua mrô kual pla phara brơi rĭm phun pla, amra ƀuh hơdôm tơlơi gun amăng bruă pơsit brơi anăn, guai kual pla. Mơng hơdôm tơlơi tơnap tap anai, ƀon lan kiăng djru brơi bruă anai, črâo ngă tui djơ̆ tơlơi pơkă.”

Ƀing khua mua ăt pơlăi nao rai tơlơi găn rơgao sit nik amăng pơphun ngă hmua hăng pơlir blơi pơhrui gơnam hrŏm hăng mrô kual pla. Pô pơ ala anom bơwih ƀong sĭ mơdrô, anom bơwih ƀong hrŏm brơi thâo, mrô kual pla amra ba glăi boh tŭ yua lơm pơlir hăng bruă krăo lăng, čih glăi bruă pla pơjing hăng mă yua măi mok pơƀuh brơi anih pla. Bruă ngă tui tơlơi pơkă amăng ngă hmua jing tơlơi yôm phun kiăng wai pơgang brơi gru mrô, huăi ngă hơdôm anih anom blơi mut pơhŭi hlâo ƀudah mă glăi mrô kual pla.

Ơi Lê Quốc Thanh, Khua anom bruă pơsur ngă hmua dêh čar pơsit tong, mrô kual pla lĕ tơlơi gal blung a; bruă yôm ƀiă dong lĕ pơphun ngă hmua hăng tŏ tui mă yua gru mrô kiăng gơnam đang hmua dưi ba sĭ hơđong. “Ƀing ta kiăng pơsit tong tơlơi gơgrong ba, tơlơi dưi, tơlơi glăm mơng rĭm bơnah lơm pơlir hơbit. Ƀing mơnuih bơwih ƀong ngă hmua kiăng pơsit tong tơlơi glăm ba mơng ƀing gơñu lơm mut hrŏm. Anom bruă sĭ mơdrô ăt tui anun mơn, sit biă ñu lĕ anom bruă kơnuk kơna, anom bruă bơdjơ̆ nao, anom bruă pơsur ngă hmua. Ngă tui anun kah dưi pơjing gru mrô kual pla kiăng amuñ ba hyu sĭ mơdrô.”